“Tusambilisheni Ukupepa”

“Umo uwa mu basambi bakwe atile kuli wene, Mwe Shikulu, tusambilisheni ukupepa.”—LUKA 11:1.

1-3. (a) Mulandu nshi abasambi ba kwa Yesu bafwaile amakambisho ye pepo? (b) Fipusho nshi pa lwe pepo fimako?

ABANTU bamo balipeelwa ica bupe ce shiwi lisuma ilya kwimba. Bambi balikwata amaka ya cifyalilwa nga bakemba ba nyimbo. Lelo pa kufika pa maka yabo ayenekelwa ayasumbukisha, nelyo fye ni aba bakemba na bakalisha ba filimba balakabila amakambisho. Cili icapalana ne pepo. Abasambi ba kwa Yesu Kristu baishile ku kumwensekesho kuti balekabila amakambisho nga ca kuti Lesa aali no kumfwa amapepo yabo.

² Yesu ilingi line aile kuli Wishi lwa pa mbali mwi pepo, kwati fintu acitile ubushiku bonse pa ntanshi ya kusala abatumwa 12. (Luka 6:12-16) Nangu cingati acincishe na kabili abasambi bakwe ukupepa lwa pa mbali, bamumfwile alepepa pa cintubwingi no kumono kuti taali nga ba bumbimunda ba butotelo abapepele ku kumonwa ku bantu. (Mateo 6:5, 6) Mu kubamo amano, lyene, abakonshi ba kwa Yesu bafwaishe amakambisho yalundwako pe pepo. Muli ifyo, tubelengo kuti: “Awe cali ifyo, wene alepepo muntu mumo; ilyo alekele, umo uwa mu basambi bakwe atile kuli wene, Mwe Shikulu, tusambilisheni ukupepa, ifyo na Yohane [Kabatisha] asambilishe abasambi bakwe.”—Luka 11:1.

³ Ni shani fintu Yesu ayankwileko? Cinshi twingasambilila ukufuma ku ca kumwenako cakwe? Kabili ni shani fintu twingamwenamo ukufuma ku makambisho yakwe ye pepo?

Amasambililo kuli Ifwe

 4. Mulandu nshi tulingile ‘ukupepa no kukanaleka,’ kabili cinshi cipilibula ukucite fyo?

⁴ Kuti twasambilila ifingi ukufuma ku mashiwi ya kwa Yesu ne ca kumwenako ngo muntu we pepo. Isambililo limo lili lya kuti nga ca kuti Umwana wa kwa Lesa uwapwililika akabile ukupepa lyonse, abasambi bakwe abashapwililika balikwata ukukabila kwacilishapo bukulu ukwa kulolesha kuli Lesa mu kutwalilila ku kutungulula, ukusansamusha, no kukosha kwa ku mupashi. E ico, tulingile ‘ukupepa no kukanaleka.’ (1 Abena Tesalonika 5:17) Kwena, ici tacilepilibula ukuti tufwile lyonse ukufukama mu cine cine. Ukucila, tulingile mu kutwalilila ukukwata imibele yabamo ipepo. Tulingile ukulolesha kuli Lesa ku kutungululwa mu mbali shonse isha bumi pa kuti twingabomba mu kuba no kushilimuka kabili lyonse ukukwata ukusuminisha kwakwe.—Amapinda 15:24.

 5. Cinshi pambi cingafimbilikisha inshita tulingile ukupeelesha kwi pepo, kabili cinshi tulingile ukucita pa lwa ici?

⁵ Muli ishi “nshiku sha kulekelesha,” ifintu ifingi kuti fyafimbilikisha inshita tulingile ukubomfya mwi pepo. (2 Timote 3:1) Lelo nga ca kuti ukusakamikwa kwa pa ŋanda, ukusakamana kwa fya makwebo, ne fyapalako filepumfyanya ipepo lya lyonse kuli Shifwe wa mu mulu, ninshi tuli abafinininwa mu kucishamo na masakamika ya bwikashi buno. Imibele ya musango uyo ifwile ukulungikwa ukwabulo kushingashinga, pantu ukufilwa ukupepa kutungulula ku kulufya kwa citetekelo. Atemwa tulingile ukucefyako ukukakililwako kwesu ukwa ku mubili nelyo ukulinganya ukusakamana kwa bumi no kwalwila kwacilapo mukoosha kabili ukwabwekeshiwabwekeshiwapo ukwa mutima wesu kuli Lesa ku kutungululwa. Tulingile ukuba ‘abasakamana mu kupepa.’—1 Petro 4:7.

