Ifyo Mwingeshibilako Abena Kristu ba Cine

Abantu abengi baita ukuti Bena Kristu, lelo ifyo basuminamo fyalipusana, kabili ifyo bakonka mu mikalile na fyo fyalipusana. Nomba finshi twingeshibilako Abena Kristu ba cine?

1. Bushe Abena Kristu ni bani?

Abena Kristu basambi ba kwa Yesu Kristu nelyo abamukonka. (Belengeni Imilimo 11:26.) Bushe balanga shani ukuti basambi ba kwa Yesu? Yesu atile: “Nga mwatwalilila ukukonka ifyo nanda, ninshi ca cine muli basambi bandi.” (Yohane 8:31) Kanshi Abena Kristu ba cine bafwile ukulakonka ifyo Yesu alesambilisha. Na kabili, nga filya fine Yesu alebomfya Amalembo pa kusambilisha, Abena Kristu ba cine nabo babomfya Baibo pa kusambilisha.—Belengeni Luka 24:27.

2. Bushe Abena Kristu ba cine balanga shani ukuti balitemwana?

Yesu aebele abasambi bakwe ukuti: “Muletemwana nga ifi fine ine namutemwa.” (Yohane 15:12) Bushe Yesu alangile shani ukuti alitemenwe abasambi bakwe? Aleba pamo nabo, alebakoselesha, kabili alebafwa. Na kabili alibafwilile no kubafwila. (1 Yohane 3:16) Ifi fine e fyo na Bena Kristu ba cine bacita. Tabalanda fye ukuti balitemwana, lelo ifyo balanda ne fyo bacita filanga ukuti balitemwana.

3. Mulimo nshi Abena Kristu ba cine babomba?

Yesu alipeele abasambi bakwe umulimo. “Abatumine mu kubila pa Bufumu bwa kwa Lesa.” (Luka 9:2) Abena Kristu abaliko mu nshiku sha batumwa tabalebila fye imbila nsuma pa fifulo balepepelapo, lelo balebila na mu fifulo fimbi umwaleba abantu abengi e lyo na pa mayanda ya bantu. (Belengeni Imilimo 5:42; 17:17.) Abena Kristu ba cine nabo muno nshiku balasambilisha abantu icine icaba mu Baibo konse uko babasanga. Apo balitemwa abantu, balaitemenwa ukubomfya inshita yabo na maka ukuya mu kusambilisha abantu ifyaba mu Baibo ifilenga basansamuka no kuba ne subilo.—Marko 12:31.

SAMBILILENI NA FIMBI

4. Balafwaya ukwishiba icine icaba mu Baibo

Abantu bamo abatila Bena Kristu bamona ukuti tacacindama ukwishiba ifyaba mu Baibo no kulafikonka. Tambeni VIDIO, lyena lanshanyeni icipusho cakonkapo.

VIDIO: Fimo Ifyo Amacalici ya Batila Bena Kristu Yacitile (5:11)

• Finshi amacalici yamo aya batila Bena Kristu yacitile ifyalengele abantu bafilwe ukwishiba ifyo Yesu alesambilisha?

Yesu alesambilisha icine icaba mu Cebo ca kwa Lesa. Belengeni Yohane 18:37, lyena lanshanyeni ici cipusho:

• Ukulingana ne fyo Yesu alandile, cinshi twingeshibilako Abena Kristu ‘abakonka icine’?

5. Balasambilisha abantu icine icaba mu Baibo

Ilyo Yesu ashilabwelelamo ku muulu, alipeele abasambi bakwe umulimo uo batwalilila ukubomba ukufika na muno nshiku. Belengeni Mateo 28:19, 20 na Imilimo 1:8, lyena lanshanyeni ici cipusho:

• Kufika lilali abasambi ba kwa Yesu bali no kubila imbila nsuma, kabili ni kwi bali no kufika?

6. Balacita ifyo basambilisha

Cinshi calengele ba Tom bashininkishe ukuti balisangile ukupepa kwa cine? Tambeni VIDIO, lyena lanshanyeni amepusho yakonkapo.

VIDIO: Nalilekele Ukuya ku Mapepo (5:20)

• Cinshi calengele ba Tom basuule ifilonganino fya mapepo?

• Cinshi calenga bashininkishe ukuti balisanga ukupepa kwa cine?

Ifyo tucita fyalicindama sana ukucila ifyo tulanda. Belengeni Mateo 7:21, lyena lanshanyeni ici cipusho:

• Finshi Yesu abikako sana amano, bushe fintu tulanda ukuti e fyo twasuminamo nelyo fintu tucita?

7. Balitemwana

Bushe Abena Kristu ba cine balaibika mu kapoosa mweo pa kuti bafwe Abena Kristu banabo? Tambeni VIDIO, lyena lanshanyeni amepusho yakonkapo.

VIDIO: Bali-ipeelesha Ukufwila Munyinabo (2:55)

• Cinshi calengele ba Lloyd baipeeleshe ukufwila munyinefwe Johansson?

• Ifi ba Lloyd bacitile, bushe te fyo Umwina Kristu wa cine afwile ukucita?

• Bushe abasambi ba kwa Yesu, e kutila Abena Kristu ba cine, bafwile ukulamona shani abantu abo bapusana nabo inkanda, nangu abafuma ku calo cimbi?

• Kuti balanga shani ukuti balitemwa abo bapusana nabo inkanda nelyo abafuma ku calo cimbi ilyo kuli inkondo?

IFYO MUSAMBILILE

Abena Kristu ba cine balakonka ifyo Baibo isambilisha, balitemwana sana, kabili balasambilisha abantu icine icaba mu Baibo.

Ukupitulukamo

• Bushe ifyo Abena Kristu ba cine basuminamo fyafuma kwi?

• Mibele nshi twingeshibilako Abena Kristu ba cine?

• Mulimo nshi Abena Kristu ba cine babomba?

ISHIBILENIPO NA FIMBI

Sambilileni na fimbi pe bumba lya bantu abesha na maka ukukonka ifyo Yesu alesambilisha ne fyo alecita.

Bushe Inte sha kwa Yehova ni Bani? (1:13)

Belengeni ifyo cali pa kuti abali ba sista ba ku Katolika basange “ulupwa lwa ku mupashi ulwa cine.”

“Balebelenga Baibolo pa Kwasuka Amepusho Yonse!” (Ulupungu lwa kwa Kalinda, April 1, 2014)

Moneni ifyo Abena Kristu ba cine balanga ukutemwa ku bo bapepa nabo abalekabila ubwafwilisho.

Ifyo Twingafwilisha Aba Bwananyina nga Baponenwa no Busanso Ubukalamba—Iyo Baipifya (3:57)

Moneni ifyo Abena Kristu aba mu nshiku sha batumwa balecita, ifyo na Bena Kristu ba cine muno nshiku bacita, ifyo twingeshibilako abasambi ba kwa Yesu.

“Finshi Mwingeshibilako Abena Kristu ba Cine?” (Ulupungu lwa kwa Kalinda, March 1, 2012)