Ni Bani Mufwile Ukutemwa?

“Uletemwo mubiyo nga we mwine.”—MATEO 22:39.

 1. Nga twalitemwa Yehova, mulandu nshi tufwile ukutemenwa na banensu?

ILYO Yesu bamwipwishe ulwe funde likalamba, ayaswike ati: “Uletemwa sokulu Lesa ku mutima obe onse, na ku mweo obe onse, na ku kutontonkanya kobe konse.” Lyene, ayambwile ifunde lya bubili ilyapalana ne lya ntanshi, atile: “Uletemwo mubiyo nga we mwine.” (Mateo 22:37, 39) Ca cine, ukutemwa abanensu e cishibilo ca Bwina Kristu. Na kabushe, nga twalitemwa Yehova, tufwile ukutemwa na banensu. Mulandu nshi? Pantu uko tulangila ukuti twalitemwa Lesa ni ku kunakila Icebo cakwe, kabili Icebo cakwe citweba ukutemwa abanensu. Kanshi, nga tatutemenwe bamunyinefwe ne nkashi, ninshi tatwatemwa Lesa icine cine.—Abena Roma 13:8; 1 Yohane 2:5; 4:20, 21.

 2. Kutemwa kwa musango nshi tufwile ukukwatila abanensu?

² Ilyo Yesu atile tufwile ukutemwa abanensu, talelanda fye pa fibusa fyesu. Kabili talelanda pa kutemwa kwaba mu ndupwa nelyo pa kwaba pa mwaume no mwanakashi. Alelanda pa kutemwa uko Yehova akwatila ababomfi bakwe abaipeela no ko bamukwatila. (Yohane 17:26; 1 Yohane 4:11, 19) Kalemba umuYuda—kalapashi mu kulanda, ukulingana ne fyo Yesu amumwene—asuminishe ifyalandile Yesu ukuti ukutemwa Lesa kufwile kwaba ukwa “ku mutima onse, na ku mucetekanya onse, na ku maka yonse.” (Marko 12:28-34) Alilungike. Ukutemwa uko Umwina Kristu alundulula kuli Lesa na ku babiye kusanshamo ifyo umuntu aleumfwa na mano. Kuba kwa ku mutima kabili kutungululwa no muntontonkanya.

 3. (a) Bushe Yesu afundile shani “uwa Malango” ukumfwikisha uulingile ukuba umubiye? (b) Icilangililo ca kwa Yesu cibomba shani ku Bena Kristu ilelo?

³ Ukulingana ne fyalandile Luka, ilyo Yesu atile tufwile ukutemwa abanensu, “uwa Malango umo” aipwishe ati: “Ngo munandi ni ani?” Pa kwasuka, Yesu ashimike umulumbe. Umuntu umo alipuminwe, ukwibilwa, kabili ashilwe mpondo mu mbali ya nshila. Ababalilepo ukupita bali ni shimapepo e lyo pakonka no mwina Lebi. Aba bonse tabamusakamene. Lyene, umwina Samaria alishile no kumona uyu mwaume wacenenwe, kabili amwikatile inkumbu icine cine. Nani pali aba batatu ali cibusa wa ulya mwaume wacenenwe? Icasuko calishibikwe. (Luka 10:25-37) Umwaume wa Malango napamo alipapushiwe ukumfwa Yesu alesosa ati umwina Samaria kuti aba cibusa musuma ukucila shimapepo no mwina Lebi. Ukwabula no kutwishika, Yesu aleafwa ulya mwaume ukutemwa umubiye umbi ukucila pali ulya aletontonkanya. E fyo na Bena Kristu batemwa. Tontonkanyeni pa bantu bonse abo batemwa.

Ukutemwa aba mu Lupwa

 4. Ni bani, intanshi, Umwina Kristu afwile ukulangisha ukutemwa?

⁴ Abena Kristu balatemwa aba mu lupwa lwabo e kuti abakashi balatemwa abalume, abalume balatemwa abakashi, abafyashi balatemwa abana. (Lukala Milandu 9:9; Abena Efese 5:33; Tito 2:4) Ca cine ukuti ukutemwa kwine kwine ukwa cifyalilwa emo kwaba mu ndupwa ishingi. Lelo, amalyashi tumfwa pa lwa fyupo kupwa, ukucusha abena mwabo, na bana balekeleshiwa nelyo abacushiwa yalangilila ukuti ulupwa luli mu bwafya ilelo, kabili ukutemwa kwa cifyalilwa ukuba mu lupwa takwingekatanya ulupwa. (2 Timote 3:1-3) Pa kuti batunguluke mu mikalile yabo iya mu lupwa, Abena Kristu bakabila ukuba no kutemwa uko Yehova na Yesu bakwata.—Abena Efese 5:21-27.