 6. Lipepo nshi twalabebeta nomba, kabili mu kuba na buyo nshi?

⁶ Muli ico caitwa ipepo lya cilangililo, Yesu asambilishe abasambi bakwe ifya kupepa, te fya kusosa mu cine cine. Ubulondoloshi bwalembwa ubwa kwa Luka bupusana mu nshila imo ukufuma kuli bulya ubwa kwa Mateo pantu utushita twapusana twalibimbilwemo. Tuli no kubebeta ili pepo nge ca kulinganyako ca musango wa mapepo yesu nga bakonshi ba kwa Yesu ne Nte sha kwa Yehova.

Shifwe ne Shina Lyakwe

 7. Ni bani bakwate shuko lya kulanda kuli Yehova nga “Shifwe”?

⁷ “Shifwe wa mu mulu.” (Mateo 6:9; Luka 11:2) Apantu Yehova ni Kabumba wa mutundu wa muntu kabili ekala mu bufumu bwa mu mulu, cili icalinga ukulanda kuli wene nga “Shifwe wa mu mulu.” (1 Ishamfumu 8:49; Imilimo 17:24, 28) Ukubomfya kwa numbwilo ‘wesu’ kusumina ukuti bambi na bo bene balikwata ukwampana kwapalamisha na Lesa. Lelo ni bani bakwata ishuko lishapeleshiwa ilya kulanda kuli wene nga Shibo? Bantu umo umo beka abaipeela, ababatishiwa mu lupwa lwakwe ulwa bakapepa. Ukwita Yehova “Shifwe” kulangilila ukuti twalikwata icitetekelo muli Lesa kabili tumwensekesha ukuti icishinte fye ceka ica kuwikishanya na wene cili kupokelela kwakumanina ukwe lambo lya cilubula ilya kwa Yesu.—AbaHebere 4:14-16; 11:6.

 8. Mulandu nshi tulingile ukufulukisha ukupoosa inshita mwi pepo kuli Yehova?

⁸ Fintu tulingile ukuyumfwa abapalamina kuli Shifwe wa mu mulu! Pamo nga bana abashinaka ukuya kuli shibo, tulingile ukufuluka ukupoosa inshita mwi pepo kuli Lesa. Ukutasha kwashika ku mapaalo yakwe aya ku mupashi na ku mubili kulingile ukutusesesha ku kutootela wene pa busuma bwakwe. Tulingile ukuyumfwa abakongamina ku kutwala kuli wene ifisendo ifitufininina, ukuba abacetekela ukuti akatukosha. (Ilumbo 55:22) Kuti twaba abashininkisha ukuti nga ca kuti tuli aba busumino, icili conse mu kupelako cikabomba bwino pantu alatusakamana.—1 Petro 5:6, 7.

 9. Ipepo lya kushishiwa kwe shina lya kwa Lesa lili kulomba cinshi?

⁹ “Ishina lyenu libelwe akatiina.” (Mateo 6:10; Luka 11:2) Ishiwi “ishina” inshita shimo lilangilila umuntu umwine, kabili “ukubela akatiina” kupilibula “ukulenga ica mushilo, ukucipaatula nelyo ukucimona nge cashila.” (Linganyeniko Ukusokolola 3:4.) Mu kupalako, lyene, ipepo ku kushishiwa kwe shina lya kwa Lesa cili kulomba ukuti Yehova abombe ku kuishisha umwine. Shani? Pa kufumyapo umuseebanya onse uwabala autulaikwa pe shina lyakwe. (Ilumbo 135:13) Ukufika kuli iyo mpela, Lesa akafumyapo ububifi, ukuikusha, no kuleke nko ukwishibo kuti ni Yehova. (Esekiele 36:23; 38:23) Nga ca kuti tulafulukisha ukumona bulya bushiku kabili mu cituntulu tulatesekesha ubukata bwa kwa Yehova, lyonse tukamutununuka mu mupashi wa kucindikisha uwalangililwa na mashiwi ya kuti “ishina lyenu libelwe akatiina.”

