Nani Uwacindama Sana Kuli Imwe?

“Ni mwe Mwapulamo pano isonde ponse.”—AMALU. 83:18.

1, 2. Nga tulefwaya ukwisapusuka, mulandu nshi tushilingile ukupelela fye pa kwishiba ishina lya kwa Lesa?

NALIMO umuku wa kubalilapo mwamwene ishina lya kwa Lesa ni lintu bamulangile pa Amalumbo 83:18. Limbi no kupapa mwalipapile ilyo mwamwene amashiwi ayabapo ayatila: “Pa kuti abantu beshibe ukuti imwe mweka, mwe bakwata ishina lya kuti Yehova, ni mwe Mwapulamo pano isonde ponse.” Ukufuma apo mwaishibila ili lembo, na imwe bene mufwile mwalilibomfyapo ku kwafwa bamo ukwishiba Lesa wesu uwa kutemwa, Yehova.—Rom. 10:12, 13.

² Ukwishiba ishina lya kwa Lesa kwalicindama, lelo tatufwile ukupelela fye pa kulishiba. Moneni icishinka na cimbi icacindama ico kemba wa malumbo alandilepo ico tulekabila ukwishiba nga ca kuti tulefwaya ukwisapusuka. Atile: “Ni mwe Mwapulamo pano isonde ponse.” Ca cine, Yehova e Wapulamo ku muulu na pano isonde. Apo e Kabumba, enekela ifibumbwa fyakwe fyonse ukuti filemunakila. (Ukus. 4:11) Kanshi kuti cawama twayipusha ukuti, ‘Nani uwacindama sana kuli ine?’ E ico nacicindama ukuti cila muntu atontonkanyepo sana ifyo engasuka ici cipusho!

Umulandu Uwaimine mwi Bala lya Edeni

3, 4. Finshi Satana acitile pa kubeleleka Efa, kabili finshi fyafuminemo?

³ Ifyacitike mwi bala lya Edeni filanga umulandu tufwile ukwishibila uwacindama sana kuli ifwe. Malaika uwapondweke uwaishileishibikwa ati Satana Kaseebanya abeleleke umwanakashi wa kubalilapo Efa, pa kuti acite ifyo alefwaya ukucila ukumfwila ifunde lya kwa Yehova ilya kuti bekalya ku cisabo ca muti umo. (Ukute. 2:17; 2 Kor. 11:3) Anakiile ku kubeleleka kwa kwa Satana no kucita ifyalangile ukuti tacindike bumulopwe bwa kwa Yehova. Mu fyo acitile, Efa alangile ukuti Yehova tacindeme sana kuli ena. Lelo finshi Satana acitile pa kuti abeleleke Efa?

⁴ Satana abomfeshe imingalato iishayanguka ukwiluka ilyo alelanshanya na Efa. (Belengeni Ukutendeka 3:1-5.) Ica kubalilapo ico Satana acitile, kukanabomfya ishina lya kuti Yehova. Alandile fye ukuti “Lesa.” Lelo uwalembele ibuuku lya Ukutendeka ena alilumbwile ishina lya kwa Lesa mu cikomo ca kubalilapo muli ici cipandwa. Ica bubili ico Satana acitile ca kuti, mu nshita ya kulanda ukuti ifyo Lesa abebele ‘lifunde,’ ena alengele cimoneke ukuti talyali lifunde, mashiwi fye. (Ukute. 2:16) Nalimo Satana abomfeshe uyu mucenjelo pa kuti cimoneke kwati lilya ifunde talyacindeme. Ica butatu ico Satana acitile ca kuti, pa kwipusha Efa tatile, ‘bushe Lesa akwebele ukuti . . . ,’ lelo atile ‘Bushe Lesa amwebele ukuti . . . ,’ kwati alelanda na bonse babili nangu ca kuti alelanda fye na Efa eka. Acitile fyo, pa kuti alenge Efa aleimona ukuti alicindeme no kuti e walelandilako umulume wakwe. Cinshi cafuminemo? Ici calengele Efa atampe ukulaimona kwati e wa kulandilako umulume wakwe ilyo ayaswike insoka ati: “Ku fisabo fya miti yonse iya mwi bala kuti twalyako.”

 5. (a) Finshi ifyo Satana alengele Efa ukulatontonkanyapo sana? (b) Cinshi Efa alangile ilyo aliile icisabo babakeenye ukulyako?

⁵ Cimbi ico Satana acitile, kupotonganya ifishinka. Alengele cimoneke kwati Lesa alifyengele Adamu na Efa pa kubeba ukuti “mwilalyako ku muti onse uwa mwi bala.” Kabili, Satana alengele Efa ukulatontonkanya ukutila nga alyako kuti aba “nga Lesa.” Mu kulekelesha, alengele Efa ukutampa ukutontonkanya sana pa muti na pa cisabo ca uko ukucila ukutontonkanya pali bucibusa bwakwe no Wamupeele fyonse. (Belengeni Ukutendeka 3:6.) Ku ca bulanda, ilyo Efa aliile icisabo, alangile ukuti Yehova tali uwacindama sana kuli ena.

