3. Kukambisha nshi pa lwa kupingula kuntu Yesu apeela mu kukonkapo mu Lyashi lya pa Lupili?

³ Ilyo Yesu atwalilile Ilyashi lyakwe ilya pa Lupili, ifyebo fyafulilako fyalitulamene ifyo Abena Kristu bafwile ukuibikilishako ukukonka. Pano pali cimo icimoneka icayanguka, lelo cisenuka kumo ukwa kukongama kwacilishapo kwafya ukufumyapo: “Mwipingula, ukuti mwipingulwa: pantu ku bupingushi ubo mupingula mukapingwilwako; kabili mu cilingilo ico mulingilamo e mo mukalingilwa. Nga cinshi ulolesesha aka kutobola akali mu linso lya kwa munonko, lelo icipampa icili mu linso lyobe taucimona? Napamo wingatila shani kuli munonko, auti, Leka mfumye aka kutobola akali mu linso lyobe; kabili mona, mu linso lyobe muli icipampa. We wa bumbimunda we, ubale ufumye icipampa mu linso lyobe, e lyo walamwensekesha ukufumya aka kutobola mu linso lya kwa munonko.”—Mateo 7:1-5.

5. Mulandu nshi cabele cayangukishe fyo ukumona impuso muli bambi ukucila isho ishili muli ifwe bene?

⁵ Mu kati ka mwanda wa myaka wa kubalilapo C.E., pa mulandu wa fishilano fya pa kanwa, abaFarise mu cinkumbawile bakongamine ku kupingula bambi mu kukaluka. Abaali bonse aba muli bakakutika ba kwa Yesu abaali mu cibelesho ca kucite co baali no kuleka cene. Calibe cacilapo kwanguka nga nshi ukumona utwa kutobola mu menso ya bambi ukucila ifipampa mu yesu yene—no kucilapo kwebekesha nga nshi kuli bukaitemwe bwesu! Nga fintu umuntu umo asosele ukuti, “nalitemwa ukulengulula bambi pantu cilanenga ukuyumfwa bwino nga nshi!” Ukushimaula bambi lyonse kuti pambi kwatupeela ukuyumfwa kwa bulumba ubumoneka ukufuuta ifilubo fyesu fine ifyo tulefwaya ukufisa. Lelo nga ca kuti ukulungika kwabo kwakabilwa, kulingile ukupeelwa no mutima wanakilila. Uulepeela ukulungika alingile lyonse ukubo waibukila ulwa kupelebela kwakwe kwine.—Abena Galatia 6:1.

6. Ni pa cishinte nshi amapingushi yesu, lintu yaba ayakabilwa, yalingile ukucitilwa, kabili kwaafwa nshi tulingile ukufwaya pa kuti tatubele abacishamo kulengulula?

⁶ Yesu taishile ku kupingule calo lelo ku kucipususha. Amapingushi ayali yonse yantu acitile tayali yakwe lelo yashimpilwe pa fyebo fintu Lesa amupeele ukulanda. (Yohane 12:47-50) Amapingushi ayali yonse yantu twacita yalingile na yo yene ukuba mu kumfwana ne Cebo ca kwa Lesa. Tufwile ukunyanyantila ukongama kwa buntunse ku kuba aba kupingula. Mu kucite ci, tulingile mu mukoosha ukupepela ukwaafwa kwa kwa Yehova: “Lombeni, kabili cilepeelwa kuli imwe; fwayeni, kabili mulesanga; kunkunsheni, kabili kuleiswilwako kuli imwe; pantu onse uulomba alapeelwa, no ufwaya alasanga, no ukunkunsha aleswilwako.” (Mateo 7:7, 8) Nelyo fye ni Yesu atile: “Ine nshingacita kantu neka; ifyo ŋumfwa kuli Tata e fyo mpingula, no bupingushi bwandi bwalilungama; pantu nshifwaya kufwaya kwandi, lelo ukufwaya kwa wantumine.”—Yohane 5:30.