Ifipusho Ukufuma ku Babelenga

Bushe abantu bakabuushiwa nga ca kuti tabapokelele ubuKristu bwa cine nomba kabili bafwa pa ntanshi ya kutendeka kwa bucushi bukalamba?

Calibe cisuma kuli ifwe bonse ukulesha ukukongama ukuli konse ukwa kubomba nga bakapingula, ukwishibo kuti mu kupelako, ubupingushi bwa kwa Yehova ukupitila muli Yesu Kristu e bwacindama. (Yohane 5:22; Imilimo 10:42; 2 Timote 4:1) Lelo Amalembo yalapayanya ifyebo fimo ifya kwaafwa mu kwasuka icipusho cipushiwe.

Ukushimikila kwa mu kusaalala kwa calo ukwa mbila nsuma ya Bufumu bwa kwa Lesa kwaba lubali lwacindama ulwa ‘cishibilo ca kubapo kwa kwa Yesu.’ Ici cishibilo calibe camonekesha ukutendeka mu kubangilila kwa uno mwanda wa myaka. Umulimo wa kushimikila ulefumamo ukulekanishiwa kwa bantu ba nko shonse mu kufikilishiwa kwa cilangililo ca kwa Yesu ica “mpaanga” ne “mbushi.” Mu kuba no kupwishishiwa kwa uyu mulimo wa kushimikila no kulekanya, “ubucushi bukalamba” bukaleta imicitile ibifi ilipo iya fintu ku mpela.—Mateo 24:3, 21, 22; 25:31-46.

Yehova, pamo no Mwana wakwe, bakapingula nampo nga abali bonse abakaana ubukombe bwa Bufumu kabili abafwa pa ntanshi ya kubalamuka kwa bucushi bukalamba baba mwi bumba lya mbushi. Yesu asosele ukuti imbushi “bakaya ku kulimunwa kwa muyayaya.” E co, kuti twasondwelela ukuti abo abapimwa na Lesa ukuba imbushi tabakapokelele ukubuuka. Bakwata ubupingushi ubwapala kuli bulya ubwa abo “bantu abakamono kukandwa, uboni bwa muyayaya” pa nshita ya bucushi bukalamba.—2 Abena Tesalonika 1:9.

Lelo ni shani pa lwa abo pambi abamoneke ukuti tabasansalikwa mu kulinga ku bukombe bwa Bufumu pa kuti bengaba na maka ya kucita ukusobolapo kwabamo kumfwikisha ku lubali nelyo ukulwisha icine pa ntanshi tabalafwa mu kati ka ishi “nshiku sha kulekelesha”?—2 Timote 3:1.

Abengi abafwa lintu umulimo wa kushimikila uletwalilila pa ntanshi ya bucushi bukalamba mu kushininkisha bakapokelela ukubuuka. Ici calangililwa ku cintu tubelenga pa Ukusokolola 6:7, 8 ukukuma ku kunina kwa ba pali bakabalwe ba cimpashanya. Abantu abengi balifwa nge finakabupalu fya nkondo, ukucepelwa kwa fya kulya, ne fikuko filenge mfwa. Apo ni ku “Mbo” e kusenda ifi finakabupalu fya “Mfwa,” bakabuushiwa mu Kuteka kwa Myaka Ikana ukwa kwa Kristu, lintu Hades (Mbo) akalekamo bonse abafwa ababa muli wene. (Ukusokolola 20:13) Ubwingi bwa abo bakabuushiwa ku bumi kuti pambi balikweteko ukukumana kumo no bukombe bwa Bufumu pa ntanshi tabalafwa.

Fintu twingaba aba kutootela ukuti Yesu tacishilile ku bantunse ukupima ababa nge mpaanga na baba nge mbushi! Abantunse bashapwililika te kuti bapimunune mu kulinga ubukulu bwe shuko lya mu nshita umuntu umo akwete ilya kumfwa no kupokelela imbila nsuma. Bushe kuti twaishiba ifyo imibele yakwe ya mutima yali nelyo nampo nga mu cituntulu alitemenwe ubulungami? Bushe kuti twapima fintu ukwankulako pambi kwali no kwambukila ulupwa lwakwe, icikulilo cakwe ica butotelo, nelyo ifya kusonga fimbi? Ukwabulo kutwishika iyo. Nalyo line, kuti twaba abashininkisha ukuti Yehova Lesa na Yesu Kristu kuti bapimununa imilandu ya musango yo kabili lyene ukufika pa mapingushi ayapwililika, ayatambalala, kabili ayalungama.—Amalango 32:4; Esaya 11:1-5.

E ico, takuli umulandu kuli ifwe uwa kutunganishisha pa kati ka abo abafwile pali nomba line abo pambi bengabuushiwa nelyo pambi bashingabuushiwa. Ici caba cintu cimo ico tushapeelwa maka ya kucita. (Linganyako Luka 12:13, 14.) Calicilapo kubamo amano kuli ifwe ukulolela pa kupingulapo kwa Bakapingula balungama, Yehova Lesa na Yesu Kristu. Ici cikatupeelako umutende wa muntontonkanya wakulilako nga babomfi ba kwa Yehova. Cikatwaafwa na kabili ukupeela ukusakamana kwawaminako ku cintu twapeelwa ukucita—‘ukuyalenga aba nko shonse ukuba basambi, ukubasambilisha ukubaka fyonse fintu Yesu akambishe.’—Mateo 28:19, 20.

[Abatusuminishe Ukubomfya Icikope pe bula 31]

Impaanga sha Leicester, Meyers