Yesu Akalipila Abafarise

Ilyo bakalemba na baFarise bakeene ukusumina ukuti Yesu alebomfya amaka ya kwa Lesa pa kufumya ifibanda, baliponteele umupashi wa mushilo. Bushe baali ku lubali lwa kwa Lesa nelyo kuli Satana? Yesu atile: “Ni mwe mulenga umuti ukuba uusuma ne fisabo fya uko ukuba ifisuma nelyo uku-ulenga ukuba uubi ne fisabo fya uko ukuba ifibi; pantu umuti bawishibila ku fisabo fya uko.”—Mateo 12:33.

Abashakwete amano e balelanda ukuti Yesu alebomfya amaka ya kwa Satana pa kufumya ifibanda. Nga fintu Yesu alandile mu Lyashi lya pa Lupili, nga ca kuti icisabo cisuma, ninshi ne cimuti basabileko naco cisuma. Bushe ifisabo fya baFarise, nelyo imilandu ya bufi iyo balepeela Yesu, yalangilile cinshi? Yalangile ukuti imibele yabo yali iyabola. Yesu abebele ukuti: “Mwe bana ba nsoka mwe, kuti mwalanda shani ifisuma ilyo muli babifi? Pantu umuntu alanda ifyaisula mu mutima wakwe.”—Mateo 7:16, 17; 12:34.

Ifyo tulanda filanga ifyaba mu mitima yesu kabili e ko tukapingwilwa nga ca kuti tuli balungami nelyo iyo. E co Yesu alandiile ukuti: “Ndemweba nati, amashiwi yonse aya buwelewele ayo abantu balanda, bakalubulwilapo pa Bushiku bwa Bupingushi; pantu ku mashiwi yobe e ko bakakupingwila ukuti uli mulungami nangu ukuti tauli mulungami.”—Mateo 12:36, 37.

Nangu ca kuti Yesu alecita ifipesha amano, bakalemba na baFarise balefwaya ifishibilo na fimbi. Batile: “Mwe Kasambilisha, tulefwaya ukumona icishibilo kuli imwe.” Nampo nga balimwene alecita ifipesha amano nelyo iyo, icishinka ca kuti kwali abengi abamwene ifyo Yesu alecita. E calengele Yesu eebe intungulushi sha baYuda ukuti: “Inkulo ya bubifi kabili iishaba na cishinka kuli Lesa lyonse ifwaya icishibilo, lelo tayakapeelwe icishibilo cimbi kano fye icishibilo ca kwa kasesema Yona.”—Mateo 12:38, 39.

Yesu alilondolwele umwalolele amashiwi alandile. Abebele ati: “Pantu filya fine Yona ali mu nda ya cisabi inshiku shitatu akasuba no bushiku, e fyo no Mwana wa muntu akaba mu kati ka mushili inshiku shitatu akasuba no bushiku.” Icisabi icikulu caliminine Yona, lelo afumine mu cisabi kwati abuushiwa ku bafwa. E ico Yesu abebele ukuti ali no kufwa kabili pa bushiku bwalenga shitatu ali no kubuuka. Ilyo Yesu abuukile pa numa ya nshiku shitatu, intungulushi sha baYuda shalikeene “icishibilo ca kwa Yona,” e kuti balikeene ukulapila no kwaluka. (Mateo 27:63-66; 28:12-15) Lelo, “abena Ninebe” balilapiile ilyo Yona abilile imbila. Kanshi inkulo ino bakaishinina. Yesu alandile no kuti namfumu wa ku Sheba na o akabashinina. Uyu namfumu alefwaya ukumfwa amano ya kwa Solomone kabili ilyo amwene ifyo Solomone akwatishe amano, alipapile sana. E ico Yesu atile, “uwacila pali Solomone ali pano.”—Mateo 12:40-42.

Yesu apashenye iyi nkulo ku muntu uo bafumishemo umupashi wakowela. (Mateo 12:45) Apo uyu muntu tatendeke ukucita ifisuma ilyo bamufumishe umupashi wabipa, umupashi wabipa walibwelele kabili wasendele imipashi na imbi 7 iyabipisha ukuucila no kwingila muli ena. E fyo cali na ku luko lwa bena Israele. Lesa alilusangulwile kabili lwalyalwike, kwati muntu uo bafumyamo icibanda. Lelo ulu uluko lwalikeene bakasesema ba kwa Lesa, kabili lwasukile lwakaana na Yesu uo cailangile fye apabuuta tuutu ukuti alikwete umupashi wa kwa Lesa. Kanshi aba bantu balibipile ukucila ifyo bali pa kutendeka.

Ilyo Yesu alelanda, banyina na bamunyina balishile no kwiminina akatalamukila. Bamo abaikele mupepi nankwe bamwebele abati: “Banoko na bamunonko nabeminina pa nse balefwaya ukukumona.” Yesu alilangile ifyo atemenwe abasambi bakwe abo alemona kwati ni bamunyina, bankashi yakwe, na banyina. Aloleshe abasambi bakwe kabili atile: “Bamayo na bamunyinane ni balya abomfwa icebo ca kwa Lesa no kucikonka.” (Luka 8:20, 21) Nangu ca kutila balupwa ba kwa Yesu baali abacindama sana, abasambi bakwe balicililepo ukucindama. Ala tulomfwa bwino ukuba na bamunyinefwe abatutemwa, maka maka ilyo bambi baletutwishika no kutupontela pa mulimo uusuma uo tubomba!