Umulandu Wafika na mu Nshiku sha kwa Yobo

 6. Bushe Satana atwishike shani bukaele bwa kwa Yobo, kabili lishuko nshi ici capeele Yobo?

⁶ Pa numa ya myaka iingi sana, Yobo alikwete ishuko lya kulanga uwali uwacindama sana kuli ena. Ilyo Yehova aipwishe Satana nga ca kuti alimwene ukuti Yobo ali wa kaele, Satana ayaswike bukali bukali ati: “Bushe Yobo atiinina Lesa apa fye?” (Belengeni Yobo 1:7-10.) Satana takeene ukuti Yobo aleumfwila Lesa. Lelo atwishike icalengele abe uwa kaele. Alandile ukuti Yobo alebombela Yehova pa mulandu wa kuti alemwenamo fimo te pa mulandu wa kuti alitemenwe Lesa. Uwali no kushinina Satana ukuti ifyo alelanda fya bufi, ni Yobo fye.

7, 8. Mesho nshi Yobo akwete, kabili ukushipikisha kwakwe kwalangile cinshi?

⁷ Yehova asuminishe Satana ukuleta amacushi ayengi pali Yobo mu kukonkana. (Yobo 1:12-19) Bushe Yobo acitile shani ilyo ifintu fyayalwike? Baibolo itila “tabembwike nangu ukusaalula Lesa.” (Yobo 1:22) Lelo Satana atwalilile fye ukumutwishika. Asosele no kuti: “Inkanda pa nkanda, kabili conse ico umuntu akwata kuti apeelela pa mweo wakwe.”a (Yobo 2:4) Satana atile nga ca kuti Yobo alwala, kuti apingulapo ukuti Yehova tacindeme sana kuli ena.

⁸ Ubulwele Yobo alwele bwalengele umubili wakwe ukufiita ne nkanda yakwe ukulafopoka, e lyo no mukashi wakwe na o alemupatikisha ukuti atuke Lesa no kufwa. Bakasansamusha ba bufi nabo balimubepeshe ukuti alibembwike. (Yobo 2:11-13; 8:2-6; 22:2, 3) Nangu ca kuti aliculile ifi, Yobo atwalilile ukuba uwa kaele. (Belengeni Yobo 2:9, 10.) Ukushipikisha kwakwe kwalangile ukuti Yehova e o acindike sana. Yobo kabili alangile ukuti nangu ni mu tuntu fye utunono, abantunse abashapwililika kuti balanga ukuti ifyo Kaseebanya alandile fya bufi.—Linganyeniko Amapinda 27:11.

Yesu Ayasuka mu Kukumanina

 9. (a) Bushe Satana acitile shani pa kutunka Yesu ukuti abike amano ku fintu fya kuisekesha fye umwine? (b) Cinshi Yesu acitile pali ili itunko?

⁹ Ilyo Yesu abatishiwe fye, Satana alimweseshe ukuti abike amano ku fintu fya kuisekesha fye umwine ukucila ukulamona Yehova ukuti e wacindama sana kuli ena. Kaseebanya aeseshe Yesu mu fintu fitatu. Ica kubalilapo, aebele Yesu ukusangula amabwe ukuba umukate pa kuti alye. (Mat. 4:2, 3) Pali iyi nshita ninshi Yesu alileka ukulya pa nshiku 40, kanshi ali ne nsala sana. E ico, Kaseebanya amutunkile ukuti abomfye amaka akwete aya kucita ifipesha mano pa kuti insala ipwe. Bushe Yesu acitile shani? Yesu tacitile nga filya Efa acitile, pantu ena abikile amano ku Cebo ca kwa Yehova kabili alikeene ubwesho ukwabula ukupoosa inshita.—Belengeni Mateo 4:4.

10. Mulandu nshi Satana atunkiile Yesu ukuti atoloke ukufuma pa cibumba ce tempele?

¹⁰ Satana na kabili afwaile Yesu ukuba kaitemwe. Aebele Yesu ukuti atoloke pa nshi ukufuma pa muulu wa cibumba ce tempele. (Mat. 4:5, 6) Cinshi ico Satana aimininepo? Satana aletila Yesu nga aliponene ukwabula ukuicena, nga calilangile apabuuta ukuti “mwana wa kwa Lesa.” Kanshi, Kaseebanya alefwaya ukuti Yesu abike sana amano ku fyo abantu balemumona, no kubalanga ukutila kuti atoloka ukufuma pa muulu wa cibumba ce tempele pa kuti fye abantu bashininkishe ukuti mwana wa kwa Lesa. Satana alishibe ukuti umuntu uwa cilumba kabili uufwaya ukuti abantu batwalilile fye ukumupeela umucinshi nalimo kuti asumina ukucita ne fingamuletela ubusanso. Satana alinyongenye ilembo, lelo Yesu alangile ukuti alyumfwikishe ifyo Icebo ca kwa Yehova cilanda. (Belengeni Mateo 4:7.) Na kabili, filya Yesu akeene bulya bwesho bwa kwa Satana, alangile ukuti Yehova e wacindama sana kuli ena.