Ubufumu bwa kwa Lesa no Kufwaya Kwakwe

10. Cinshi cipilibulwa lintu twapepela Ubufumu bwa kwa Lesa ukwisa?

¹⁰ “Ubufumu bwenu bwise.” (Mateo 6:10; Luka 11:2) Ubufumu bwapilibulwa pano mitekele ya bumulobwe iya kwa Yehova, nga fintu yalumbululwa ukupitila muli kamfulumende ya buMesia iya ku mulu mu maboko ya kwa Yesu Kristu na “bashila” bakwe ababishanya nankwe. (Daniele 7:13, 14, 18, 27; Esaya 9:6, 7; 11:1-5) Cinshi capilibulwa ku kupepela bwene ‘ukwisa’? Ici cilepilibulo kuti twipushe ukuti Ubufumu bwa kwa Lesa bwise ku kulwisha bakakaanya bonse aba mitekele ya bulesa aba pe sonde. Pa numa Ubufumu ‘bwashonaula no kupesha yonse amabufumu ya pe sonde,’ bukalwila isonde muli paradise wa cibulungwa conse.—Daniele 2:44; Luka 23:43.

11. Nga ca kuti tufuluka ukumona ukufwaya kwa kwa Yehova kwacitwa ukupulinkana ukubumbwa konse, cinshi tukacita?

¹¹ “Ukufwaya kwenu kucitwe pano nse nga mu mulu.” (Mateo 6:10) Uku kuli kulomba kwa kuti Lesa apwishishishe imifwaile yakwe ukulola kwi sonde, icisanshamo ukufumyapo abalwani bakwe. (Ilumbo 83:9-18; 135:6-10) Na kuba, cilangilila ukuti tufuluka ukumona ukufwaya kwa bulesa kwacitwa ukupulinkana ukubumbwa konse. Nga ca kuti ico cili mu mutima wesu, lyonse tukacita ukufwaya kwa kwa Yehova ukufika apapela amaka yesu. Te kuti tube na maka ya kucita mu kufumaluka ukulomba kwa musango uyo nga ca kuti tatwatukwite mu mukoosha ukukwata ukufwaya kwa kwa Lesa ukucitwa mu mulandu wesu wine. Nga ca kuti tulepepa muli iyi nshila, lyene, tulingile ukushininkisha ukuti tatulecita ifintu mu kupusanako no ko kufwaya, pamo ngo kulansha uushasumina nelyo ukupokelela inshila sha ku calo. (1 Abena Korinti 7:39; 1 Yohane 2:15-17) Ukucila, tulingile lyonse ukukwata mu muntontonkanya itontonkanyo lya kuti, ‘Cinshi cili e kufwaya kwa kwa Yehova muli uyu mulandu?’ Ee, nga ca kuti twalitemwa Lesa no mutima wesu onse, tukafwaya ubutungulushi bwakwe mu milandu yonse iya bumi.—Mateo 22:37.

Ica Kulya Cesu Ca Bukaca

12. Ukulomba ‘ica kulya ca bukaca’ epela kwakwata kusonga nshi ukusuma pali ifwe?

¹² “Tupeeleni lelo ica kulya cesu ca bukaca.” (Mateo 6:11) Ubulondoloshi bwalembwa ubwa kwa Luka bubelengwa ukuti: “Tupeni akasuba na ʼkasuba ica kulya cesu ca bukaca.” (Luka 11:3) Ukwipusha Lesa ukupayanya ica kulya cakabilwa “lelo” kutwala pa ntanshi icitetekelo mu maka yakwe aya kusakamana ukukabila kwesu ubushiku no bushiku. Abena Israele baali no kulonganika mana “umo umo ubwingi bwakwe ubwa bushiku mu bushiku bwa buko,” te bwa mulungu nelyo ukucilapo. (Ukufuma 16:4, NW) Ili talili lipepo lya fya maliila no kupayanya kwacishamo lelo ku kukabila kwesu ukwa cila bushiku ilyo kwaimako. Ukulomba ica kulya ca cila bushiku epela na kabili kulatwaafwa ukukanaba abafunuka.—1 Abena Korinti 6:9, 10.

13. (a) Mu mano yasalala, cinshi capilibulwa ku kwipusha ica kulya ca bukaca? (b) Cinshi cilingile ukuba e mibele yesu, nelyo fye nga ca kuti twabomba na maka kabili twakwata ifyakumanina panono pa kutwalilila abomi?