 5. Ni kuli nani abafyashi bafwaya ukwaafwa pa kukusha abana babo, kabili cinshi cafumamo ku bengi?

⁵ Abafyashi Abena Kristu bamona abana babo nge cipe ca mutengo ico Yehova abaseekesha, kabili bashintilila pa kwaafwa kwakwe pa kubakusha. (Amalumbo 127:3-5; Amapinda 22:6) Muli iyi nshila balalundulula ukutemwa kwa Bwina Kristu, ukubaafwa ukucingilila abana babo ku kusonga uko abacaice bengawilamo. Ici calenga ukuti abafyashi ba Bwina Kristu abengi babe ne nsansa nga shilya shakwete nyina umo uwa ku Netherlands. Pa numa ya kumona umwana wakwe umwaume abatishiwa—uwali pa bantu 575 ababatishiwe mu Netherlands umwaka wapwile—alembele amashiwi yakonkapo, ati: “Pali ino nshita, ifyo naleculila pa myaka 20 iyapita na fileta icibwesha. Inshita yonse na maka, ukubikapo fye no kukalipwa, ukuibikilishako, no bulanda, nshifitontonkanyanapo.” Fintu ali ne nsansa ukumona umwana wakwe umwine aisalila ukubombela Yehova. Pali bakasabankanya bafikile 31,089 abaleshimikila mu Netherlands umwaka wapwile, abengi basambilile ukutemwa Yehova ku bafyashi babo.

 6. Ukutemwa kwa Bwina Kristu kuti kwaafwa shani ukukosha icupo?

⁶ Paulo aitile ukutemwa ati “e kukakila fyonse pamo mu kwitabana,” kabili kuti kwabaka icupo na mu nshita ya mafya. (Abena Kolose 3:14, 18, 19; 1 Petro 3:1-7) Ilyo umwaume umo mu Rurutu, icishi cinono apaba bakilomita mupepi na 700 ukufuma ku Tahiti, atendeke ukusambilila Baibolo ne Nte sha kwa Yehova, umukashi wakwe alemukaanya icine cine. Mu kuya kwa nshita, asendele abana, ukumusha eka, no kuyaikala ku Tahiti. Nalyo line, umulume alangishe ukutemwa pa kulatuma indalama lyonse no kulamutumina lamya ukwipusha ifyo ena nelyo abana balekabila. Kanshi alibombele apapela amaka yakwe ku kufikilisha umulimo wakwe uwa Bwina Kristu. (1 Timote 5:8) Lyonse alepepa ukuti ulupwa lwakwe lukekatane na kabili, kabili kuli pele pele umukashi wakwe alibwelele. Ilyo abwelele, amusungile mu “kutemwa, ukutwalilila, ukufuuka.” (1 Timote 6:11) Mu 1998, alibatishiwe kabili pa numa ali ne nsansa ishingi ilyo umukashi wakwe asumine ukusambilila Baibolo. Lilye sambililo lyali pa masambililo 1,351 ayatungulwilwe mu cifulo ca kubombelamo icangalilwa ne ofeshi lya Watch Tower ilya mu Tahiti umwaka wapwile.

 7. Ukulingana no mwaume umo ku Germany, cinshi cakoseshe icupo cakwe?

⁷ Ku Germany umwaume umo akenye umukashi wakwe ukusambilila icine ca mu Baibolo kabili alishininwe ukuti Inte sha kwa Yehova shalefwaya fye ukumulufya. Lelo, pa numa, alembeele Nte uwalandile no mukashi wakwe pa kubala ati: “Ndemutootela pa kwishibisha umukashi wandi ku Nte sha kwa Yehova. Pa kubala, nalisakamikwe pantu naumfwile ifintu fyabipa ifingi nga nshi pa lwa Nte. Lelo nomba, pa numa ya kusangwa ku kulongana no mukashi wandi, e lyo nkutulwike fintu nalubile. Ninjishiba ukuti ico ndeumfwa e cine, kabili calilenga ne cupo cesu ukukoselako.” Pa Nte sha kwa Yehova 162,932 mu Germany—na 1,773 mu fishi fyangalilwa ne ofeshi lya Watch Tower ilya mu Tahiti—paba indupwa ishingi abaikatana mu kutemwa kwa bulesa.