11. Mulandu nshi Yesu akaanine amabufumu yonse ayo Kaseebanya alaile ukumupeela?

¹¹ Mwi tunko lya kulekeleshako, Satana alaile ukupeela Yesu icintu icikalamba sana, ne ci mabufumu yonse aya pano isonde. (Mat. 4:8, 9) Apo pene fye Yesu alikeene. Alishibe ukuti nga asumina amabufumu ninshi alanga ukuti nakaana bumulopwe bwa kwa Yehova, e kutila ukukaana ukuti Lesa e Wapulamo. (Belengeni Mateo 4:10.) Ilyo aleasuka Satana muli ubu bwesho bonse, Yesu aleambula amalembo ayabamo ishina lya kwa Lesa.

12. Mulandu nshi uwayafishe, uo Yesu alingile ukupingulapo ilyo ali mupepi no kufwa, kabili finshi twingasambilila ku fyo acitile?

¹² Ilyo Yesu ali mupepi no kufwa, kwaliko umulandu uwayafishe sana uo alingile ukupingulapo. Ilyo alebomba umulimo wakwe, alilangile ukuti ali-itemenwe ukutuula umweo wakwe ilambo. (Mat. 20:17-19, 28; Luka 12:50; Yoh. 16:28) Yesu alishibe no kuti, bali no kumubepesha ubufi no kumutwala ku cilye ca baYuda uko bali no kumupingwila ukufwa kwati wa miponto. Ukutontonkanya pa fyo ali no kufwa ngo wa miponto kwalemuletela sana amalangulushi. Apepele ukuti: “Tata, nga kuti cacitika, fumyeni pali ine uyu kapu.” Alundilepo no kuti: “Lelo te fyo ine ndefwaya, kano ifyo imwe mulefwaya.” (Mat. 26:39) Bucishinka bwa kwa Yesu ukufika na ku mfwa bwalangilile ukuti Lesa e wacindeme sana kuli ena!

Ifyo Ifwe Twalayasuka Ici Cipusho

13. Finshi twasambilila kuli Efa, Yobo, na kuli Yesu Kristu?

¹³ Finshi twasambilila? Kuli Efa, twasambililako ukuti bonse ababika amano ku kufwaya ifya kuisekesha abene nelyo ku kuimona abacindama, balanga ukuti Yehova te wacindama sana kuli bena. Lelo, kuli Yobo uwali uwa kaele, twasambililako ukuti na bantunse abashapwililika kuti balanga ukuti balicindika sana Yehova nga baleshipikisha amacushi, nangu ca kuti tabeshibe icilelenga ukuti balecula. (Yako. 5:11) Mu kulekelesha, kuli Yesu twasambililako ukuti tufwile ukuitemenwa ukuseebana no kukanabika sana amano ku fyo abantu baletumona. (Heb. 12:2) Nomba kuti twakonka shani ifyo twasambilila?

14, 15. Bushe ifyo Yesu acitile ilyo bamutunkile fyapusana shani ne fyo Efa acitile, kabili kuti twacita shani pa kuti tupashanye Yesu? (Landeni pa cikope icili pe bula 18.)

¹⁴ Te kwesha ukulaba Yehova ilyo mwatunkwa. Efa atampile ukutontonkanya sana pe tunko alolenkene na lyo. Amwene ukuti icisabo cali ‘icisuma ukulyako, kabili cali icawama ukumona, e lyo calemoneka bwino.’ (Ukute. 3:6) Ifyo acitile fyapusana sana ne fyacitile Yesu ilyo bamutunkile imiku itatu! Ilyo aletunkwa, lyonse alemona pa fyali no kufumamo nga ca kuti anakilako kwi tunko. Acetekele Icebo ca kwa Lesa kabili alebomfya ishina lya kwa Lesa.