¹³ Mu mano yasalala, ukwipusha ica kulya ca cila bushiku kulangilila ukuti tatuyumfwa aba kuikalila lelo mu kutwalilila tulolesha kuli Lesa ku ca kulya, ica kunwa, ifya kufwala, ne fikabilwa fimbi. Nge filundwa fyaipeela ifya lupwa lwakwe ulwa bakapepa, twatetekela Shifwe lelo tatwikala muli bumbokoya pa kulolela wene ukutupayanishisha mu cipesha amano. Tulabomba no kubomfya icili conse cintu tukwete ku kusange ca kulya ne fikabilwa fimbi. Nalyo line, mu kulungama tutootela Lesa mwi pepo pantu tumona ku numa ya uku kupayanya ukutemwa, amano, na maka ifya kwa Shifwe wa mu mulu. (Imilimo 14:15-17; linganyeniko Luka 22:19.) Umukoosha wesu kuti pambi wafumamo ulubanda. Lelo nelyo fye cingati twabomba na maka kabili twakwata ifyakumanina panono, lekeni tube aba kutasha kabili abaikushiwa. (Abena Filipi 4:12; 1 Timote 6:6-8) Na kuba, umuntu wa bukapepa uwakwata imiliile yalinga ne fya kufwala kuti pambi abo wakwatishe nsansa ukucila bamo abali no lubanda lwa fimoneka. E co nelyo fye nga ca kuti natukwata finono pa mulandu wa mibele iicilile pa kulama kwesu, twipopomenwa. Kuti nalyo line twaba abakankaala lwa ku mupashi. Mu cine cine, tatulekabila ukuba abapiina mu citetekelo, isubilo, no kutemwa kwa kuli Yehova, ku o ukulumbanya kwesu no kutootela finina mwi pepo lya kuyumfwa kwa ku mutima.

Ukutulekelela Imisha Yesu

14. Ni pa misha nshi twipusho kulekelelwa, kabili cinshi Lesa abomfya kuli yene?

¹⁴ “Tulekeleleni imisha yesu, ifyo na ifwe twalekelela abatuliile misha.” (Mateo 6:12) Ubulondoloshi bwalembwa ubwa kwa Luka bulango kuti ilya misha ni membu. (Luka 11:4) Ukubembuka kwapyanwa kulatucilikila ukucita ifintu fyonse umwabela ukufwaya kwa kwa Shifwe ukwapwililika. Mu mano yamo, kanshi, uku kupelebela kwaliba misha yesu, nelyo ukukakililwako kuli Lesa, apantu twatampile ‘ukuba aba mweo no kwendela mu Mupashi.’ (Abena Galatia 5:16-25; linganyeniko Abena Roma 7:21-25.) Twalikwata iyi misha pantu twaliba abashapwililika kabili te kuti nomba tulinge mu kukumanina ku fipimo fya kwa Lesa. Ni ku kulekelelwa kwa ishi membu twakwate shuko lya kupepela. Mu nsansa, Lesa kuti abomfya insambu she lambo lya cilubula ilya kwa Yesu kuli iyi misha, nelyo imembu.—Abena Roma 5:8; 6:23

15. Mibele nshi tulingile ukukwata ukulola ku kusalapula kwakabilwa?

¹⁵ Nga ca kuti twenekela Lesa ukulekelela imisha yesu, nelyo imembu, tufwile ukuba abalapila kabili abaitemenwa ukupokelela ukusalapula. (Amapinda 28:13; Imilimo 3:19) Pa mulandu wa kuti Yehova alitutemwa, alatupeela ukusalapula kuntu tukabila pa lwesu pa kuti twingalungika amabunake yesu. (Amapinda 6:23; AbaHebere 12:4-6) Kuti twaba aba nsansa, kwena, nga ca kuti ukukula mu citetekelo no kwishiba kwasanga umutima wesu uli mu kumfwana kwakumanina nga nshi na mafunde ya kwa Lesa ne fishinte ica kuti tatwesha ukubembuka nelyo fye panono ku mumbo. Lelo ni shani nga ca kuti twailuka umumbo umo mu ncitilo yesu iyalubana? Lyene tulingile mu kushika ukukalipwa kabili tufwile mu mukoosha ukupepela ukulekelelwa. (AbaHebere 10:26-31) Ukubomfya ukufunda kuntu twapokelela, tulingile ukulungika inshila yesu mu kwangufyanya.

16. Mulandu nshi cili ica bunonshi ukutwalilila ukwipusha Lesa ukulekelela imembu shesu?

¹⁶ Ukwipusha lyonse Lesa ukulekelela imembu shesu kwa bunonshi. Ukucite ci kusungilila ukubembuka kwesu pa ntanshi yesu kabili kufwile ukukwata ukusonga kwa kuicefya. (Ilumbo 51:3, 4, 7) Tulekabila ukukwata Shifwe wa mu mulu “[ukutulekelele] imembu, no kutusangulula ku kuulungana konse.” (1 Yohane 1:8, 9) Ukulundako, ukulumbula imembu shesu mwi pepo kulatwaafwa ukutwalilila ukulwisha shene na maka. Muli ifyo tulacinkulwako mu kutwalilila ulwa kukabila kwesu ukwa cilubula ne nsambu ya mulopa wasumiwa uwa kwa Yesu.—1 Yohane 2:1, 2; Ukusokolola 7:9, 14.

