“Muleibukisha Abalemutungulula”

AYA AMASHIWI ayo umutumwa Paulo alandile ayalembwa pa AbaHebere 13:7, kuti yapilibulwa no kuti: “Muleibukisha intungulushi shenu.” Ukutula pa Pentekoste mu mwaka wa 33, abatumwa ba cishinka aba kwa Shikulu Yesu Kristu, baali e bumba litungulula ilyaletungulula icilonganino icipya ica Bena Kristu. (Imil. 6:2-4) Ilyo umwaka wa 49 walefika, ninshi Yesu alibwelelamo ku muulu, ili bumba litungulula lyalikulile ica kuti mwali na bashali abatumwa ba kwa Yesu. Ilyo balepingula umulandu wa kusembululwa, mwi bumba litungulula mwali “abatumwa na bakalamba ba mu Yerusalemu.” (Imil. 15:1, 2) Ili bumba litungulula e lyaleafwa Abena Kristu bonse. Lyaletuma amakalata ne fipope ku filonganino, ica kuti ifilonganino fyalekoseleshiwa kabili abasambi balitwalilile ukwikatana mu fyo baletontonkanya na mu fyo balecita. Aba mu filonganino balenakila ibumba litungulula kabili balekonka ifyo lyalepingula, na Yehova alebapaala ica kuti balefulilako.—Imil. 8:1, 14, 15; 15:22-31; 16:4, 5; Heb. 13:17.

² llyo abatumwa bafwile, mu cilonganino mwaishileba abasangu. (2 Tes. 2:3-12) Nga filya Yesu asobele mu cilangililo ca ngano ne fyani. Mu ngano (Abena Kristu basubwa) balitandilemo ifyani (Abena Kristu ba bufi). Ingano ne fyani fyalekulila pamo pa myaka iingi mpaka ne nshita ya kulobolola, e kutila mu nshita ya “ku mpela ya cino calo.” (Mat. 13:24-30, 36-43) Pali iyi inshita, Abena Kristu bonse abasubwa balitwalilile ukutungululwa na Yesu, lelo takwali ibumba litungulula ilyo Yesu alebomfya pe sonde ilya kutungulula abasambi bakwe. (Mat. 28:20) Lelo Yesu alisobele ukuti kukaba ukwaluka mu nshita ya kulobolola.

³ Bushe “umusha wa cishinka kabili uwashilimuka” nani? Pa kwasuka ici cipusho, Yesu ashimike icilangililo umo alandile pa fintu fimo ifyaba mu ‘cishibilo’ ca kuti “icalo cili ku mpela.” (Mat. 24:3, 42-47) Yesu alandile ukuti umusha wa cishinka ali no kulapekanishisha abantu ba kwa Lesa ifya kulya fya ku mupashi “pa nshita yalinga.” Mu nshita ya batumwa, Yesu talebomfya umuntu umo ukutungulula abantu ba kwa Lesa, lelo alebomfya ibumba lya baume. Na muno nshiku sha ku mpela mwine, umusha wa cishinka uo Yesu abomfya te muntu umo iyo.

⁴ Ni bani abo Yesu asonta ukupeela abasambi bakwe ifya kulya fya ku mupashi? Abo apeela uyu mulimo, Bena Kristu basubwa ababa pe sonde. Baibolo itila aba Abena Kristu ni “bashimapepo” abapeelwa umulimo wa ‘kubila konse konse ubucindami bwa wabetile ukuti bafume mu mfifi bengile mu lubuuto lwakwe ulwapesha amano.’ (1 Pet. 2:9; Mal. 2:7; Ukus. 12:17) Bushe bonse abasubwa ababa pe sonde baba mwi bumba lya musha wa cishinka? Awe. Ilyo Yesu mu cipesha amano aliishishe ibumba lya baume nalimo 5,000, ukufumyako abanakashi na bana abanono, ayakenye ifya kulya no kupeela abasambi bakwe, e lyo abasambi bakwe nabo bapeele amabumba. (Mat. 14:19) Abomfeshe fye abantu abanono pa kuliisha abengi. Na muno nshiku mwine, abo Yesu apeela umulimo wa kupekanya ifya kulya fya ku mupashi, bantu fye abanono.

⁵ Kanshi “kangalila wa cishinka, uwashilimuka” libumba fye ilinono ilya bamunyinefwe abasubwa abapekanya no kusabankanya ifya kulya fya ku mupashi mu nshita ya kuteka kwa kwa Kristu. (Luka 12:42) Muno nshiku sha kulekekesha, aba bamunyinefwe abasubwa ababa e bumba lya “musha wa cishinka kabili uwashilimuka,” babombela pamo pa maofeshi yakalamba aya Nte sha kwa Yehova. Pali lelo, aba bamunyinefwe abasubwa e Bumba Litungulula ilya Nte sha kwa Yehova.

