Ifyo Ipepo lya We Shifwe Lipilibula Kuli Imwe

IPEPO lya We Shifwe, ilyo Yesu Kristu alandile mu Lyashi lya pa Lupili, muli Baibolo lisangwa muli Mateo icipandwa 6, ifikomo 9 ukufika ku 13. Ilyo fye ashilalanda ili pepo, Yesu atile: “Ilyo ulepepa, wilabwekeshapo ukusosa fimo fine, nge ficita abena fyalo, pantu bamona kwati kuti babomfwa nga basosa ifyebo ifingi.”—Mateo 6:7.

Cine cine, Yesu talepilibula ukuti Ipepo lya We Shifwe lifwile ukubwekeshiwabwekeshiwapo mu mashiwi yamo yene fye. Ca cine, Yesu alibwekeshepo ili pepo kwi bumba lya bantu limbi pa kuti na bo basambilileko. (Luka 11:2-4) Lelo amashiwi ye pepo lyaba mwi Landwe lya kwa Mateo yalipusanako panono na yaba muli Luka. Na kabili, mu kuya kwa nshita, ilyo Yesu na basambi bakwe balepepa, tabalebomfya amashiwi yalya yene fye ayaba mwi pepo lya kulangilila.

Lelo, nga cinshi Ipepo lya We Shifwe lyalembelwa muli Baibolo? Ukubomfya ili ipepo, Yesu aletulangilila ifyo amapepo yesu yafwile ukuba pa kuti yapokelelwe kuli Lesa. Muli ili pepo, tulasangamo na masuko ku mepusho ayakuma ubumi. Nomba natulande pa lubali lumo na lumo ulwe Pepo lya We Shifwe.

Bushe Lesa Nani Ishina?

“Shifwe wa mu muulu, ishina lyenu lishishiwe.” (Mateo 6:9) Aya mashiwi ya kwiswila aye pepo lya cilangililo yalatwafwa ukupalamina kuli Lesa ilyo tumwita ati “Shifwe.” Nga filya fine umwana umunono mu cifyalilwa fye apalamina ku mufyashi uwa kutemwa kabili uulangulukila, na ifwe kuti twapalama kuli Shifwe wa ku muulu ukucetekela ukuti alafwaya ukukutika kuli ifwe. Imfumu Davidi yaimbile ati, “Mwe bomfwo kupepa, kuli imwe abantunse bonse e ko besa.”—Amalumbo 65:2.

Yesu atusambilisha ukuti tulepepela ishina lya kwa Lesa ukushishiwa, nangula ukulipaatulako nge lya mushilo. Lelo bushe Lesa nani ishina? Baibolo yaasuka muli aya mashiwi yatila: “Imwe mweka, ishina lyenu Yehova, mwapulamo pano isonde ponse.” (Amalumbo 83:18) Bushe mwalitala amubelengapo ishina lya kuti Yehova muli Baibolo?

Na kuba, ishina lya kwa Lesa, Yehova, lilamoneka muli bamanyuskripiti ba kale aba Baibolo ukucila pa miku 7,000. Lelo, bakapilibula bamo balifika fye na ku cipimo ca kufumyamo ili shina mu maBaibolo ayo bapilibula. E ico, calilinga ukuti lyonse tulepepa ukuti Kabumba wesu ashishe ishina lyakwe nangula ukulilenga ukuba ilya mushilo. (Esekiele 36:23) Inshila imo iyo tulangilamo ukuti tulabomba ukulingana ne pepo ili, ni lintu tulebomfya ishina Yehova pa kupepa kuli Lesa.

Umwanakashi uwe shina lya Patricia, akushiwe mu Katolika kabili alishibe Ipepo lya We Shifwe. Bushe acitile shani ilyo Inte ya kwa Yehova imo yamulangile ishina lya kwa Lesa muli Baibolo? Abilikishe ukuti, “Nalifililwe ukusumina! E ico nafwaile muli Baibolo wandi, kabili na mo mwine e mo lyali. Lyena Nte anangile Mateo 6:9, 10 no kulondolola ukuti ishina lya kwa Lesa lyalikatana sana ne Pepo lya We Shifwe. Nalitemenwe cibi kabili namulombele ukuti ndesambilila nankwe Baibolo.”

Ukufwaya kwa kwa Lesa Kucitwe Pano Isonde

“Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:10) Bushe ulu lubali lwe pepo lya kwa Yesu lukafikilishiwa shani? Abantu abengi belenganya ukuti ku muulu cifulo ca mutende no mutelelwe. Amalembo yalosha ku myulu ukuti ‘bwikalo bwa mushilo ubwalumbuka’ ubwa kwa Yehova. (Esaya 63:15) E mulandu wine tupepela ukuti ukufwaya kwa kwa Lesa kucitwe pano isonde “nga mu muulu”! Lelo bushe ici cikatala acicitika?

