Ubumi bwa kwa Yesu no Butumikishi

Ica Kucilila ca Kupelako Ica kwa Yesu Cili Mupepi

LINTU ubushiku bwa pali Cibili, Nisani 11, bwalepalamina, Yesu apwisha ukusambilisha abatumwa pa Lupili lwa Miolife. Fintu bwaciba ubushiku bwa kupamfiwa, ubwakakala! Nomba, nakalimo lintu babwelelamo ku Betani ku kusendama, aeba abatumwa bakwe ukuti: “Mwaishibo kuti apo papite nshiku shibili pakabe ca kucilila, e lyo Umwana wa muntu akafutukilwa ku kutanikwa.”

Ubushiku bwakonkapo, pali Citatu, Nisani 12, Yesu mu kumonekesha apoose nshita ya kutusha inono pamo na batumwa bakwe. Pa bushiku bwafumineko, ashimawile intungulushi sha butotelo pa cintubwingi, kabili amwensekesho kuti balefwaya ukumwipaya. E co pali Citatu tailangishe umwine pa lwalala, apantu talefwaya icili conse ukupumfyanya ukusefya kwakwe ukwa ca Kucilila na batumwa bakwe icungulo bushiku cikakonkapo.

Pali ino nshita, bashimapepo na bakalamba ba bantu balongene mu lubansa lwa kwa shimapepo mukalamba, Kayafa. Abakalifiwa ukufuma ku kusansa kwa kwa Yesu ubushiku bwafumineko, balepandana amano ukuti bamwikate ku longolo no kumwipaya. Nalyo line baletwalilila ukusoso kuti: “Mu mutebeto te mo, epali pabe mpokota mu bantu.” Baletiina abantu, abo ukusuminisha kwabo Yesu aleipakisha.

Lintu intungulushi sha butotelo mu nshila yabipa baleumana akapi ku kwipaya Yesu, bapokelela umutandashi. Ku kupapushiwa kwabo, ali ni umo uwa batumwa ba kwa Yesu bene, Yuda Iskariote, muli uyo Satana alimbamo imfundo yakosa ku kufutuka Intungulushi yabo! Fintu baba abasekelela lintu Yuda aipusha ukuti: “Bushe mulempeela nshi na ine nkamupeela kuli imwe?” Mu nsansa basuminishanya ukumulipila isha silfere 30, umutengo wa musha ukulingana ne cipingo ce Funde lya kwa Mose. Ukutula ilyo line, Yuda alefwaya umwakufutukila Yesu kuli bene ukwabula ibumba ukuba mupepi.

Nisani 13 yatendeka pa kuwa kwa kasuba pali Citatu. Yesu afikile ukufuma ku Yeriko pali Cisano, e co ubu e bushiku bwalenga mutanda kabili ubwa kupelako ubo aikala mu Betani. Ubushiku bwakonkapo, pali Cine, amapekanyo ya kupelako aya ca Kucilila yalekabilwo kucitwa, aya katendeka pa kuwa kwa kasuba, lintu umwana wa mpanga uwa ca Kucilila afwile ukwipaiwa kabili lyene no kocewa onse. Ni kwi kuntu baleyasefesha umutebeto, kabili ni bani bakacita amapekanyo?

Yesu tapayenye ifyo fyebo, napamo ku kucilikila Yuda ukufuma ku kweba bashimapepo bakalamba ica kuti baikata Yesu mu kati ka kusefya kwa ca Kucilila. Lelo nomba, nakalimo mu kubangilila kwa pali Cine cungulo, Yesu atuma Petro na Yohane ukufuma ku Betani, ukusoso kuti: “Kabiyeni, mutupekanishe ica kucilila, ukuti tulye.”

“Ni kwi mufwaile ukuti tupekanishe?” e fyo baipusha.

“Nga mwaingila mu musumba,” Yesu alelondolola, “umwaume uusendele umutondo wa menshi alemukumanya: mukonkeni, muye mu ŋanda umo aleingila, mwebe no mwine ŋanda, amuti, Kasambilisha atila kuli iwe, Ili kwi iŋanda ya beni, umo tuleliila ica kucilila na basambi bandi? Ulya alemulange ŋanda nkalamba ya pa mulu umwayanswa; e mo mulepekanisha.”

Ukwabulo kutwishika umwine wa ŋanda ali musambi wa kwa Yesu uyo nakalimo aenekele ukwipusha kwa kwa Yesu ku kubomfya iŋanda yakwe kuli ako kashita kaibela. Nangu ni fyo, lintu Petro na Yohane bafika mu Yerusalemu, basanga icili conse nga fintu Yesu asobele. E co aba babili bamona kuli cene ukuti umwana wa mpanga napekanishiwa no kuti amapekanyo yonse yambi nayacitwa ku kusakamana ukukabila kwa balesefya ica Kucilila 13, Yesu na batumwa bakwe 12. Mateo 26:1-5, 14-19; Marko 14:1, 2, 10-16; Luka 22:1-13; Ukufuma 21:32.

◆ Cinshi cintu Yesu mu kumonekesha acita ubushiku bwa pali Citatu, kabili mulandu nshi?

◆ Kukumana nshi kwacitwa pa ŋanda ya kwa shimapepo mukalamba, kabili ni ku mifwaile nshi Yuda atandalila intungulushi sha butotelo?

◆ Ni bani bantu Yesu atuma ku Yerusalemu pali Cine, kabili ku mifwaile nshi?

◆ Cinshi aba batumwa basanga ico icasokolola na kabili amaka ya kusungusha aya kwa Yesu?