Ifyo Abena Kristu Bankula ku Musebanya wa ku Cintubwingi

UYUMFWA shani lintu umo akusebanya nelyo atandanya ubufi pa lwa iwe? Mu cifyalilwa ulacenwa apakalamba. Inte sha kwa Yehova balakumanya icintu capalako ilyo lyonse baba ica kutontapo ilyashi lyabulo kulungama nelyo ilyanyongana ilya mu fya kusabankanishishamo amalyashi. Lelo nga fintu Yesu asosele pali Mateo 5:11, 12, nalyo line balakwata umulandu wa kubela abasekelela.

Ku ca kumwenako, ulupapulo lwa ciKatolika mu Germany lwatungile ukuti “Nte umo umo alikakililwako ukupeelo bupe ku maofesi yakalamba aya cakaniko cabo pa kati ka maperesenti 17 na 28 aya shintu afola.” Inte sha kwa Yehova, nangu cibe fyo, tababa cakaniko, kabili umulimo wabo wafwilishiwa mu fya ndalama ku misangulo ya kuitemenwa epela. Bakabelenga abengi balilufiwe kuli ifi fyebo fya bufi, fintu Inte sha kwa Yehova shasangile ukuba ifya kulengo bulanda. Lelo ni shani fintu Abena Kristu ba cine bengankula ku musebanya wa mu fya kusabankanishishamo amalyashi?

Ica Kumwenako ico Abena Kristu Balingile Ukukonka

Mateo icipandwa 23 alondolola fintu mu kumonekesha Yesu asenwike bakakaanya bakwe aba butotelo pa bumbimunda bwabo no kufutika. Bushe ici cipayanya icipasho ku Bena Kristu ilelo ku fyo bengabomba na bakalengulula? Kwena iyo. Umwana wa kwa Lesa asenwike bakakaanya bakwe aba butotelo pa mulandu wa bulashi bwakwe ubwaibela buntu akwete, ukucite fyo ku kumwenamo kwa mabumba ayalekutika.

Mateo 15:1-11 ashimika ukuti Yesu apeelwe umulandu pa kuti abasambi bakwe balandilweko nga abalepula mu ca cishilano ca ciYuda. Ni shani fintu Yesu ayankwileko? Aali uwashangila. Pa tushita tumo, Yesu akangene mu kukanapita mu mbali na bakalengulula bakwe, ukusuusha imimwene yabo iyalubana. Ukulanda mu munsaunte, Abena Kristu ilelo tababa mu cilubo lintu besha ukulungika ukwimininwako bubi bubi ukwa mulimo wabo nelyo ifisambilisho, ukwesha ukulondolola imibele mu nshila yabamo ifishinka kabili iya kupelulula. Bacite ci ku kwafwilisha abantu ba bufumacumi ukwishiba ukuti ukulengululwa kwa Nte sha kwa Yehova takwaba na cishinte cine cine kabili kwa musaalula.

Lelo mona fintu Yesu ayankwileko inshita inono pa numa lintu abasambi balondolwele ukuti: “Bushe mwaishibo kuti abaFarise pa kuumfwe cebo ico banyongele imitima?” Aba abaFarise “banyongele imitima”—tabakalifiwe fye lelo babele aba kucimfyanya na bo abashingalungikwa bantu Yesu akeene. E ico ayaswike ati: “Balekeni; ni ntungulushi mpofu.” Ukulanshanya kwatwalilila ne fibambe fyakaluka ifya musango yo tacingabamo amano, takwinganonsha uuli onse, kabili kuti catungulula fye ku fikansa fyabulo buyo. (Mateo 7:6; 15:12-14; linganyako Matt 27:11-14.) Ifyasuko Yesu apeele filango kuti kwaliba “inshita ya kutalala, ne nshita ya kusosa.”—Lukala Milandu 3:7.

Inte sha kwa Yehova tabenekela uuli onse ukubasoselako mu kusenamina. Balasunga mu muntontonkanya amashiwi ya kwa Yesu aya kuti: “Kalanda kuli imwe, ilyo abantu bonse bakamusosele cisuma! pantu ni ’fyo fine na bashibo baalecita bakasesema wa bufi.” (Luka 6:26) C. T. Russell, presidenti wa kubalilapo uwa Watch Tower Society, inshita imo aipushiwe umulandu ashaleicingililila umwine ku musaalula. Ayaswike ati: “Nga uleiminina ku kupanta imbwa iili yonse iyakubosa, tawingafika ukutali sana.”

E co tatulingile ukuleka amashiwi ya bakakaanya ba mukosela ukutupumbula ku mulimo wesu uwa kuli Lesa. (Ilumbo 119:69) Natwangwe umulimo wa Bena Kristu ba cine, uko e kuti, ukubile mbila nsuma. Pamo nge ca kufumamo cenekelwa, tukakwata amashuko ya mu nshita aya kwasuka ifipusho no kulondolola icaba mu mulimo wesu, pamo nga icitwala pa ntanshi imibele isuma iya muntu no kumusambilisha mu Cebo ca kwa Lesa.—Mateo 24:14; 28:19, 20.

