Tufwile Ukukaana Ifya Kutunka

BUSHE umuntu alikwebapo ukucita icintu cabipa?— Bushe akwebele ukuti nga walikosa walacicita? Nelyo bushe alandile ati kuti cawama ukucicita kabili te kuti cibe icabipa?— Lintu umuntu acite fi kuli ifwe, ninshi aletutunka.

Cinshi tufwile ukucita ilyo baletutunka? Bushe tufwile ukukonkelela no kucita icabipa?— Ico kuti cakalifya Yehova Lesa. Lelo bushe walishiba uwingatemwa?— Ee, ni Satana Kaseebanya.

Satana mulwani wa kwa Lesa, kabili Satana mulwani wesu. Teti tumumone pantu mupashi. Lelo ena kuti atumona. Bushiku bumo Kaseebanya alandile na Yesu, Kasambilisha Mukalamba, no kwesha ukumutunka. Leka tumone ifyo Yesu acitile. Lyene tuli no kwishiba ica kucita ilyo baletutunka.

Yesu lyonse alefwaya ukucita ukufwaya kwa kwa Lesa. Alangile ci ku bantu pa kubatishiwa mu Mumana wa Yordani. Satana aeseshe ukutunka Yesu lintu fye abatishiwe. Baibolo ilanda ati ‘umuulu wacenamine’ Yesu. (Mateo 3:16) Ici kuti capilibula ukuti Yesu nomba atendeke ukwibukisha fyonse pa lwa bumi bwakwe ilyo ali ku muulu na Lesa.

Ilyo abatishiwe, Yesu aile mu mpanga ku kutontonkanya pa fintu atendeke ukwibukisha. Inshiku 40 shalipitile. Inshita yonse iyi Yesu talelya nangu cimo, e co ali ne nsala nomba. Cali ni pali iyi nshita Satana aeseshe ukutunka Yesu.

Kaseebanya alandile ati: “Nga uli Mwana wa kwa Lesa, webe ukuti aya mabwe yabe umukate.” Kwena umukate nga waliweme ukulya! Lelo bushe Yesu nga alisangwile amabwe ukuba umukate?— Ee. Mulandu nshi? Pantu Yesu, Umwana wa kwa Lesa, akwete amaka yaibela.

Bushe Kaseebanya akweba ukusangula amabwe ukuba umukate bushe nga walicitile co?— Yesu ali ne nsala. Bushe nga tacali fye bwino ukucite co umuku fye umo?— Yesu alishibe ati teti ciwame ukubomfya amaka yakwe muli iyo nshila. Yehova amupeele ayo maka ku kuleta abantu kuli Lesa, te kuyabomfya ku mwine.

E co, ukucila ukucite co, Yesu aebele Satana ifyalembwa mu Baibolo ati: “Te ku cilyo ceka umuntu ekalila no mweo, lelo ku cebo conse icifuma ku kanwa ka kwa Lesa.” Yesu alishibe ukuti ukucita ifisekesha Yehova kwalicindamapo ukucila ukulya.

Lelo Kaseebanya alyeseshe na kabili. Asendele Yesu ku Yerusalemu no kumwimika pa muulu we tempele. Lyena Satana alandile ati: ‘Nga uli mwana wa kwa Lesa, uiponye pa nshi; pantu calembwa aciti, bamalaika ba kwa Lesa bakakwanka tawakaicene.’

Mulandu nshi Satana alandile fi?— Alandile fi pa kutunka Yesu ukucita icintu ca buwelewele. Lelo na kabili Yesu taumfwilile Satana. Aebele Satana ati: “Calembwa, aciti, Wilaesha Sokulu Lesa obe.” Yesu alishibe ukuti cali icabipa ukwesha Yehova pa kwangasha ubumi.

Na lyo line, Satana talekele. Nomba asendele Yesu pa lupili ulutali sana. Palya amulangile amabufumu yonse, nelyo amabuteko, ya calo ne fyo yacindama. Lyena Satana aebele Yesu ati: “Ndekupeela fyonse ifi nga wawa wampepa.”

Tontonkanya pa fyo Kaseebanya alefwaya ukupeela Yesu. Bushe aya mabufumu yonse, nelyo amabuteko ya bantu, yali ya kwa Satana?— Kwena, Yesu takeene ukuti tayali ya kwa Satana. Nga tayali ya kwa Satana, Yesu nga alilandile fyo. Satana e kateka wa fyalo fyonse ifya pe sonde. Baibolo imwita no kuti “kateka wa pano isonde.”—Yohane 12:31.

Kuti wacita shani nga Kaseebanya akulaya ukukupeela icintu nga wamupepa?— Yesu alishibe ukuti tacali bwino ukupepa Kaseebanya te mulandu ne fyo Engapeelwa. E co Yesu alandile ati: ‘Fuma apa, we Satana: Pantu Baibolo ilanda ati Yehova Lesa obe e o ulepepa no kuti wene eka e o ufwile ukubombela.’—Mateo 4:1-10; Luka 4:1-13.

Na ifwe limo kulaba ifya kututunka. Bushe walishibako fimo?— Pano pali ica kumwenako. Banoko kuti bapanga keke nelyo ukwipika ifisuma. Kuti bakweba ati walalya lintu inshita ya ca kulya yafika. Lelo kuti naumfwa sana insala, e co kuti watunkwa ukulyako. Bushe walaumfwila banoko?— Satana tafwaya ulebomfwila.

Ibukisha Yesu. Na o wine ali ne nsala sana. Lelo alishibe ukuti ukusekesha Lesa kwalicindama ukucila ukulya. Ukalanga ukuti waba nga Yesu lintu wacita ico banoko balanda.

Abana bambi kuti bakweba ukunwako imiti imo. Kuti bakweba ati iyi miti ili no kukulenga ukumfwa bwino. Lelo limbi iyi miti kuti yaba miti ikola. Kuti yakulwalika no kukwipaya fye. Nelyo umuntu kuti akupeela fwaka, iyo yakwatamo imiti iikola, no kukweba ati nga walikosa walapeepako. Cinshi ukacita?—

Ibukisha Yesu. Satana alefwaya ukuti Yesu aleangasha ubumi bwakwe pa kumweba ukutoloka ukufuma pe tempele. Lelo Yesu tacitile co. Cinshi ukacita lintu umuntu akweba ati nga walikosa walacita icintu cingakuletelela?— Yesu taumfwilile Satana. Na iwe taufwile ukumfwila uuli onse uulekutunka ukucite fintu fyabipa.

Bushiku bumo napamo bakakweba ukupepa icimpashanya, icintu Baibolo yakaanya ukucita. (Ukufuma 20:4, 5) Kuti caba ni mu kusefya kwa pa sukulu. Kuti bakweba ati tawakulaya ku sukulu nga wakaana ukucita ici cintu. Cinshi ukacita?—

Calyanguka ukucite calungama nga bonse e co balecita. Lelo ukucite calungama kuti kwakosa nga bambi balefwaya tucite cabipa. Kuti balanda ati ifyo balecita tafyabipa sana. Lelo icipusho cacindama ca kuti, Cinshi Lesa alanda pali ico cintu? E waishiba bwino.

E ico te mulandu ne fyo bambi balanda, tatufwile ukucita ifintu ifyo Lesa alanda ati fyalibipa. Muli iyo nshila lyonse tukalasansamusha Lesa, kabili tatwakasekeshe Kaseebanya.