17. Ni shani fintu ukupepela ukulekelelwa kutwafwilisha mu kwampana kwesu na bambi?

¹⁷ Ukupepela ukulekelelwa na kabili kulatwafwilisha ukuba aba nkumbu, aba congwe, kabili bakapekape ukulola kuli abo pambi bengatuliila imisha mu milandu ikalamba ne inono. Ubulondoloshi bwalembwa ubwa kwa Luka busoso kuti: “Tulekeleleni na ku membu shesu, pantu na ifwe bene tulekelela onse uwatuliile misha.” (Luka 11:4) Na kuba, kuti twakwata ukulekelelwa ukufuma kuli Lesa lyeka fye nga ca kuti kale kale ‘twalilekelela abatuliile misha,’ abantu abatubembukila. (Mateo 6:12; Marko 11:25) Yesu alundileko kuti: “Pantu nga mwalekelela abantu amampuulu yabo, Shinwe wa mu mulu akalekelela na imwe; lelo nga tamulekelela abantu amampuulu yabo, Shinwe takalekelele amampuulu yenu.” (Mateo 6:14, 15) Ukupepela ukulekelelwa kwa membu shesu kulingile ukutusesesha ku kushipikisha kuli bambi no kubalekelela. Umutumwa Paulo alembele ukuti: “Ifyo [Yehova, NW] amubelelo uluse, e fyo na imwe mubelele uluse.”—Abena Kolose 3:13; Abena Efese 4:32.

Ukweshiwa no Mubifi

18. Mulandu nshi tatulingile ukwesha ukupeela Lesa umulandu ku kweshiwa kwesu ne fya kwesha?

¹⁸ “Mwitutwala mu kweshiwa.” (Mateo 6:13; Luka 11:4) Aya mashiwi tayalangilila ukuti Yehova alatwesha ku kucito lubembu. Amalembo inshita shimo yalanda ulwa kucita kwa kwa Lesa nelyo ukulenga ifintu ifyo asuminisha fye. (Ruti 1:20, 21; linganyeniko Lukala Milandu 11:5.) Lelo “Lesa tatunkwa ku bubi, kabili tatunka muntu iyo,” e fyalembele umusambi Yakobo. (Yakobo 1:13) E ico, twiesha ukupeela umulandu Shifwe wa mu mulu ku kweshiwa ne fya kwesha ku fintu fibi, pantu Satana e Katunka uwesha ukutwalwila mu kubembukila Lesa.—Mateo 4:3; 1 Abena Tesalonika 3:5.

19. Ni shani fintu pambi twingapepa ukulosha ku kweshiwa?

¹⁹ Ku kulomba kwa kuti, “Mwitutwala mu kweshiwa,” mu kupalako twipusha Yehova ukukanatusuminisha ukunakilako lintu twaeshiwa nelyo ukutitikishiwa ukukanamumfwila. Kuti twapapata Shifwe ukutungulula intampulo shesu pa kuti takuli ukweshiwa ukukesa mu nshila yesu ukuli ukwacishamo kutapata kuli ifwe. Muli kuno kuloshako, Paulo alembele ukuti: “Ica kwesha tacamusanga kano ica buntuuntu fye; lelo wa cishinka Lesa, uushakamuleke ukweshiwa ukucila muli ico mwinganasha; lelo pamo ne ca kwesha akacita na ʼpa kufuminamo, ukuti mube na ʼmaka ya kucishipikishako.” (1 Abena Korinti 10:13) Kuti twapepa ukuti Yehova atutungulule pa kuti tatweshiwe ukucila pa co twinganasha no kuti apayanye inshila ya kufyukilamo lintu twalungulushiwa apakalamba nga nshi. Ukweshiwa kufuma kuli Ciwa, umubili wesu uwa lubembu, na mabunake ya bambi, lelo Shifwe wakwato kutemwa kuti atutungulula pa kuti tatucimfiwe.