⁶ Kristu abomfya Ibumba Litungulula pa kusabankanya ifyo ukusesema kwa mu Baibolo kulefikilishiwa, na pa kutweba ifyo twingalabomfya amashinte ya mafunde mu mikalile yesu. Tupokelela ifi ifya kulya fya ku mupashi mu filonganino fya Nte sha kwa Yehova. (Esa. 43:10; Gal. 6:16) Mu nshita balelemba Baibolo, umusha uwacetekelwa uwa pa ng’anda nelyo kangalila, e waleangalila ing’anda ya kwa shikulu wakwe. Na muno nshiku mwine, umusha wa cishinka kabili uwashilimuka alipeelwa umulimo wa kwangalila aba mu ng’anda. Kanshi umusha wa cishinka e ulolekesha na pa fikuulwa ne fipe fyonse ifibomfiwa mu mulimo wa Bufumu. Alangalila no mulimo wa kushimikila no wa kupulinta impapulo isho tubomfya, kabili e upekanya no kulongana kukalamba. E wangalila no mulimo wa kusonta bakangalila ababomba imilimo yalekanalekana mu cilonganino ca kwa Lesa pano calo. Iyi milimo yonse ilanonsha aba “mu ng’anda.”—Mat. 24:45.

⁷ Inga “aba mu ng’anda” ni bani? Kuti twatila bonse abalyako ifya kulya fya ku mupashi. Pa kubalilapo, abasubwa e bali fye aba mu ng’anda. E lyo pa numa, ibumba likalamba ilya “mpaanga shimbi” nabo baishileba aba mu ng’anda. (Yoh. 10:16) Aya mabumba yonse yabili yalya ifya kulya fya ku mupashi ifyo umusha wa cishinka asabankanya.

⁸ Mu nshita ya bucushi bukalamba, ilyo Yesu akesa mu kupingula no konaula icalo cabipa, akasonta umusha wa cishinka ukuba kangalila pa “fyuma fyakwe fyonse.” (Mat. 24:46, 47) Ababa mwi bumba lya musha wa cishinka bakapokelela icilambu cabo ku muulu. Bonse ba 144,000, bakapeelwa amaka ayo Kristu bamupeela ku muulu. Nangu ca kuti pano isonde tapakabe umusha wa cishinka kabili uwashilimuka, Yehova na Yesu bakatwalilila ukutungulula abo Ubufumu bwa kwa Mesia bukalateka. Bakalabomfya “bacilolo.”—Amalu. 45:16.

⁹ Kwaliba ifintu ifingi ififwile ukulenga ‘tuleibukisha abaletutungulula’ no kubacetekela. Mulandu nshi ukwibukisha abaletutungulula kwawamina? Umutumwa Paulo atile: “Pantu balinda imyeo yenu nga bantu abakalubulula; pa kuti bacite ici ne nsansa, te mu bulanda iyo, pantu nga caba ifi kuti camubipila.” (Heb. 13:17) Calicindama ukumfwila no kunakila abaletungulula, pantu balinda imyeo yesu pa kuti tulecingililwa ku fingatufumya kuli Lesa na pa kuti tuleba ne nsansa.

¹⁰ Pali 1 Abena Korinti 16:14, Paulo atile: “Lekeni fyonse ifyo mulecita ficitilwe mu kutemwa.” Ukutemwa e kulenga abaletungulula balepingula bwino pa fintu ifikuma abantu ba kwa Lesa. Pali 1 Abena Korinti 13:4-8, Baibolo ilanda pa kutemwa ukuti: “Mu kutemwa mwaba ukushishimisha ne cikuuku. Mu kutemwa tamwaba ubufuba. Tamwaba ukuitakisha, nangu ukuituumika, mu kutemwa tamwaba ukucita ifishayana, tamwaba ukucita ifya kuisekesha, tamwaba ukukalifiwa. Tamwaba ukusunga ifilubo. Tamwaba ukusekelela pa fishilungeme, lelo mwaba ukusekelela pa cine. Ukutemwa kulasuulako ku fya bubifi fyonse, kusumina fyonse, kusuubila fyonse, kushipikisha fyonse. Ukutemwa takupwa.” Pa mulandu wa kuti abatungulula balaba no kutemwa muli fyonse ifyo bacita, tufwile ukucetekela ukuti bafwaya ifintu filetuwamina. Na kuba, bapashanya Yehova uwaba no kutemwa.