Ukutemwa Bamunyinefwe ba Bwina Kristu

 8, 9. (a) Nani atusambilisha ukutemwa bamunyinefwe, kabili cinshi ukutemwa kutulenga ukucita? (b) Shimikeni ica kumwenako ca fyo ukutemwa kwingalenga bamunyina ukwafwilishanya.

⁸ Paulo aebele Abena Kristu ba ku Tesalonika ati: “Imwe bene musambilishiwa kuli Lesa ukutemwana.” (1 Abena Tesalonika 4:9) Ca cine, abo “abasambilishiwa kuli Yehova” balatemwana. (Esaya 54:13) Ukutemwa kwabo kumonekela mu fyo bacita, nga fintu Paulo alangile ilyo atile: “Mu kutemwa e mo mubelane abasha.” (Abena Galatia 5:13; 1 Yohane 3:18) Bacite ci, ku ca kumwenako, ilyo baletandalila bamunyina na bankashi abalwele, ilyo balekoselesha abapopomenwa, na lintu baleyafwilisha abanaka. (1 Abena Tesalonika 5:14) Ukutemwa kwesu ukwa cine cine ukwa Bwina Kristu kulalenga paradise wesu uwa ku mupashi ukukushiwa.

⁹ Mu Cilonganino ca Ancón, icaba pa filonganino 544 mu Ecuador—bamunyina kulya balicitilepo fimo ifyalangilile ukutemwa kwabo. Ubwafya bwa mu fya ndalama bwabashile ukwabula incito ne ndalama. E ico bakasabankanya bapingwilepo ukupanga indalama ukupitila mu kulashitisha ifya kulya ku balondo be sabi aba muli ulya wine mushi nga babwela ku bulondo bwa bushiku. Bonse babombele pamo, kumo na bana bene. Baletendeka ne nshita ya 1 koloko wa ku maca pa kuti bengapekanya ica kulya mu nshita ya 4 koloko wa wa lucelo inshita abalondo balebwelelapo. Bamunyina baleakana indalama balepanga ukulingana ne sho umo umo alekabila. Uko kwafwana kwalangilile ukutemwa kwa cine cine ukwa Bwina Kristu.

10, 11. Kuti twalanga shani ukuti twalitemwa bamunyina abo tushaishiba?

¹⁰ Lelo, ukutemwa kwesu takupelela fye ku Bena Kristu abo twaishiba. Umutumwa Petro atile: “Temweni aba bwananyina [bonse].” (1 Petro 2:17, NW) Twalitemwa bamunyina bonse ne nkashi pantu bonse ni bakapepa banensu aba kwa Yehova Lesa. Ilyo kwaima ubwafya napamo kuti yaba e nshita ya kulangilamo ukutemwa. Ku ca kumwenako, mu mwaka wa mulimo uwa 2000, ilyeshi lyabunshishe Mozambique, ne nkondo yatwalilila iya bana calo mu Angola fyashile abengi mu nsala. Bamunyina 31,725 mu Mozambique na bambi 41,222 mu Angola e bo aya masanso yakumine. Ici calengele Inte mu calo icina mupalamano ica South Africa ukutuma ifya kukumbusuka ifingi nga nshi ku kucefyako ukumanama kwa bamunyinabo muli ifi fyalo. Ukuitemenwa ukusangwilako “ukukwata” kwabo “ukwingi” kuli bamunyinabo abalekabila kwalangilile ukutemwa kwabo.—2 Abena Korinti 8:8, 13-15, 24.

