Ubumi bwa kwa Yesu no Butumikishi

Pa Ntanshi ya Sanhedrini, Lyene Kuli Pilato

UBUSHIKU bwalapalamina ku kupwa. Petro akaana Yesu umuku walenga itatu, kabili ifilundwa fya Sanhedrini bapwisha ukulubulwisha kwabo ukwabamo ukupumya kabili basalangana. Nangu cibe fyo, bakumana na kabili pali Cisano ulucelo lintu fye bwaca, ino nshita pa Ŋanda yabo iya Sanhedrini. Imifwaile yabo mu kupalishako kumonekela ku kushinina kwa mwi funde ukwa kulubulwisha kwa bushiku. Lintu Yesu atwalwa pa ntanshi yabo, basosa, nge fyo bacicita ubushiku ukuti: “Nga uli Kristu, twebe.”

“Nga namweba, tamwasumine,” e fyo Yesu ayasuka. “Kabili nga namwipusha tamwayasuke.” Nangu cibe fyo, Yesu mu kushipa asonta ku kwishibikwa kwakwe, pa kusoso kuti: “Pali nomba Umwana wa muntu akekala ku kwa kulyo kwa kwa Lesa ukwa maka.”

“Bushe kanshi uli Mwana wa kwa Lesa?” bonse balefwaya ukwishiba.

“E fyo mwasosa ukuti ni ne,” e fyo Yesu ayasuka.

Kuli aba baume bakwete ipange lya kwipaya, ici casuko cili icakumanina. Balanguluka cene ngo kuponta. “Ca kushininkisha nshi twingakabila kabili?” e fyo baipusha. “Pantu twayumfwila pa kanwa kakwe.” E co bakaka Yesu, bamutungulula, no kumupeela kuli kateka wa ciRoma Ponti Pilato.

Yuda, uwasenwike Yesu, acilaumfwa ku kulubulula. Lintu amona ukuti Yesu asenukwa, ayumfwa uwa mulandu. E co aya kuli bashimapepo bakalamba na bakalamba ku kubwesha isha silfere 30, ukulondolola ukuti: “Nabembwike pa kufutuko mulopa wa kaele.”

“Bushe mulandu wesu? Kaumone we mwine,” e fyo bapunda mu bunkalwe. E co Yuda apoosa isha silfere mwi tempele kabili aya no kwesha ukuikulika. Nangu cibe fyo, umusambo uko Yuda akakila umwando mu kumonekesha waputuka, kabili umubili wakwe waponena pa mabwe pa nshi, apo walepuka.

Bashimapepo bakalamba tabali abashininkisha pa fya kucita ne sha silfere. “Tacifwile ukushipoosa mu cipao,” e fyo basondwelela, “pantu mutengo wa mulopa.” E co, pa numa ya kupandana amano, bashita impanga ya mubumfi ku kube ya kushiikamo bambi bambi. Impanga muli ifyo yaisa mu kwitwa “Impanga ya mulopa.”

Lucili lucelo lintu Yesu atwalwa kwi sano lya kwa kateka. Lelo abaYuda abamushindika bakaana ukwingila pantu basumina ukuti isenge lya musango yo na Bena fyalo kuti lyabakowesha. E co pa kubengisha, Pilato afumina pa nse. “Mulandu nshi mwaletelo muntu uyu?” e fyo aipusha.

“Uyu abulaba ni ncitatubi, nga tatumupeele kuli imwe,” e fyo bayasuka.

Ukufwaisha ukukanaibimbamo, Pilato ayankulako ukuti: “Musendeni mwe bene, no kumupingula umwalola Amalango yenu.”

Ukusokolola ipange lyabo ilya kwipaya, abaYuda batungo kuti: “Tacasuminishiwa ifwe ukwipayo muntu.” Mu cituntulu, nga ca kuti baipeye Yesu mu kati ka Kusefya kwa ca Kucilila, mu kupalako cali no kulenga icimpungili ca cintubwingi, apantu abengi baishibe Yesu mu mucinshi wasumbuka. Lelo nga bengalenga abena Roma ukumuputunkanya pa mulandu wa bupolitiki, ici kuti cakongamina ku kubalubula ulwa cishingamo pa ntanshi ya bantu.

E co intungulushi sha butotelo, ukwabulo kulumbula ukulubulwisha kwa mu kubangilila uko basenwike Yesu ku kuponta, nomba baalukile ku kupeele milandu yalekanalekana. Bapanga ukushinina kwa mbali shitatu pa kusoso kuti: “Twasangile uyu muntu [1] alealulo luko lwesu no [2] kulesho kutuula kuli Kaisare, [3] pa kutila umwine e Kristu imfumu.”

Cili kupeelwo mulandu wa kuti Yesu aleitunga ukube mfumu e casakamika Pilato. Wene, kanshi, aingila mwi sano na kabili, aita Yesu, no kwipusha ukuti: “Bushe ni we mfumu ya baYuda?” Mu mashiwi yambi, bushe nautobe funde pa kuibilisha we mwine ukuti uli mfumu mu kulwisha Kaisare?

Yesu alefwaya ukwishiba ifyo kale kale Pilato aumfwa pa lwa wene, e co aipusha ukuti: “Bushe mwaisosele ci mwe bene, napamo bambi e bamwebele ulwa ine?”

Pilato ailumbulwila ukukanaishiba pa lwa wene no kufwaisha kwa kwishibe fishinka. “Bushe ine ndi muYuda? e fyo ayankulako. “Luko lobe na bashimapepo bakalamba e bakupeela kuli ine. Cinshi wacita?”

Yesu teseshe ukuleuka umulandu, uuli ni uyo uwa bumfumu. Icasuko ico Yesu nomba apeela ukwabulo kutwishika capapusha Pilato. Luka 22:66–23:3; Mateo 27:1-11; Marko 15:1; Yohane 18:28-35; Imilimo 1:16-20.

◆ Ni ku mifwaile nshi Sanhedrini yakumanina na kabili ulucelo?

◆ Ni shani ifyo Yuda afwa, kabili cinshi cacitwa ku sha silfere 30?

◆ Mulandu nshi abaYuda bafwaila abena Roma ukwipaya Yesu, ukucila ukumwipaya abene nge fyo baeseshe ukucita pa tushita tumo mu kubangilila?

◆ Kupeelwa imilandu nshi abaYuda bacita ku kulwisha Yesu?