“Tube Abafuule Cifinine Conse”

“Naliba uwa bulanda kabili uwafuupulwa,” e fyalilishike Mary. Ukulosha ku cipe ca fishingamo fya Bwina Kristu, uyu mwanakashi wa Bwina Kristu alundilepo ukuti: “Ndamona ifibusa balekumanya ukufunshika. Na ine wine ndayumfwa ukunaka no kukanshika.

Napaapaata njafweni ukumfwikisha umulandu.”

BUSHE na iwe wine ulayumfwe fyo waba pe samba lya kukanshika, uwanakisha ica kuti teti usakamane mu kukumanina ifishingamo fyobe ifya teokratiki? Bushe inshita shimo cimoneka ukuti ubutumikishi bwa Bwina Kristu cipe cafina, icisendo cishingasendwa? Abena Kristu ba busumino abengi balapita mu fiputulwa fya nshita ifya kufuupulwa, pantu lyonse tulashingulukwa na maka yapusanako ayo ayenganasha ubuseko bwesu. Ukuba Umwina Kristu wine wine ilelo mu cituntulu caba kusonsomba. Muli fyo, pa nshita shimo bamo kuti baumfwa ukuti ubutumikishi bwa Bwina Kristu bwaba cipe cafina.

Ukufwaya Icilenga

Amalembo yacilenga ukumfwika ukuti Yehova tabika ukupinda kushabamo kupelulula pali ifwe. Umutumwa Yohane asosele ukuti “amafunde [ya kwa Lesa] tayayafisha.” (1 Yohane 5:3) Yesu mu kupalako aebele abakonshi bakwe ukuti: “Sendeni ikoli lyandi no kusambilila kuli ine, pa kuti ndi wafuuka kabili uwapetama umutima; e lyo mwalasango kutusha ku mitima yenu; pantu ikoli lyandi lyalyanguka, ne cisendo candi calipepuka.” (Mateo 11:29, 30) Mu kulengama tacili kufwaya kwa kwa Yehova ukuti tufinininwe ne fisendo fyafina nelyo ukutwikwa ifipe mu mulimo wesu kuli wene.

Ni shani, lyene, pambi Umwina Kristu wa busumino engamona ifishingamo fyakwe ifya Bwina Kristu pamo nge cisendo cafina? Mu kupalako, ifya kusangwilako fyafulilako fyalibimbwamo. Mona aya mashiwi ya mutumwa Paulo aya kuti: “Tube abafuule cifinine conse . . . , tubutuke no mukoosha ulubilo ulwabikilwa ifwe.” (AbaHebere 12:1) Amashiwi ya kwa Paulo yalangilila ukuti Umwina Kristu pa nshita shimo kuti aitwika ifipe fishakabilwa. Ici kwena tacibimbamo imembu shabipisha. Lelo Umwina Kristu kuti pambi apanga impuso mu bupingushi isho shipikanya mu kubipisha ubumi bwakwe, ukucipanga icaansha nga nshi kuli wene ukubutuka ulubilo ulwabikilwa ifwe.

Imimwene Yashikatala iya Fintu fya ku Mubili

Buula, ku ca kumwenako, umulandu wa ncito ya ku mubili. Mu fyalo ifingi, imibele ya fya bunonshi kuti pambi yasha Abena Kristu ukwabula umwa kusengulwila kano fye ukubomba amaawala ayengi. Ilingi line, nangu ni fyo, abantu babomba fye pa kuti bakwate ifyacilapo nelyo ukutuulika ifya maliila. Ukupitila mu kupimununa cipya cipya ukukabila kwabo ukwa cine cine, Abena Kristu bamo balicisanga icabamo amano ukupanga ukuteuluka mu mibele yabo iya ncito. Ifi e fyo cali kuli Debbie no mulume wakwe, bonse babili abali ni Nte sha kwa Yehova. Asosa ukuti: “Imibele yesu iya mu fya ndalama yalyalwike, kabili takwaliko ukukabila kwa cine cine kuli ine ukutwalilila ukubomba inshita yonse. Lelo cali icakosa ukuleka.” Mu kwangufyanya atendeke ukumfwa ukutitikisha kwa kukwata ifya kucita ifingi. Alondolola ukuti: “Icibelushi e bushiku fye bwalubuka nakwete ku kubomba umulimo wa pa ŋanda. Ilingi line nshaleyumfwa uwa kufumina mu mulimo wa mwi bala. Nayumfwile uwabipilwa pa lwa ici, kabili kampingu yandi yalencusha, nalyo line nalitemenwe incito yandi! Mu kupelako, naali no kulolenkana ne ca cine cine. Kwaliko fye ukupikulula kumo. Nalilekele incito.” Ca cine, ukuteulula kwa musango yo ukukalamba te kuti pambi kucitikeko kuli bambi. Nangu cibe fyo, ukubebeta kwasakamanisha ukwa kutantika kwa ncito yobe kuti pambi kwasokolola ukukabila kwa kwaluka kumo.