¹¹ Nga filya fine cali mu nshita ya batumwa, abo Yehova abomfya ukutungulula abantu bakwe, baume abashapwililika. Nangu ca kuti tabapwililika, balafikilisha ukufwaya kwakwe nga filya fine caleba na kale. Noa alikuulile icibwato kabili alesoka na bantu pa bonaushi ubwali no kwisa. (Ukute. 6:13, 14, 22; 2 Pet. 2:5) Mose balimupeele umulimo wa kulubula abantu ba kwa Yehova mu Egupti. (Ukufu. 3:10) Yehova abomfeshe abantu abashapwililika ukulemba Baibolo. (2 Tim. 3:16; 2 Pet. 1:21) Kanshi tatufwile ukusuula icilonganino ca kwa Yehova pa mulandu fye wa kuti abomfya abantu abashapwililika ukutungulula umulimo wa kubila imbila nsuma no kulenga abantu baba abasambi. Lelo tufwile ukulaibukisha ukuti, nga ca kuti Yehova taafwa icilonganino cakwe, nga tacibomba imilimo yonse iyo cibomba. Umusha wa cishinka alabombesha nangu ca kuti kwaliba amafya ayengi, ne ci cilanga fye apabuuta tuutu ukuti umupashi wa kwa Lesa e utungulula icilonganino. Yehova alipaala nga nshi icilonganino cakwe ica pe sonde. Kanshi tufwile ukulatungilila no kucetekela sana icilonganino ca kwa Lesa.

¹² Bonse abo basonta ukubomba imilimo mu cilonganino balalanga ukuti balicetekela icilonganino ca kwa Lesa, pantu balasumina ukubomba imilimo iyo babapeela kabili balabomba ne cishinka. (Imil. 20:28) Apo Lesa alitupeela umulimo wa kubila imbila nsuma iya Bufumu, tulabika amano ku kushimikila ku ng’anda ne ng’anda, tulabwelela ku bo twashimikile imbila nsuma, kabili tulatungulula amasambililo ya Baibolo. (Mat. 24:14; 28:19, 20) Pa kuti tulenonkelamo sana mu fya kulya fya ku mupashi ifyo umusha wa cishinka apekanya, tufwile ukulapekanya no kulasangwa mu kulongana kwa Bwina Kristu, ukubikako fye no kulongana kwa muputule no kwa citungu. Nga tuli pa kulongana kwa Bwina Kristu, tulakoseleshanya sana ilyo tulebishanya na bamunyinefwe na bankashi.—Heb. 10:24, 25.

¹³ Kuti twalanga ukuti twalicetekela icilonganino ca kwa Lesa nga tulesangula imisangulo ya kuitemenwa. (Amapi. 3:9, 10) Nga twaishiba ukuti aba bwananyina balekabila ubwafwilisho, tufwile ukubafwa bwangu bwangu. (Gal. 6:10; 1 Tim. 6:18) Icilenga tulecita ifi, ni co twalitemwa aba bwananyina, kabili lyonse tulafwaya ukulanga ukuti tulatasha Yehova ne cilonganino cakwe pa fintu ifisuma ifyo atupeela.—Yoh. 13:35.

¹⁴ Na kabili tulalanga ukuti twalicetekela icilonganino ca kwa Lesa nga tulekonka ifyo citweba. Kuti twalanga ukuti twalicetekela icilonganino cakwe nga tuleumfwila abo asonta ukulatungulula pamo nga bakangalila ba muputule na baeluda mu cilonganino. Aba bamunyinefwe baba pa ‘batungulula’ abo tufwile ukulaumfwila no kulanakila. (Heb. 13:7, 17) Nangu ca kuti tatumfwikishe umulandu batwebela ukuti tucite ifintu fimo, tuleshiba ukuti ukukonka ifyo balanda kuti kwalenga ifintu fyatuwamina. Yehova alatupaala nga tuleumfwila Icebo cakwe ne cilonganino cakwe. Ukucita ifi kulanga ukuti tulanakila Shikulwifwe, Yesu Kristu.

¹⁵ Kanshi kwaliba ifintu ifingi ifilenga tucetekele umusha wa cishinka kabili uwashilimuka. Satana, lesa wa bwikashi buno, aleesha na maka yonse ukuseebanya ishina lya kwa Yehova ne cilonganino cakwe. (2 Kor. 4:4) Mwilaleka Satana alemucimfya ku micenjelo yakwe iyabipa! (2 Kor. 2:11) Alishiba ukuti “ali fye ne nshita inono” ilyo talapooswa mu cilindi icabula impela. Kabili alafwaisha ukulenga abantu abengi baleka ukubombela Yehova. (Ukus. 12:12) E ico ilyo Satana aleesha na maka ukufumya abantu kuli Lesa, natutwalilile ukupalamina kuli Yehova. Natutwalilile ukucetekela Yehova no musha wa cishinka uo abomfya ku kutungulula abantu bakwe muno nshiku. Ukucita ifi kukalenga tukekatane na ba bwananyina bonse.