Ifyo Imipepele ya Bufi Ilenga Abantu Basumina Ifya Bufi Pali Lesa

Apo Lesa kutemwa, cinshi imipepele iitila ilamwimininako icitila ifyabipa ifingi? Kuti twatila ni co iyi imipepele ya bufi. Ifyo intungulushi sha muli iyi imipepele shilanda ne fyo shicita filenga abantu basumina ifya bufi pali Lesa. Finshi balanda no kucita ifilenga abantu basumina ifya bufi pali Lesa? Bushe Lesa omfwa shani pali ifi bacita? Kabili cinshi akacitapo?

1. Bushe ifyo imipepele ya bufi isambilisha filenga shani abantu basumina ifya bufi pali Lesa?

Imipepele ya bufi yasalapo “ukusumina ifya bufi ukucila ukusumina icine.” (Abena Roma 1:25) Ku ca kumwenako, intungulushi sha mapepo ishingi tashisambilisha abo shitungulula ishina lya kwa Lesa. Lelo Baibo itila tufwile ukulabomfya ishina lya kwa Lesa. (Abena Roma 10:13, 14) Nga kwacitika ifyabipa, intungulushi sha mapepo shimo shitila kufwaya kwa kwa Lesa. Lelo ubu bufi. Lesa te ulenga ifyabipa filecitika. (Belengeni Yakobo 1:13.) Ku ca bulanda, ubufi ubo intungulushi sha mapepo shibepa bwalilenga cakosela abantu ukutemwa Lesa.

2. Bushe ifyo intungulushi sha mapepo shicita filenga shani abantu basumina ifya bufi pali Lesa?

Ifyo imipepele ya bufi isunga abantu fyalipusana ne fyo Yehova abasunga. Baibo itila “imembu [sha mipepele ya bufi] nashituulumana ukufika fye na ku muulu.” (Ukusokolola 18:5) Pa myaka iingi, imipepele ilaitumpa mu fikansa fya calo, ilatungilila inkondo, kabili ilalenga nelyo ukusuminisha ukuti abantu abengi nga nshi bafwe. Intungulushi sha mapepo shimo shilafwaya ukunonka, kabili ici cilenga shile-eba abo shitungulula ukuti baleshipeela indalama. Ifi shicita filanga fye apabuuta tuutu ukuti tashaishiba Lesa, kabili tashalinga no kumwimininako.—Belengeni 1 Yohane 4:8.

3. Bushe Lesa omfwa shani pa fyo imipepele ya bufi icita?

Nga ca kuti ifyo imipepele ya bufi icita filamukalifya, bushe muletontonkanya ukuti Yehova ena omfwa shani? Yehova alitemwa abantu, kanshi tomfwa bwino pa fyo intungulushi sha mapepo shimuseebanya na pa fyo shicusha abo shitungulula. Alilaya ukuti imipepele ya bufi ikonaulwa kabili ‘tayakatale aimoneka na kabili.’ (Ukusokolola 18:21) Nomba line fye, Lesa ali no konaula imipepele yonse iya bufi.—Ukusokolola 18:8.

SAMBILILENI NA FIMBI

4. Te mipepele yonse iyo Lesa atemwa

Abantu abengi basumina ukuti imipepele yaba kwati ni nshila ishalekanalekana, lelo shonse shitwala kuli Lesa. Nomba bushe ici ca cine? Belengeni Mateo 7:13, 14, lyena lanshanyeni ici cipusho:

• Finshi Baibo ilanda pa musebo uwaya ku bumi?

Tambeni VIDIO, lyena lanshanyeni icipusho cakonkapo.

VIDIO: Bushe Lesa Alitemwa Imipepele Yonse?—Iyo Baipifya (3:22)

• Bushe Baibo ilanda ukuti Lesa alitemwa imipepele yonse?