Bushe Mulingile Ukwankula ku Kulengululwa?

Yesu alandile ulwa bakonshi bakwe ukuti: “Tamuli ba pano isonde . . . e co aba pano isonde bamupatila.” (Yohane 15:19) Amalipoti ayengi aya fya kusabankanishishamo amalyashi ayacitwa pa Nte sha kwa Yehova yaba kulumbulula kwa lupato, kabili aya musango yo yalingile ukusuulwako fye. Nangu cibe fyo, ifya kusabankanishishamo amalyashi pa nshita shimo kuti fyapeela ifyebo ifilebelebesha ukubulwa ubwishibilo pa lwa Nte nelyo ifilenyonganya nelyo ukwimininako bubi bubi ifishinka. Bakalemba ba lyashi bamo kuti pambi bapoke fyebo ukufuma ku ntulo shaumina lubali. Nampo nga tukasuulako fye ifyebo fya bufi ifisabankanishiwe nelyo ukucingilile cine pa kubomfye nshila shalinga cikashintilila pa mibele, kasongelekanya wa uko kulengulula, no buyo bwakwe.

Inshita shimo ifishinka kuti fyalungikwa ukupitila muli kalata walembwa mu nshila isuma ukuya kuli kalemba mukalamba uwa nyunshipepala nga ca kuti uyo kalata nalembwa onse. Lelo kalata wa musango yo kuti aletako ifya kufumamo ifyapusanininako fye ku filefwaikwa. Mu nshila nshi? Ubufi bwalandilwe kuti pambi bwasabankanishiwa mu kucililako, nelyo bakakaanya kuti pambi bapeelwa ishuko lyalundwapo ilya kupulinta ubufi nelyo imicendo. Mu milandu iingi caliba ica mano ukushiila baeluda bakuminweko ukupingulapo nga kulemba kalata kuli kalemba mukalamba uwa nyunshipepala. Nga ca kuti lipoti wa mu nyunshipepala abalamuna impatila, lyene iofesi lya musambo ilya Watch Tower Society kuti lyaishibisha ifilonganino muli ico calo ulwa fishinka, muli fyo ukuleka bakasabankanya bonse ukupeela ubulondoloshi bwa kwikusha kuli bakepusha.

Bushe mulefwaya ukuibimbamo ngo muntu umo umo mu mutunganya wa musango yo uwanyongana? Ukufunda kwa kwa Yesu ukwa ‘kubaleka babe,’ ukubasuulako, mu kulengama kulabomba kuli ili bumba lya fibambe. Abena Kristu ba bucishinka balikwata imilandu ya muli Baibolo iya kukanina abasangu ne mimwene yabo. (1 Abena Korinti 5:11-13; Tito 3:10, 11; 1 Yohane 2:19; 2 Yohane 10, 11) Nga ca kuti umo nasekelela muli nampo nga ukulengululwa kwa Nte kushimpilwe pa cishinka nelyo kwa kwelenganya fye, ubwishibilo bobe bwine ubwakwate shintililo lyaebekeshiwa ilingi line bwaliba ubwakumanina ku kupeela icasuko.—Mona Ulupungu lwa kwa Kalinda ulwa March 15, 1986, amabula 13 na 14.

Nga ca kuti walolenkana ne fyebo fyanyonganikwa mu nyunshipepala, sunga ukufunda kwa Amapinda 14:15 ukwa kuti: “Uwapelwa amano atetekele cebo conse; lelo uwacenjela amwensekeshe nyantilo shakwe.” Mu Switzerland abantu abengi balifulilwe lintu lipoti ya mu nyunshipepala iya kubimbule nkuntu yalandile ukuti Nte mwanakashi uwacaice alifwile pa mulandu wa kuti abantu bakwe bakeene ukusuminisha ababomfi ba mu cipatala ukumukuushishamo umulopa. Nangu ni fyo bushe ifyo fyali e fishinka? Iyo. Umulwele akeene ukukuushishamo mulopa pa milandu ya butotelo, lelo alisumine ukundapa kwa kupyanikisha pa mulopa. Uku kundapa nga kwatendekwe ukwabula ukutakataka kabili mu kupalishako nga calipuswishe ubumi bwakwe. Nangu cibe fyo, icipatala e cashingilishe ukundapa mu kukanafwaikwa ukufikila lintu cali kucelwa. Lipoti wa mu nyunshipepala talumbwile ifi fishinka.

