Ubumi bwa kwa Yesu no Butumikishi

“Afwile Ukufwa”

YESU, uwakakwa nge ntalamisoka yaseeka, atwalwa kuli Anasi, shimapepo mukalamba uwa kale uusonga. Anasi aali ni shimapepo mukalamba lintu Yesu ngo mulumendo wa myaka ya bukulu 12 apapwishe bakasambilisha ba cirabi pe tempele. Abana baume ba kwa Anasi abafulilako babombele nga bashimapepo bakalamba, kabili nomba shifyala Kayafa e mwine wa ico cifulo.

Yesu nakalimo atwalwa ku ŋanda ya kwa Anasi intanshi pa mulandu wa kulumbuka pa nshita ntali ukwa kwa uyo shimapepo mukalamba mu bumi bwa butotelo bwa ciYuda. Uku kwiminina ku kumona Anasi kwasuminisha inshita kuli Shimapepo Mukalamba Kayafa ukulonganika Sanhedrin, icilye casumbuka ica filundwa 71 ica ciYuda, pamo pene no kulonganika inte sha bufi.

Shimapepo mukalamba Anasi nomba aipusha Yesu pa lwa basambi bakwe no kusambilisha kwakwe. Nangu cibe fyo, Yesu mu kwasuka asoso kuti: “Ine nanda pa mbilibili ku ba pano isonde; ine nsambilisha pe mu masunagoge na mwi tempele, umo abaYuda bonse balongana; kabili nshasosele nangu cimo mu bumfisolo. Cinshi ico muleipushisha ine? Ipusheni abaŋumfwa ico nalandile kuli bene; baishiba ifyo nasosele.”

Pali ici, umo uwa balashi uwiminine mupepi na Yesu amupama ulupi pa menso, no kusoso kuti: “Bushe uleasuka fi shimapepo mukalamba?”

“Nga nalando bubi,” e fintu Yesu ayasuka, “nshinina pa bubi; nga nalande cisuma, nga cinshi waŋumina?” Pa numa ya uku kukabushanya, Anasi atuma Yesu kuli Kayafa nakakwa.

Pali ino nshita bashimapepo bakalamba na bakalamba na bakalemba, ee, Sanhedrin yonse, batendeka ukulalongana. Icifulo cabo ica kukumaninapo ukwabulo kutwishika ni ŋanda ya kwa Kayafa. Nangu cibe fyo, ukukwata ukulubulwisha kwa musango yo pa bushiku bwa Kucilila mu kumonekesha kulwisha ifunde lya ciYuda. Lelo ici tacitompwele intungulushi sha butotelo ukufuma ku mifwaile ya shiko iyabipa.

Kale kale, imilungu pa ntanshi lintu Yesu abuushishe Lasaro, Sanhedrin yali naipampamika pa kati kabo abene ukuti afwile ukufwa. Kabili inshiku fye shibili mu kubangilila, pali Citatu, abalashi ba butotelo bapandene amano capamo ku kwikata Yesu mu bumfisolo ku kumwipaya. Elenganya, kale kale aali nasenukwa pa ntanshi ya kulubulula kwakwe!

Ukubombesha nomba kulecitwa ku kusanga inte abakapayanya ubushinino bwa bufi pa kuti umulandu usangwe ku kulwisha Yesu. Nangu cibe fyo, takuli nangu imo inte iyasangwa abali mu kusuminishanya mu bunte bwabo. Mu kupelako, babili baima no kusumina ukuti: “Twamuumfwile aletila, Ine nkasopolole tempele ili ilyacitwa ku minwe, na mu nshiku shitatu nkakuula limbi ilishakacitwe ku minwe.”

“Bushe tauleasuka nangu cimo?” e fintu Kayafa aipusha. “Cinshi aba balekushinina?” Lelo Yesu afinda. Nelyo fye ni muli uku kupeelwa umulandu ukwa bufi, ku kulengwe nsoni ukwa Sanhedrin, inte shafilwa ukulenga amalyashi ya shiko ukumfwana. E co shimapepo mukalamba aesha umucenjelo wapusanako.

Kayafa naishiba ifyo abaYuda baleyumfwa pa lwa muntu umo ukutunga ukuba Umwana wine wa kwa Lesa. Mu milandu ibili mu kubangilila, mu bukali basontele Yesu pamo ngo wa miponto uwawaminwa ukufwa, inshita imo ukwelenganishiwa mu cilubo ukuti aleitunga ukulingana na Lesa. Kayafa nomba mu bucenjeshi apinda ukuti: “Ndeti lapa Lesa uuli no mweo, ukuti utwebe nga ni we Kristu Mwana Lesa.”

Ukwabulo kusakamana ico abaYuda baletontonkanya, Yesu mu cine cine Mwana wa kwa Lesa. Kabili ukufinda kuti kwapilibulwa ngo kukaana kwa kuba kwakwe Kristu. E co Yesu mu kushipa ayasuka ukuti: “Ni ne. Kabili mukamono Mwana wa muntu naikala ku kulyo kwa Maka, no kwisa na makumbi ya mu mulu.”

Pali ici, Kayafa, mu kulangilila kwamonekesha, alepula ilaya lyakwe no kupundo kuti: “Naponta. Tuli no kukabila nshi kabili ku nte? Moneni, nomba mwaumfwo kuponta, muleti shani?”

“Afwile ukufwa,” e fyabilisha Sanhedrin. Lyene batendeka ukumupumya, kabili balanda ifintu ifingi mu kumupontela. Bamupame ndupi ku menso no kumufwishila amate. Bambi bafimba icinso cakwe conse no kumututamo ififunshi no kusosa mu musaalula abati: “Tusesemene, we Kristu! Ni ani uwakuuma?” Iyi mibele yabulo mucinshi, iyabule funde yacitika mu kati ka kulubulula kwa nshita ya bushiku. Mateo 26:57-68; 26:3, 4; Marko 14:53-65; Luka 22:54, 63-65; Yohane 18:13-24; 11:45-53; 10:31-39; 5:16-18.

◆ Ni kwi Yesu atwalwa intanshi, kabili cinshi cacitika kuli wene kulya?

◆ Ni kwi Yesu mu kukonkapo atwalwa, kabili ku mifwaile nshi?

◆ Ni shani Kayafa akwata amaka ya kulenga Sanhedrin ukubilisha ukuti Yesu awaminwa imfwa?

◆ Mibele nshi iyabulo mucinshi, iyabule funde yacitika mu kati ka kulubulula?