¹¹ Ukutemwa kulamoneka na lintu bamunyina mu fyalo ifingi balesangwilako ku mulimo wa makuule ya Mayanda ya Bufumu na ya Fiyanda fya Kulonganinamo mu fyalo ifipiina. Ica kumwenako tukwete ca ku Fishi fya Solomon. Nangu ca kutila kwali ifimfulunganya ifingi, bakasabankanya ba mu fishi fya Solomon balifulileko ukufika ku mapesenti 6 umwaka wapwile, kabili bonse pamo bafikile 1,697. Bapangile ukukuula Iciyanda ca Kulonganinamo. Nangula ca kuti abekala mushi abengi balefulumuka mu calo, ababomfi bakuitemenwa bafumine ku Australia ku kwaafwilishako ukukuula. Mu kupita kwa nshita, aba babomfi bakuitemenwa tabali no kubwelelamo ukufikila bakansha bamunyina bacikaya ifya kupwishishisha umufula. Inshimbi sha kwimikila ici ciyanda shafumine ku Australia, kabili ukupwisha ici cikuulwa ca kupepelamo—ilyo ifikuulwa ifingi fishele amapopa—kukaba bunte busuma kwi shina lya kwa Yehova na ku fyo bamunyina batemwana.

Ukupala Lesa, Twalitemwa Icalo

12. Tupashanya shani Yehova mu micitile yesu ukulosha ku bapepa kumbi?

¹² Bushe twatemwa fye ulupwa lwesu na bamunyina? Iyo, kano fye nga tatuli “abapashanya Lesa.” Yesu atile: “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Abena Efese 5:1; Yohane 3:16) Ukupala Yehova Lesa, twalitemwa bonse—ukusanshako fye na bapepa kumbi. (Luka 6:35, 36; Abena Galatia 6:10) Maka maka muli ulu lubali, tushimikila imbila nsuma iya Bufumu no kweba bambi ulwa kutemwa kukalamba ukwa kwa Lesa pa fyo ali no kubacitila. Ici kuti calenga onse uwakutika ukwisapusuka.—Marko 13:10; 1 Timote 4:16.

13, 14. Finshi bamunyina balangishe ukutemwa ku bashali Inte bakumenye na lintu ifintu fishabawamine?

¹³ Natumone ificita bapainiya baibela bane mu Nepal. Aba batuminwe ukubombela mu musumba wabela lwa ku kapinda ka ku kulyo na masamba aka cilya calo, kabili pa myaka isano iyapitapo, balilanga ukutemwa kwabo pa kutekanishisha abo bashimikila mu musumba ne mishi yapalama ku musumba. Pa kupwisha ukushimikila mu cifulo cabo ica kubombelamo, ilingi line benda amaawala ayengi pa ncinga ninshi na kukaba nase ukufika ku madigri 40. Ukutemwa kwabo no “kubombo busuma no mukoosha” kwafuminemo ifisuma lintu ibumba lye sambililo lya citabo lyapangilwe mu mushi umo. (Abena Roma 2:7) Mu March 2000, abantu 32 baishile ku kukutika ku lyashi lya cintubwingi ilyalandilwe no mutandashi kangalila wa muputule. Ku Nepal kwali ukufulilako kwa bakasabankanya ukufika kuli 430 uyu mwaka wapwile, ukwingilishiwako kwa mapesenti 9. Cilemoneka fye apabuuta ukuti Yehova alepaala ukupimpa kwa bamunyina no kutemwa balangisha muli cilya calo.

¹⁴ Ku Colombia bapainiya baibela aba pa kashita akanono baile balashimikila abena India betwa ati aba Wayuu. Pa kuti babashimikile, balingile ukusambilila ululimi lupya, lelo ukufwaisha kwabo ukwabamo ukutemwa kwalifuminemo icibwesha. Nelyo ca kutila imfula yalilokeshe, abantu 27 balisangilwe ku lyashi lya cintubwingi. Ukupimpa kwa kutemwa ukwalangilwe na ba bapainiya kwalengele ukuti kube ukwingilishiwako kwa mapesenti 5 mu Colombia no kulenga bakasabankanya ukufula ukufika kuli 107,613. Ku Denmark nkashi umukoloci alefwaya ukulashimikila imbila nsuma kuli bambi, lelo ali uwalemana. Ukwabula ukufuupulwa, alanshenye na balefwaya ukusambilila ukupitila mu kulemba bakalata. Pali ino nshita, atumishanya bakalata na bantu 42 kabili atungulula amasambililo ya Baibolo 11. Ali pali bakasabankanya balundilweko ukufika kuli 14,885 abashimikile muli uyu mwaka wapwile mu Denmark.

