Ubumi bwa kwa Yesu no Butumikishi

“Cine Cine Uyu Ali ni Mwana Lesa”

YESU takokwele pa cimuti lintu, akasuba pa kati, imfifi ishingalondololwa, iya maawala yatatu yaponako. Solar eclipse (imfifi isako pa mulandu wa kupita kwa mweshi pa kati ka kasuba ne sonde) taili iyashingamwa, apantu ici cicitika fye pa nshita ya mweshi waikala uupya, kabili umweshi uba uwakumanina pa nshita ya ca Kucilila. Mu kulundapo, ama solar eclipse yabako fye pa maminiti yanono. E co imfifi ili ya ntulo ya bulesa! Mu kucitikako caimika abo balepumya Yesu, nelyo fye ukulenga umusalula wabo ukuleka.

Nga ca kuti icinjelengwe ca kulengo mwenso cacitika pa ntanshi incitatubi umo talakalipila umunankwe no kwipusha Yesu ukumwibukisha, kuti pambi caba ca kusangwilako mu kulapila kwakwe. Nakalimo cili mu kati ka mfifi emo abanakashi bane, ukubalumbula, nyina wa kwa Yesu na nkashi inankwe Salome, Maria umwina Magadala, na Maria nyina wa mutumwa Yakobo Munono, baenda ukupalamina ku cimuti ca kucushiwilwapo. Yohane, umutumwa watemwikwa uwa kwa Yesu, ali pamo nabo kulya.

Fintu umutima wa kwa nyina wa kwa Yesu ‘walaswamo’ ilyo alemona umwana uyo aonseshe no kukusha ukukobekwa palya mu kushikitika! Nalyo line, Yesu atontonkanya, te lwa kukalipwa kwakwe kwine, lelo pa busuma bwa kwa nyina. Mu kuba no lupikwe lukalamba, alosho mutwe kuli Yohane no kusosa kuli nyina ukuti: “[We mwanakashi, NW], mono mwana obe!” Lyene, ukulosho mutwe kuli Maria, asosa kuli Yohane ukuti: “Mona, noko!”

Muli iyo nshila Yesu aseekesha ukusakamanwa kwa kwa nyina, uyo nomba mu kumonekesha ali mukamfwilwa, ku mutumwa wakwe uwatemwikwa nga nshi. Acita ici pa mulandu wa kuti ukufika pali ino nshita abana bambi aba kwa Maria tabalalangisha icitetekelo muli wene. Muli fyo aimika ica kumwenako cisuma ica kucita kupayanya te ku kukabila fye kwa ku mubili ukwa kwa nyina lelo na kabili no kwa ku mupashi.

Mupepi ne nshita ya 3 koloko icungulo kasuba, Yesu asosa ukuti: “Ndi ne cilaka.” Lyene, ukwiluka ukuti Wishi, nga fintu cili, nafumya ukucingilila ukufuma kuli wene pa kuti bumpomfu bwakwe bwingeshiwa ukufika ku mpela, akuuta mu kuba ne shiwi likalamba ukuti: “Lesa wandi, Lesa wandi, cinshi mwandekelesesha?” Pa kumfwa ifyo, bamo abaiminine mupepi bapunda: “Moneni, aleita Eliya.” Apo pene umo uwa bene abutuka kabili, ukubomfya umulongwe waisulamo umwangashi uwakantuka pa mpela ya mwepu wa husope, amupeela ica kunwa. Lelo bambi basoso kuti: “Lekeni, tumone nga Eliya alaisa ku kumwisha.”

Lintu Yesu apokelela umwangashi wakantuka, akuuta ukuti: “Nacipwa.” Ee, napwisha conse cintu Wishi amutumina ku kucita pe sonde. Mu kupelako, asosa ukuti: “Tata, mu minwe yenu e mo ndetuulo mupashi wandi.” Muli iyo nshila Yesu apeela amaka ya bumi bwakwe kuli wishi mu kucetekela ukuti Lesa akabubwesha kuli wene na kabili. Lyene akontamika umutwe wakwe no kufwa.

Akashita kantu Yesu apeema umuku wa kulekeleshako, icinkukuma cabipisha cacitika, ukulepule fimabwe. Icinkukuma cili ica maka nga nshi ica kuti inshishi ku nse ya Yerusalemu shalepuka, kabili ifitumbi fyapooswa ukufuma muli shene. Abapita nshila, abamona imibili ya bafwa iyo yasansalikwa, baingila mu musumba no kucita lipoti.

Mu kulundapo, pa kashita kantu Yesu afwa, icipembe cikalamba icayakanya Umwashila ukufuma ku Mwashilisha calepulwa pa kati, ukufuma pa mulu ukufika pa nshi. Mu kumonekesha ici cipembe icasaamikwe mu kuyemba calepa amamita 18 kabili icafina nga nshi! Icipesha amano ca kupapusha tacilangishe fye icipyu ca kwa Lesa ukulwisha bakepaya ba Mwana Wakwe lelo cilelangilila ukuti ukwingila Umwashilisha, mu mulu mwine, nomba kwalengwa ukucitikako ukupitila mu mfwa ya kwa Yesu.

Kwena, lintu abantu baumfwa icinkukuma no kumona ifintu filecitika, batinishiwa apakalamba nga nshi. Mushika mukalamba ku kuputunkanya apeela umucinshi kuli Lesa. “Cine cine uyu ali ni mwana Lesa,” e fyo abilisha. Mu kupalako alisangilwepo lintu ukutunga ubwana bwa bulesa kwalandilwepo pa kulubulushiwa kwa kwa Yesu pa ntanshi ya kwa Pilato. Kabili nomba ashininwa ukuti Yesu ali Mwana wa kwa Lesa, ee, ukuti ali mu cine cine mwaume wakulisha uwabalile abo wa mweo.

Bambi na bo bene bacimfiwa kuli fi fya kuponako fya cipesha amano, kabili batendeka ukubwelela ku ŋanda balekunkunsha pa fifuba fyabo, pamo nge cilangililo ca bulanda bwabo ubwacishamo no kulengwe nsoni. Abamona ica kutamba akatalamukila basambi banakashi abengi aba kwa Yesu abo baseshiwa mu kushika kuli ifi fya kuponako fyakakala. Umutumwa Yohane na o wine e po ali. Mateo 27:45-56; Marko 15:33-41; Luka 23:44-49; 2:34, 35; Yohane 19:25-30.

◆ Mulandu nshi solar eclipse taingashingamwa ku maawala yatatu aya mfifi?

◆ Mu kwipipa pa ntanshi ya mfwa yakwe, ca kumwenako nshi cawamisha Yesu apayanya kuli abo abali na bafyashi abacikoloci?

◆ Bulondoloshi nshi bune ubwa kulekelesha ubwa kwa Yesu pa ntanshi ya kufwa?

◆ Cinshi cintu icinkukuma capwishishisha, kabili bucindami nshi ubwa cipembe ce tempele ukulepuka muli fibili?

◆ Ni shani fintu mushika mukalamba ku kuputunkanya ayambukilwa ne cipesha amano?