Ubumi bwa kwa Yesu no Butumikishi

Umulumbe wa Matalanti

YESU atwalilila ukulanshanya na batumwa bakwe pa Lupili lwa Miolife pa kubashimikila na umbi umulumbe, wa cibili mu kukonkana kwa itatu. Inshiku ishinono mu kubangililako, lintu aali mu Yeriko, ashimike umulumbe wa mondo ukulanga ukuti Ubufumu bwali bucili ukutali ku nshita ya ku ntanshi. Umulumbe ashimika nomba, ilintu ukwete impendwa ya mbali shapalana, alondolola mu kufikilishiwa kwa uko ukwa mibombele mu kati ka kubapo kwa kwa Kristu mu maka ya Bufumu. Ulangilila ukuti abasambi bakwe bafwile ukubomba lintu bacili pe sonde ku kwingilishako “ifyuma fyakwe.”

Yesu atendeko kuti: “Pantu [uko e kuti, imibele yalundanishiwa no Bufumu] cili ngo muntu uwa kuyalebela kumbi, uwaitile abasha bakwe, no kubashile fyuma fyakwe.” Yesu e muntu uyo ilyo, ashilaya ukutali ku mulu, ashila ku basha bakwe—abasambi mu kumfwana no Bufumu bwa ku mulu—ifyuma fyakwe. Ifi fyuma tafyaba fikwatwa fya ku mubili lelo fimininako ibala lyalimwa umo akuula ifyenekelwa ku kuletako abasambi bafulilako.

Yesu aseekesha ifyuma fyakwe ku basha bakwe mu kwipipa fye pa ntanshi ya kunina ku mulu. Shani ifyo? Pa kubakambisha ukutwalilila ukubomba mwi bala lyalundululwa pa kushimikila ubukombe bwa Bufumu ukufika ku mbali shabela ukutali ishe sonde. Nga fintu Yesu asosa: “Kuli umo apeele amatalanti yasano, na kuli umbi yabili, na kuli umbi limo; kuli onse umwabelele amaka yakwe yene; e lyo aile kumbi.”

Amatalanti cinekonsekonse—ifyuma fya kwa Kristu—muli fyo fyaakanishiwa ukulingana na maka, nelyo ifya kucitikako fya ku mupashi, ifya basha. Abasha bemininako amabumba ya basambi. Mu mwanda wa myaka uwa kubalilapo, ibumba ilyo ilyapokelele amatalanti yasano mu kushininikisha yasanshishemo abatumwa. Yesu atwalilila ukushimika ukuti abasha abapokelele amatalanti yasano na yabili bonse baliyasandulwilemo imiku ibili pa kushimikila kwabo Ubufumu no kupanga abasambi. Nangu cibe fyo, umusha uwapokelele italanti limo alilifishile mu mushili.

“Apo papite nshite ntali,” e fyo Yesu atwalilila, “aisa shikulu wa basha balya, no kubalubulwisha.” Tacali fyo ukufikila mu mwanda wa myaka uwalenga 20, imyaka imo 1,900 pa numa, e lintu Kristu abwelulwike ku kulubulwisha, ifyo e fyo cali, mu cine cine, “apo papite nshite ntali.” Lyene Yesu alondolola ukuti:

“Aliishile uwapokelele amatalanti yasano, aletelepo na amatalanti yambi yasano, ati, Mwe shikulu, mwanshilile amatalanti yasano; moneni ninonkelapo amatalanti yambi yasano. Shikulu wakwe atile kuli wene, Cisuma, we musha musuma kabili uwa cishinka! Wabo wa cishinka pa tunono, [nkakusonta, NW] pa fingi, Ingila mu kusekelela kwa kwa sokulu.” Umusha ulya uwapokelele amatalanti yabili mu nshila imo ine asandulwilemo amatalanti yakwe imiku ibili, kabili apokelele ukutashiwa kumo kwine ne cilambu.

Ni shani, nangu ni fyo, aba basha ba cishinka bengila mu kusekelela kwa kwa Shikulwibo? Kwena, ukusekelela kwa kwa Shikulwibo, Yesu Kristu, kwali ni uko ukwa kupokelela icifulo ca Bufumu lintu aile ukutali kuli Wishi mu mulu. Ukukuma ku basha ba cishinka mu nshita sha muno nshiku, balikwata ukusekelela kukalamba pa kuseekeshiwa ne fishingamo fyalundwapo ifya Bufumu, kabili lintu bapwisha inshila yabo iya pe sonde, bakakwata ukusekelela ukukapwila mu kubuushiwa ukuya ku Bufumu bwa mu mulu. Lelo ni shani pa lwa musha walenga butatu?

“Mwe shikulu, naishibe imwe ukuti muli muntu wayafya,” e fyo uyu musha ailishanya. “Kabili nalitiinine, nailefise talanti lyenu pa nshi. Moneni, cenu ici!” Umusha ku mufulo akeene ukubomba mwi bala lisanduluka pa kushimikila no kupanga abasambi. E co shikulu amwito “mubifi kabili umunaŋani” no kubilisha ubupingushi ukuti: “Mupokeni italanti . . . Pooseni icinangwa ca musha ku mfifi ya ku nse; e kukabo kulila no kusumanya ameno.” Abo abe bumba lya uyu musha mubifi, abapooswa ku nse, bapusulwa ukusekelela ukuli konse ukwa ku mupashi.

Ici cimika isambililo ya lyakatama kuli abo bonse batunga ukuba abakonshi ba kwa Kristu. Bafwile ukubomba ku kwingilishako ifyuma fya kwa Shikulwibo wa mu mulu pa kukwata ukwakanamo kwakumanina mu mulimo wa kushimikila nga ca kuti bali no kuipakisha ukutashiwa ne cilambu kabili nga ca kuti bali no kusengauka ukupooswa ku mfifi ya ku nse no konaulwa kwa kupelako. Bushe uli uwa mukoosha ku kubomfya amaka yobe muli uku kuloshako? Mateo 25:14-30.

◆ Lisambililo nshi lintu uyu mulumbe wakonkapo wasambilisha?

◆ Ni bani bali abasha, kabili finshi fili ifyuma ifyo baseekeshiwa?

◆ Ni lilali lintu shikulu abwela ku kulubulwisha, kabili cinshi asanga?

◆ Cinshi cili ukusekelela umusha wa cishinka engilamo, kabili cinshi cacitika ku musha mubifi?