5. Mu mipepele ya bufi tamwaba ukutemwa nga filya Lesa aba no kutemwa

Imipepele yaliseebanya Lesa mu nshila ishingi. Inshila imo iyabipa sana iyo imipepele iseebanishishamo Lesa, kuitumpa mu nkondo. Pa kuti mumone fimo ifyo imipepele yacitile, tambeni VIDIO. Lyena lanshanyeni amepusho yakonkapo.

VIDIO: Ifyo Amacalici Yacitile Ilyo kwali Inkondo ya Calo iya Bubili (2:22)

• Finshi amacalici ayengi yacitile ilyo kwali Inkondo ya Calo iya Bubili?

• Mwaumfwa shani pa fyo amacalici yacitile?

Belengeni Yohane 13:34, 35 na 17:16. Lyena lanshanyeni aya mepusho:

• Bushe Yehova omfwa shani nga ca kuti imipepele yaitumpa mu nkondo?

• Imipepele ya bufi e yalenga ifyabipa ifingi ificitika. Finshi fimo ifyo mwamona ifilanga ukuti mu mipepele ya bufi tamwaba ukutemwa nga filya Lesa aba no kutemwa?

6. Lesa afwaya ukwafwa abantu pa kuti bafume mu mipepele ya bufi

Belengeni Ukusokolola 18:4,a lyena lanshanyeni ici cipusho:

• Bushe mwaumfwa shani ifi mwaishiba ukuti Lesa alafwaya ukwafwa abantu abo balufya ku mipepele ya bufi?

7. Twalilileni ukusambilila pali Lesa wa cine

Bushe ifyabipa ifyo imipepele ya bufi icita fifwile ukulenga mwaleka ukusambilila pali Lesa? Tontonkanyeni pa mwana umwaume uushilefwaya ukumfwila amafunde ayasuma ayo bawishi bamupeela. Uyu mwana afuma pa ng’anda no kutendeka ukucita ifyabipa. Lelo bawishi tabatemenwe ifyo alecita. Bushe kuti caba fye bwino ukupeela bawishi umulandu ukuti e balengele umwana asalepo ukulacita ifyabipa?

• Bushe kuti caba fye bwino ukupeela Lesa umulandu no kuleka ukusambilila pali ena pa mulandu ne fyo imipepele ya bufi icita?

IFYO MUSAMBILILE

Imipepele ya bufi ilalenga abantu basumina ifya bufi pali Lesa, pantu ilasambilisha ifya bufi kabili ilacita ifyabipa. Lesa akonaula imipepele ya bufi.

Ukupitulukamo

• Mwaumfwa shani pa fyo imipepele ya bufi isambilisha ne fyo icita?

• Bushe Yehova omfwa shani pa fyo imipepele ya bufi icita?

• Finshi Lesa akacita ku mipepele ya bufi?

ISHIBILENIPO NA FIMBI

Moneni ifintu fibili ifyo imipepele iingi icita ifikalifya Lesa.

“Bushe Imipepele Yonse Yaba Fye Cimo Cine? Bushe Yonse Ilalenga Twapalama Kuli Lesa?” (Icipande ca pa jw.org)

Cinshi Yehova afwaila tulemupepela capamo na bantu banensu?

“Bushe Calicindama Ukuba mu Cilonganino ca Mapepo?” (Icipande ca pa jw.org)

Shimapepo umo tatemenwe ifyalecitika uko alepepa. Lelo ifi tafyalengele aleka ukusambilila pali Lesa wa cine.

“Ico Umupatili Afumine Uko Alepepa” (Loleni!, February 2015)

Pa myaka iingi, imipepele ilabepa ubufi ubulenga cilemoneka kwati Lesa tatusakamana kabili munkalwe. Sambilileni icine pa fintu fitatu ifyo imipepele yabepa.

“Mulandu Nshi Abantu Bamo Cibafisha Ukutemwa Lesa?” (Ulupungu lwa kwa Kalinda, November 1, 2013)