Kuti pambi kwabako inshila shimbi isha kuilululako fwe bene ifisendo fishakabilwa. Ni shani pa lwa kucefyako ukukonkanya kwa nyendo sha musamwe, imibombele ya fyangalo, nelyo ifya kusekesha fimbi—ukusanshako inshita ipooswa ukutamba televisioni? Kabili nelyo fye ni pa numa ya kufika pa kushikatala kwafwaikwa muli ishi ncende, ukuteulula kwatwalilila kuti pambi kwafwaikwa ku kusungilila ukushikatala kwa musango yo.

Ukupelulula Kwaliba Ukwakatama

Ukupelulula mu milandu ya musango yo kukatwaafwa ukuteulukila ku mibele ipya ilyo yaimako. Muli fyo, kuti twasungilila imimwene yashininkishiwa iya butumikishi bwesu.—Abena Efese 5:15-17; Abena Filipi 4:5.

Bushe ulaisanga we mwine pe samba lya kutitikisha ku kwendela pamo na cintu bambi bacita mu mulimo wa kwa Lesa? Ici na co kuti calundako isakamika no kufulunganishiwa ku bumi bobe. Ilintu ica kumwenako cisuma ica bambi kuti mu kukanatwishika cakukoselesha ukucita ifyafulilako, ukupelulula kukakwaafwa ukwimika amabuyo yashininkishiwa mu kumfwana ne mibele na maka. Amalembo yatwebo kuti: “Umuntu onse alinge umulimo wakwe wine, e lyo akaba na pa kutakishisha ku mwine eka, na ku mubiye iyo. Pantu umuntu onse ali no kusende cipe cakwe umwine.”—Abena Galatia 6:4, 5.

Imyata ya cikaya ne fishilano na fyo fine kuti fyalundako ku fisendo fyesu. Mu kasuba ka kwa Yesu abantu balifunshike ukufuma ku kwesha ukubaka amafunde ya butotelo ne fishilano ifyaimikwe na bantu. Ilelo, abantu ba kwa Yehova balilubulwa ukufuma ku kupepa kwa bufi ukwa fishilano. (Linganyeniko Yohane 8:32.) Nalyo line, Umwina Kristu kuti afimbilikishiwa mu kucishamo ne myata ya cikaya. Ku ca kumwenako, inshita shimo ifya kuponako pamo nga amenga filashingulukwa ne myata iyafulisha. Iyi myata te kuti pambi ibe iyalubana, kabili kuti nelyo fye pambi yaba iya kale lelo iya kusekesha. Nangu cibe fyo, Abena Kristu te kuti pambi bakwate inshita nelyo indalama ku kubaka ifintu fyonse ifya musango yo, kabili ukutukuta ukucite fyo kuti kwalundako ku fisendo fishalinga.

Languluka icacitike lintu Yesu atandalile umwanakashi we shina lya Marita. Ukucila ukunonkelamo mu kukumanina ukufuma ku mano ya bulesa, “Marita [aletabataba] ku kupyungila ukwingi.” Alifinininwe ne fintu ifingi. (Luka 10:40) Lelo Yesu mu cikuuku atubulwile fyo kuti pambi ayangushako amapekanyo yakwe aya ca kulya pa kuti anonkelemo ukufuma ku kusambilisha kwakwe. (Luka 10:41, 42) Ici cilangilila bwino ukuti ubupingushi no kupelulula fikakwaafwa mu kufika pa kushikatala kusuma mu butumikishi bobe ubwa Bwina Kristu.—Yakobo 3:17.

Ubupingushi busuma nabo bwine bulakabilwa lintu ulesala ifibusa fyobe. Amapinda 27:3 yasoka ukuti: “Ilibwe lyalifina, umusensenga walinyoma, lelo ukusonsomba kwa muwelewele kwafino kucila fyonse fibili.” Lyonse fye, abo ubishanya nabo abapalamisha bakakwata ukusonga kwakosa pa nshila yobe iya kutontonkanya. Ukutwalilila ukwendela pamo na abo abasanga bwangu icilubo no kulengulula bambi mu cilonganino kuti pambi kwabyala imbuto sha kufuupula no kutontonkanya kwapusanako muli iwe. (1 Abena Korinti 15:33) Nga wailuka ukuti ici cili ni mpika, ukwaluka kwabamo amano mu kubishanya wakwata kuti kwayangusha icisendo cobe.