Temweni Abalwani Benu

15, 16. (a) Yesu atile tufwile ukutemwa bani? (b) Ni shani fintu bamunyina bashingamwa babombele mu nshila ya kutemwa na umo uwabepeeshe Inte sha kwa Yehova?

¹⁵ Yesu aebele umwaume wa Malango ukuti umwina Samaria kuti aba umubiye. Mu Lyashi lyakwe ilya pa Lupili, Yesu alundilepo no kuti: “Mwalyumfwo kuti casoselwe, aciti, Uletemwo munobe, no kupato mulwani obe. Lelo ine ndemweba, nati, Temweni abalwani benu, pepeleni abamulamata; ukuti mube abana ba kwa Shinwe uuli mu muulu.” (Mateo 5:43-45) Na lintu umo aletulwisha, tulesha ‘ukucimfisha ububi mu kucite cisuma.’ (Abena Roma 12:19-21) Nga cingacitika, tulalanshanya nankwe icikwatwa cesu icaumisha umutengo, e kuti icine.

¹⁶ Ku Ukraine icipande ca muli nyunshipepala ya Kremenchuk Herald calandile pa lwa Nte sha kwa Yehova ukuti kabungwe kabipa. Ici calibipile pantu ku Bulaya bamo e fyo balanda pa lwa Nte sha kwa Yehova pa kuti benganashanasha abantu ku kulesha nelyo ukubinda imilimo ya Nte sha kwa Yehova. Ico calengele ukuti kube ukuyamona kalemba no kumweba ukulungika ifyo alembele pa kubwekeshapo ukulemba icipande no kucisabankanya. Alisumine, lelo mu cipande abwekeshepo ukulemba, alembelemo ati ifyebo fyali mu cipande ca kubalilapo fyashimpilwe pa cine. Pali uyu mulandu bamunyina bashingamwa baile mumona na kabili no kumupeela ifyebo na fimbi. Lyene, kalemba aishileiluka ukuti icipande ca kubalilapo tacalungeme, kabili asabankenye icipande calungama. Ukubomba na o mu bufumacumi na mu cikuuku yali e nshila ya kutemwa iya kubombelamo uyu mulandu, kabili calengele ukuti ifintu fiwame.

Kuti Twalundulula Shani Ukutemwa?

17. Cinshi cilangilila ukuti te lyonse cingaba icayanguka ukubomba mu nshila ya kutemwa kuli bambi?

¹⁷ Ilyo umwana afyalwa, abafyashi bakwe balamutemwa palya pene fye. Ukubomba mu kutemwa na bakalamba te lyonse kwisa nga meno ya mu kanwa. Napamo e mulandu wine Baibolo itwebela imiku iingi ukuti tuletemwana pantu ukutemwa caba cintu ico tufwile ukulundulula. (1 Petro 1:22; 4:8; 1 Yohane 3:11) Yesu alishibe ukuti ukutemwa kwesu kukeshiwa ilyo atile tufwile ukwelela munyinefwe “ukufika ku miku cinelubali ukufushiwa ku makumi cinelubali.” (Mateo 18:21, 22) Paulo na o wine atukoseleshe ukuba “abashipikishanya.” (Abena Kolose 3:12, 13) E co twaebelwa no kuti: “Konkeni ukutemwa”! (1 Abena Korinti 14:1) Kuti twakukonka shani?

18. Cinshi cikatwaafwa ukutemwa bambi?

¹⁸ Ica ntanshi, tufwile lyonse ukulaibukisha ukutemwa twakwatila Yehova Lesa. Uku kutemwa e kutulenga ukutemwa na banensu. Mulandu nshi? Pantu lintu twacite fyo, tulangilila umusango wa muntu Shifwe wa ku muulu aba kabili cilamuletela ubukata ne lumbo. (Yohane 15:8-10; Abena Filipi 1:9-11) Ica bubili, kuti twaesha ukulamona ifintu nga fintu Yehova afimona. Lyonse ilyo twabembuka, tubembukila Yehova; lelo, lyonse alatulekelela no kutwalilila ukututemwa. (Amalumbo 86:5; 103:2, 3; 1 Yohane 1:9; 4:18) Nga twalamona ifintu nge fyo Yehova afimona, tukalemenena ku kutemwa bambi no kulekelela ifyo batubifya. (Mateo 6:12) Ica butatu, tukacitila bambi ifyo na ifwe twingatemwa batucitile. (Mateo 7:12) Apo fye tuli babembu, tukabila lyonse ukwelelwa. Ku ca kumwenako, ilyo twasosa amashiwi ya kukalifya bambi, tusubila ukuti bakebukisha ukuti bonse tulabembuka mu fyo tulanda mu nshita mu nshita. (Yakobo 3:2) Nga tulefwaya bambi baletucitila ifisuma, na ifwe tufwile ukubacitila ifyo fine.