Kasesema wa kwa Yehova Daniele asobele ukuti: “Lesa wa mu muulu akemyo bufumu ubushakonaulwe umuyayaya, no bufumu bwa buko tabwakashiilwe ku bantu bambi; bukashonaula no kupesha aya mabufumu [ya pe sonde] yonse, kabili bukeminina umuyayaya.” (Daniele 2:44) Ubu Bufumu bwa ku muulu, nelyo ubuteko, nomba line bukacitapo cimo ku kuleta umutende wa mwi sonde lyonse ukupitila mu kuteka kwalungama.—2 Petro 3:13.

Ukupepela Ubufumu bwa kwa Lesa ukuti bwise no kuti ukufwaya kwakwe kucitwe pano isonde yaba ni nshila tulangilamo icitetekelo icishakatulenge insoni. Umutumwa wa Bwina Kristu Yohane alembele ati: “Naumfwile ishiwi likalamba ukufuma ku cipuna ca bufumu lileti: ‘Moneni! Ihema lya kwa Lesa lili pamo na bantunse, kabili akekala pamo na bo, kabili bakaba abantu bakwe. Na Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.’” Lyene Yohane alundileko ati, “Kabili Uwaikala pa cipuna ca bufumu atile: . . . ‘Lemba, pantu ifi fyebo fya cishinka kabili fya cine.’”—Ukusokolola 21:3-5.

Ukupepela Ifyo Tukabila ku Mubili

Ifyo Yesu alandile mwi pepo lya cilangililo fyalangilile ukuti ilyo tulepepa, ifyo tufwile ukusakamana intanshi fifwile ukukuma ishina lya kwa Lesa no kufwaya kwakwe. Lelo, ipepo lya cilangililo lyalanda na pa fya pa lwesu ifyo tulomba mu nshila isuma kuli Yehova.

Ica ntanshi pali ifi citila: “Tupeeleni leelo ica kulya cesu ica buno bushiku.” (Mateo 6:11) Uku, te kulomba kwa kuti tukwate ifyuma. Yesu aletukoselesha ukupepela “ica kulya cesu ica leelo ukulingana no kukabila kwesu.” (Luka 11:3) Nga fintu Ipepo lya We Shifwe lilangilila, kuti twapepa ne citetekelo ukuti Lesa aletupeela ifyo tukabila cila bushiku nga ca kuti twalimutemwa kabili tulamumfwila.

Amasakamika yacilamo aya mu mikalile kuti yatulenga twalekelesha ukukabila kwesu ukwa fya ku mupashi kabili kuti twafilwa ukucita ifyo Lesa enekela ukuti tucite. Lelo nga ca kuti ukupepa Lesa e ko twabika intanshi mu bumi, kuti twacetekela ukuti nga twalomba ifyo tukabila, pamo nga ifya kulya ne fya kufwala, Lesa akakutika ipepo lyesu. Yesu atile: “Mulefwaya intanshi ubufumu no bulungami [bwa kwa Lesa], na fyonse ifi fimbi fikalundwako kuli imwe.” (Mateo 6:26-33) Tacayanguka ukufwaya ubulungami bwa kwa Lesa, pantu ifwe bonse tuli babembu kabili tulakabila ukwelelwa. (Abena Roma 5:12) Uyu mulandu na o, walilandwapo mwi Pepo lya We Shifwe.

Ukupepela Ukwelelwa

“Tulekeleleni imisha yesu, nge fyo na ifwe twalekelela abatukwatile misha.” (Mateo 6:12) Mu calembwa ca kwa Luka pa lwe Pepo lya We Shifwe, iyi “imisha” yapilibulwa ati “imembu.” (Luka 11:4) Bushe Yehova Lesa cine cine kuti atwelela imembu shesu?

Nangula Davidi Imfumu ya Israele wa ku kale acitile imembu ishikalamba, alilapiile kabili alicetekele pa kupepa ukuti: “Imwe, mwe Shikulu, muli basuma, mulekelela abamufwaya, kabili mwafulo luse kuli bonse abalilila kuli imwe.” (Amalumbo 86:5) Ayo mashiwi kwena ya kusansamusha! Shifwe wa ku muulu ‘alalekelela’ imembu sha balapila abalilila kuli wena. Filya fine inkongole shingafuutwa umupwilapo, e fyo na Yehova Lesa engalekelela imembu shesu shonse.

Lelo, Yesu alandile ukuti tufwile ukucitapo cimo pa kuti imembu shesu shilekelelwe kuli Lesa. Atile: Pa kuti Lesa atwelele, tufwile ukwelela bambi. (Mateo 6:14, 15) Nangula umuntu walungama Yobo acitilwe ifibi ku banankwe batatu, alibalekelele kabinge alibapepeleko. (Yobo 42:10) Nga twaelela abatubifya, tukasekesha Lesa kabili tukanonkelamo mu luse lwakwe.