20. Mulandu nshi uwa kupepela ukupokololwa ukufuma ku “mubifi”?

²⁰ “Lelo mutupokolole ku [mubifi].” (Mateo 6:13) Lesa mu kushininkisha kuti acilikila Satana, ‘umubifi,’ ku kutucimfya. (2 Petro 2:9) Kabili takwatala akubako ukukabila kwakulisha ku kupokolola ukufuma kuli Ciwa ukucila nomba, pantu ‘ali ne cipyu cikalamba, pa kwishibo kuti inshita yakwe inono.’ (Ukusokolola 12:12) Tatwaluba amapange ya kwa Satana, kabili na o wine tali uushaibukila ulwa mabunake yesu. E ico, tulekabila ukupepa ukuti Yehova atutalushe ku fiteyo fya Cibambe capale nkalamo. (2 Abena Korinti 2:11: 1 Petro 5:8, 9; linganyeniko Ilumbo 141:8, 9.) Ku ca kumwenako, nga ca kuti tuli abasekelela mu kuupa nelyo ukuupwa, kuti pambi twakabila ukwipusha Yehova ukutupokolola ukufuma ku mapange ya kwa Satana na ku kweshiwa ku kukusha ukwampana kwa ku calo ukwingatungulula kuli bucisenene nelyo ku kukanaumfwila Lesa pa kuupa uushasumina. (Amalango 7:3, 4; 1 Abena Korinti 7:39) Bushe tulafuluke cuma? Lyene ipepo kuti pambi lyakabilwa ku kutwaafwa ukucincintila ukweshiwa ku kuteye njuka nelyo ukubelesho bucenjeshi. Pa kufwaisha ukonaula ukwampana kwesu na Yehova, Satana akabomfya icilwilo conse icaba mu butala bwa fyanso fya kwesha. E co shi natupepe mu kutwalilila kuli Shifwe wa mu mulu, uushilekelesha uwalungama ku kweshiwa kabili uupayanya ukupokolola ukufuma ku mubifi.

Ipepo Lilakuula Icitetekelo ne Subilo

21. Ni shani fintu twanonkelamo ukufuma ku kupepela Ubufumu bwa kwa Lesa?

²¹ Shifwe wa mu mulu, uutupokolola ukufuma ku mubifi, acankilwa mu kutupaala mu kupaka. Nalyo line, mulandu nshi pa nshita yalepe fyo asuminisha abantu bakwe abatemwikwa ukupepo kuti, “Ubufumu bwenu bwise”? Cisuma, ukucila pa myaka, ukupepa muli iyi nshila kwalingilishako ukufwaisha kwesu no kutesekesha kwa Bufumu. Ipepo lya musango uyo litucinkulako ulwa kukabila kukalamba kuli iyi kamfulumende ya ku mulu iya kunonsha. Na kabili lisunga pa ntanshi yesu isubilo lya bumi pe samba lya kuteka kwa Bufumu.—Ukusokolola 21:1-5.

22. Cinshi cilingile ukuba e mibele yesu iyatwalilila ukulola kwi pepo kuli Shifwe wa mu mulu, Yehova?

²² Ipepo ukwabulo kutwishika lilakuula icitetekelo muli Yehova. Icikakilo cesu na wene cilakoshiwa lintu ayasuka amapepo yesu. E ico, twiesha ukunaka ukwalukila kuli wene cila bushiku mu kuba no kulumbanya, ukutootela, no kupapata. Kabili shi natube aba kutasha ku kwankulako kwabamo kwaafwa ukwa kwa Yesu ku kulomba kwa bakonshi bakwe ukwa kuti: “Mwe Shikulu, tusambilisheni ukupepa.”

Bushe Uleibukisha?

◻ Masambililo nshi twingasambilila ukufuma ku mashiwi ya kwa Yesu ne ca kumwenako ngo muntu we pepo?

◻ Cinshi tulingile ukupepela ukulosha kuli Shifwe wa mu mulu ne shina lyakwe?

◻ Cinshi tulelomba lintu twapepela Ubufumu bwa kwa Lesa ukwisa no kufwaya kwakwe ukucitwa pe sonde?

◻ Tuleipusha cinshi lintu tulepepela ica kulya cesu ca bukaca?

◻ Cinshi cipilibulwa lintu twapepela ukulekelelwa kwa misha yesu?

◻ Mulandu nshi cili icakatama ukupepa ukulosha ku kweshiwa no kupokololwa ukufuma kuli Satana, umubifi?

[Icikope pe bula 16]

Abakonshi ba kwa Yesu bamwipwishe ukubasambilisha ifya kupepa. Bushe nawishiba ifyo twinganonkelamo ukufuma ku makambisho yakwe aye pepo?