19. Kuti twafwaya shani ukwaafwa kwa mupashi wa mushilo mu kulundulula ukutemwa?

¹⁹ Icalenga bune, kuti twalomba ukwaafwa kwa mupashi wa mushilo pantu ukutemwa cisabo ca mupashi. (Abena Galatia 5:22, 23) Caba ca cifyalilwa ukuba na bucibusa, ukutemwa aba mu lupwa, no kuba ne cintemwa. Lelo tulakabila ukwafwa kwa mupashi wa kwa Yehova pa kuba no kutemwa uko Yehova akwata, ukutemwa ukukakila fyonse pamo mu kwitabana. Kuti twasanga ukwaafwa kwa mupashi wa mushilo pa kulabelenga Baibolo wapuutwamo. Ku ca kumwenako, nga twasoma pa bumi bwa kwa Yesu, tukamona ifyo abombele na bantu, kabili kuti twasambilila ukumupashanya. (Yohane 13:34, 35; 15:12) Na kabili, kuti twalomba Yehova ukutupeelako umupashi wa mushilo, maka maka ilyo tuli mu mibele ingatwansha ukucitila bambi icisuma. (Luka 11:13) Ica kulekeleshako, kuti twasupila ukutemwa pa kuba mu cilonganino ca Bwina Kristu. Ukuba na bamunyina ne nkashi abakwata ukutemwa kulatwafwa ukulundulula ukutemwa.—Amapinda 13:20.

20, 21. Inte sha kwa Yehova balangile shani ukutemwa kwapulamo mu mwaka wa mulimo uwa 2000?

²⁰ Umwaka wapwile, bakasabankanya ba mbila nsuma balifulileko ukufika kuli 6,035,564 mwi sonde lyonse. Inte sha kwa Yehova shapoosele amaawala yonse pamo 1,171,270,425 mu kufwaya abantu ukubebako pa lwa mbila nsuma. Kutemwa kwabalengele ukushipikisha ukukaba, imfula, no kutalala ilyo baleya balebomba uyu mulimo. Kutemwa e kwabalengele ukushimikila ku bana be sukulu banabo na kubo babomba na bo incito no kuya mu kushimikila ku bantu abo bashaishiba abalepita mu musebo na ku ncende shimbi. Abengi abo Inte sha kwa Yehova shatandalile bali abashayangwako, abancepela balekana. Lelo, bamo balifwaile ukusambilila, ica kuti kwali no kubwelelamo imiku 433,454,049 kabili amasambililo ya Baibolo 4,766,631 yalitungulwilwe.a

²¹ Mwandini uku kwali kulangisha ukutemwa uko Inte sha kwa Yehova shakwatila Lesa wabo na banabo! Uko kutemwa takwakatale akupwa. Tuli abashininkisha ukuti mu mwaka wa mulimo uwa 2001 mukaba ukushimikila ubunte bwacilapo ku bantunse. Shi Yehova nalepaala lyonse bakapepa bakwe aba bucishinka kabili abapimpa ilyo ‘fyonse ifyo balecita, filecitilwa mu kutemwa’!—1 Abena Korinti 16:14.

[Futunoti]

Bushe Kuti Mwalondolola?

• Nani tupashanya nga twatemwa abanensu?

• Ni bani tufwile ukutemwa?

• Fya kukumanya nshi filangilila ukutemwa kwa Bwina Kristu?

• Kuti twalundulula shani ukutemwa kwa Bwina Kristu?

[Charti pe bula 18-21]

LIPOTI WA MWAKA WA MULIMO UWA 2000 UWA NTE SHA KWA YEHOVA MU CALO CONSE

(Moneni muli magazini)

[Ifikope pe bula 15]

Ukutemwa kwa Bwina Kristu kuti kwaikatanya ulupwa

[Ifikope pe bula 17]

Ukutemwa e kutulenga ukwebako bambi isubilo lyesu