Enda Bufuke Bufuke na Lesa

Pali Mika 6:8, tusanga ici cipusho ca kubimbula itontonkanyo: “Cinshi cimbi ico Yehova alefwaya kuli iwe, kano . . . kwenda bufuke bufuke na Lesa obe?” Ubufuuke bwalondololwa pamo nga ukwishiba umwa kupelela mwa umo. Abo abashishiba umwa kupelela mwabo kuti bailenga abene ukucimfiwa ne fya kucita ifingi. Ici calicitika ku Bena Kristu bakosoka, nelyo fye bakangalila, ukufumamo ukufuupulwa, ukufulunganishiwa, no kulufya kwa buseko. Kenneth, eluda wa Bwina Kristu, asumine ukuti: “Naimwene ne mwine ndeingila mu kupopomenwa, kabili nasosele ukuti, ‘Nshasuminishe ici ukucitika.’ E co naputwileko fimo ifya kucita fyandi no kupeela ukusakamana ku cintu nali na maka ya kucita.”

Nelyo fye ni kasesema waicefya Mose alikwete ubwafya mu kwishiba umwa kupelela mwakwe. E co Yetro, shifyala, aali no kwaafwa Mose ukutontonkanya bwino ukulosha ku bukulu bwa mulimo aleesha ukubomba eka. “Cinshi ici cintu ico ulecita ku bantu?” e fyaipwishe Yetro. “Tacawama ico cintu ulecita. Ukufunshika ukafunshika . . . pantu cafina kuli iwe ici cintu; te kuti ucicite weka. . . . Kabili iwe usale pali aba bantu bonse abaume ba mucetekanya, . . . nomba, umulandu onse ukalamba kuti baleta kuli iwe, no mulandu onse unono kuti bapingula abene.” Mose ilyo line atendeke ukwakanya umulimo wakwe umo kuli bambi, muli ifyo ukusanga ukwiluluka ukufuma ku caleba icipe cishingasendwa.—Ukufuma 18:13-26.

Pa kashita kambi Mose asosele kuli Yehova ukuti: “Ine nafilwo kusenda neka aba bantu bonse, pantu cintu cafina caŋansha.” Na kabili, icasuko cali kwakanya umulimo. Ici kuti caba na kabili kupikulula ku cipindami cobe nga ca kuti wayumfwa uwaanshiwa ku fya kucita ifingi.—Impendwa 11:14-17.

Yehova AlatwaafwaUkusenda Icipe

Yesu asosele ukuti ikoli lyakwe lyali lyayanguka ne cisendo cakwe caali icapepuka lelo icishaba icishafina. Ikoli Yesu atulaalike ukusenda te koli lya bumbokoya. Lili likoli lya kuipeela kwakumanina kuli Lesa pamo ngo musambi wa kwa Yesu Kristu. Muli ifyo, icipimo cimo ica kufina nelyo ukutitikisha cilesako mu kuba Umwina Kristu wine wine. (Mateo 16:24-26; 19:16-29; Luka 13:24) Ilyo imibele ya calo ilebipilako, ukutitikisha kukakulilako. Nangu cibe fyo, twalikwata umulandu wa kubela abashininkisha mu mimwene yesu pa mulandu wa kuti ubwite bwa kwa Yesu bulangilila ukuti bambi kuti baba pe samba lyakwe pamo na wene kabili ifyo kuti abafwilisha.a Muli fyo, cikulu fye tulekonka ubutungulushi bwa kwa Kristu, icipe cesu cikatwalilila ukuba icingasendwa pantu akatwaafwa.

Lesa alasakamana abo abamutemwa, kabili alinda imitima na mapange ya abo bonse abapoosa mu kubamo ipepo ifisendo fyabo pali wene. (Ilumbo 55:22; Abena Filipi 4:6, 7; 1 Petro 5:6, 7) “Abe uwacindikwa [Yehova, NW], Lesa ipusukilo lyesu! ubushiku no bushiku atusenda,” e fyasosele kemba wa malumbo. (Ilumbo 68:19) Ee, ba uwaebekeshiwa ukuti Lesa lyonse akakusendelako icipe na iwe wine nga ca kuti wafuule cifinine conse no kubutuka no kushipikisha ulubilo lwabikilwa iwe.

[Amafutunoti]

[Icikope pe bula 24]

Baeluda ba mano baliba abaitemenwa ukupeela imilimo imo no kwakana icipe