Muli fyo, ulepimununa mu kusakamanisha icine iciba mu malipoti ya musango yo. Kuti twalondolwela bakepusha ukuti baeluda balabomba ne milandu ya musango yo mu nshila ya kutemwa kabili mu kumfwana ne fya kutungulula fya mu Baibolo. Ukukakatila ku fishinte lintu tuleasuka kutucilikila ku kusondwelela mu kususwa.—Amapinda 18:13.

Ifyebo fya Kuyumfwila we Mwine Fyalikatama

Mu mwanda wa myaka uwa kubalilapo, abantu basalangenye ubufi pa lwa kwa Yesu Kristu pa kuti bengonaula ukushimikwa kwakwe, bamo no kumushinina fye ukuba nga uwa kupinuna ubuteko. (Luka 7:34; 23:2; linganyako Mateo 22:21.) Pa numa, icilonganino ca Bwina Kristu icaice cakumenye ukukaanya ukukalamba ukufuma ku fibombelo fya butotelo ne fya ku calo. Apantu “Lesa asalile ifya buwelewele fya pano isonde,” abengi balisuulile ababomfi bakwe. (1 Abena Korinti 1:22-29) Abena Kristu ba cine ilelo bali no kulolenkana no musebanya, uwaba musango wa kupakaswa.—Yohane 15:20.

Inte sha kwa Yehova balatasha cene, nangu cibe fyo, lintu umuntu balelanshanya nankwe ali uushalemenena lubali kabili alangisha imibele ya mutima imo ine nga bamo aba mu batandashi ba kwa Paulo mu Roma, ababilishe ukuti: “Tuletila ciyene ukuumfwa kuli iwe ifyo uletontonkanya; pantu icakaniko ici caishibikwa kuli ifwe ukuti konse konse cisoselwo bubi.”—Imilimo 28:22.

Peela abantu bashaebwa bwino ubulondoloshi, ukucite fyo no bufuuke. (Abena Roma 12:14; linganyako 2 Timote 2:25.) Balaalike ku kusanga ifyebo fya kuimwena abene pa lwa Nte sha kwa Yehova, icingabalenga ukukanabepwa ku kupeelwe milandu kwa bufi. Kuti na kabili wabomfya ukulondolola ukwasabankanishiwa na Watch Tower Society uko kupeela ifyebo fya kulonsha pa lwa kuteyanya, ilyashi lya kale ilya kuko, ne fisambilisho fya kuko.a Filipi inshita imo ayaswike Natanaele pa kusosa fye ukuti: “Isa umone.” (Yohane 1:46) E fyo na ifwe twingacita. Uuli onse uulefwaya ali uwapokelelwa mu cikabilila ku kutandalila Iŋanda ya Bufumu iya cikaya pa kuimwena umwine umusango wa bantu Inte sha kwa Yehova baba na cintu basumina.

Mwitiinishiwa na Bakakaanya

Ifyo caba ica kukoselesha ukwishibo kuti umusebanya taulesha abantu ku kusanguka Inte! Mu kati ka kulanshanya kwa pa TV mu Germany, abasangu bamumungile ubufi bwa kumumunga pa lwa Nte. Uwa kutamba umo alilwike ukwengelesha kwa basangu pamo ngo kwelenganya kabili aseshiwe ku kubukulula isambililo lyakwe ilya Baibolo ne Nte. Ee, umusebanya wa ku cintubwingi limo limo utungulula ku fya kufumamo fyashininkishiwa!—Linganyako Abena Filipi 1:12, 13.

Umutumwa Paulo alishibe ukuti bamo bali no kupeelo kusakamana kwakulilako ku “milumbe” ukucila ku cine. E co alembele ukuti: “Ube uwatekanya mu fintu fyonse, cula ku bubi, bombo mulimo wa bukabila bwa mbila nsuma, fishapo bukapyunga bobe.” (2 Timote 4:3-5) E co wiisuminisha ukupumbulwa, kabili ‘ukukanatentuka ku cintu nangu cimo’ ku fibambe fyobe. (Abena Filipi 1:28) Twalilila ukuba uwa mutalalila no washikatala kabili akushimikila imbila nsuma mu buseko, kabili ukabomba mu kushangila no musebanya wa ku cintubwingi. Ee, ibukisha ubulayo bwa kwa Yesu ubwa kuti: “Muli abashuka ilyo bamupontela, no kumulamata, no kumwambo bufi icintu conse ca bubifi pa mulandu wa ine; sekeleleni no kwanga, pantu icilambu cenu cikalamba mu muulu; pantu e fyo balamete bakasesema ba ntanshi.”—Mateo 5:11, 12.

[Futunoti]

[Amashiwi pe bula 27]

Lintu alolenkene na bakakaanya, Yesu aebele abasambi bakwe ati: “Balekeni.” Cinshi cintu apilibwile?

[Amashiwi pe bula 29]

“Muli abashuka ilyo bamupontela, no kumulamata, no kumwambo bufi icintu conse ca bubifi pa mulandu wa ine.”—Mateo 5:11