Ukuipeelesha kwa kwa Lesa ukumfwa ukulomba kwesu kufwile ukutucincisha ukulomba ukusenamina kwakwe. Kabili kuti twacita ico nangula tatwapwililika. (Mateo 26:41) Apa na po, Yehova kuti atwafwa, nga fintu fye Yesu alangilile ilyo asondwelele ipepo lya cilangililo no kulomba kwacindama.

Ukupepa Ukuti Atwafwe Ukucite Calungama

“Mwitutwala mu kutunkwa, lelo tupokololeni ku mubifi.” (Mateo 6:13) Yehova tatulekelesha ukuti tuwile mu matunko nelyo ukutulenga ukubembuka. Icebo cakwe citila: “Lesa te kuti eshiwe ku bubi, kabili umwine tesha muntu iyo.” (Yakobo 1:13) Lesa alasuminisha ukuti tule-eshiwa, na lyo line kuti atupokolola kuli Katunka Mukalamba e kuti, “umubifi” uwitwa Satana Kaseebanya.

Umutumwa Petro akoseleshe Abena Kristu banankwe ati: “Beni abalola, cenjeleni. Icibambe cenu, Kaseebanya, endauka nge nkalamo iilebuluma, iilefwaya untu ingalya.” (1 Petro 5:8) Na kuba, Satana aeseshe no kutunka Yesu Kristu umuntu wapwililika! Cinshi Kaseebanya alefwaisha? Alefwaisha ukupumbula Yesu ukumufumya ku kupepa kwa cine ukwa kwa Yehova Lesa. (Mateo 4:1-11) E ico nga mufwaisha ukubombela Lesa, Satana aiminina pa kumupumbula na imwe bene!

Ukubomfya icalo calaala mu maka yakwe, Kaseebanya kuti atutunka ukuti tulecitako ifintu ifyo Lesa apata. (1 Yohane 5:19) E ico kanshi calicindama ukuti cila nshita tulelomba Lesa ukutwafwa, sana sana ilyo tuletunkwa cila nshita. Na kabili nga twalapepa Yehova nga fintu Baibolo, Icebo cakwe icaputwamo cisosa, akatupususha ukupitila mu kutwafwa ukukaana Kaseebanya. Baibolo itwebo kuti: “Wa cishinka Lesa, kabili takamuleke ukweshiwa ukucila pa fyo mwingashipikisha.”—1 Abena Korinti 10:13.

Ukutetekela Lesa Kwalicindama

Cilatusansamusha ukwishiba ukuti Shifwe wa ku muulu alitutemwa bonse umo umo! Alengele no Mwana wakwe, Yesu Kristu, ukutusambilisha ifya kupepa. E mulandu wine tufwaila ukutemwina Yehova Lesa. Lelo bushe kuti twamutemuna shani?

Baibolo itila: “Ukwabula icitetekelo te kuti [Lesa] ateemunwe, pantu uupalamina kuli Lesa afwile ukusumina ukuti e ko aba no kuti aba kalambula wa bamufwaisha.” (AbaHebere 11:6) Bushe icitetekelo ca musango yo kuti twacikwata shani? Baibolo itila, “Icitetekelo cifuma ku caumfwika.” (Abena Roma 10:17) Inte sha kwa Yehova baliitemenwa ukulanshanya pa fyaba mu Baibolo na bonse abafwaisha ukubombela Lesa mu citetekelo cine cine.

Tulecetekela ukuti ifi fyebo pa lwe Pepo lya We Shifwe nafimulenga ukwishibilapo na fimbi pa fyo lipilibula. Ilyo mulelundako ukwishiba Yehova ne fyo akalambula “abamufwaisha,” kuti mwakosha icitetekelo cenu muli Lesa. Shi sambililenipo na fimbi pali wena na pa fyo afwaya ukucita pa kuti mube na bucibusa bwapalamisha na Shinwe wa ku muulu ku ciyayaya.—Yohane 17:3.

[Amashiwi pe bula 5]

“Shifwe wa mu muulu, ishina lyenu lishishiwe. Ubufumu bwenu bwise. Ukufwaya kwenu kucitwe pano isonde nga mu muulu. Tupeeleni leelo ica kulya cesu ica buno bushiku; kabili tulekeleleni imisha yesu, nge fyo na ifwe twalekelela abatukwatile misha. Kabili mwitutwala mu kutunkwa, lelo tupokololeni ku mubifi.”—Mateo 6:9-13

[Icikope pe bula 7]

Yehova alapeela abamutemwa ifyo bakabila

[Icikope pe bula 7]

Lesa kabili alatwafwa ukukaana Kaseebanya

[Icikope pe bula 7]

Ukupala Yobo, nga twalekelela bambi abatubifya, kuti twanonkelamo mu luse lwa kwa Lesa