¹⁵ Ilyo twatunkwa ukucita ifingafulwisha Yehova, finshi tubikako sana amano? Nga twabika sana amano kwi tunko, e lyo twingafwaisha ukucita ifyo fine tuletunkwa. (Yako. 1:14, 15) Tufwile ukwangufyanya ukucitapo cimo pa kuti tufumye ulunkumbwa mu mutima wesu, nangu ca kuti ico tufwile ukucita cintu ca-afya sana, caba kwati kufumyako icilundwa cimo ica mubili wesu. (Mat. 5:29, 30) Tufwile ukutontonkanya sana pa fingafuma mu fyo tulefwaya ukucita, ne fyo fili no kukuma bucibusa bwesu na Yehova, kwati ni filya na Yesu aletontonkanyapo. Tufwile ukulaibukisha ifyo Icebo ca kwa Lesa Baibolo cisosa. Nga tulecita ifyo e lyo twingalanga ukuti Yehova e wacindama sana kuli ifwe.

16-18. (a) Finshi fingalenga twafuupuka? (b) Finshi fikatwafwa ukushipikisha amafya?

¹⁶ Mwilafulilwa Yehova ilyo amasanso yamuponena. (Amapi. 19:3) Ilyo tulepalamina ku mpela ya cino calo, abantu ba kwa Yehova abengi nga nshi baleponenwa na masanso. Tatwenekela ukuti Lesa akulatucingilila ku masanso yatuponena pali ino nshita. Lelo, nga filya cali kuli Yobo, na ifwe kuti twafuupuka ilyo abantu besu bafwa nangu ilyo twaba na mafya.

¹⁷ Yobo taishibe umulandu Yehova alekeele ifintu fimo ukumucitikila, na ifwe inshita shimo teti twishibe umulandu ifyabipa filetuponena. Nalimo twalyumfwapo uko bamunyinefwe aba citetekelo baipaiwa ku masanso yambi nelyo ku cinkukuma, nga filya cali ku calo ca Haiti. Nalimo twalishibapo uwa bwananyina umo uwa kaele uwasanshilwe nelyo uwafwile mu busanso bwabipisha. Limbi na ifwe bene ifyabipa fyalitucitikilapo nelyo twalifyengwapo. Pa mulandu wa kucula sana, nalimo kuti twakuuta atuti: ‘Mwe Yehova, mulandu nshi ifi fintu filecintikila? Finshi nalufyanya?’ (Haba. 1:2, 3) Finshi fikatwafwa ukushipikisha ilyo ifya musango yo fyatucitikila?

¹⁸ Ifyabipa nga fyatucitikila tatufwile ukumona kwati Yehova natupata. Yesu alandile pali ici ilyo alelanda pa masanso yabili ayacitike mu nshiku shakwe. (Belengeni Luka 13:1-5.) Amasanso ayengi yesa pa mulandu wa “fintu fyabula ukwenekela.” (Luk. Mil. 9:11) Lelo, te mulandu ne calenga ubusanso ukutuponena, kuti twashipikisha nga ca kuti twacetekela “Lesa wa cisansamushi conse.” Akatupeela amaka ya kutwalilila ukuba ne citetekelo.—2 Kor. 1:3-6.

19, 20. Cinshi calengele ukuti Yesu ashipikishe ilyo balemuseebanya mu nshila shapusanapusana, kabili cinshi cingatwafwa na ifwe?

¹⁹ Mwibika sana amano ku fyo bambi bamumona nangu ku kutiina ukuseebana. Ukuicefya kwa kwa Yesu kwalengele ‘aisangule uwa fye no kubuula icipasho ca busha.’ (Fil. 2:5-8) Alishipikishe ilyo balemuseebanya mu nshila shapusanapusana pantu acetekele Yehova. (1 Pet. 2:23, 24) Pa kucita ifyo, Yesu alangile ukuti abikile ukufwaya kwa kwa Yehova pa ntanshi ne ci calengele bamusansabike. (Fil. 2:9) Yesu atile ifyo acitile e fyo na basambi bakwe bafwile ukulacita.—Mat. 23:11, 12; Luka 9:26.

²⁰ Inshita shimo amesho ayatuponena kuti yaba aya museebanya. Na lyo line, tufwile ukuba abacetekela nga filya umutumwa Paulo ali ilyo atile: “Ni pali uyu wine umulandu ndeculila ne fi fintu, lelo nshili ne nsoni. Pantu nalishiba uo nasuminamo, kabili nincetekela ukuti alikwata amaka ya kusunga ico naseekesha kuli ena ukufika na kuli bulya bushiku.”—2 Tim. 1:12.

21. Finshi tufwile ukupampaminapo ukucita nangu ca kuti abantu muli cino calo ni bakaitemwe?

²¹ Baibolo yasobele ukuti mu nshiku shesu abantu “bakaba abaitemwa.” (2 Tim. 3:2) E mulandu wine abantu mu nshiku shesu bamwena ukuti e bacindama sana ukucila na Yehova. Shi twikambulako iyo mibele ya bukaitemwe! Lelo, nga twalolenkana na matunko, atemwa twaponenwa na masanso, nangu nga balefwaya ukutuseebanya, natupampamine pa kulanga ukuti Yehova e wacindama sana kuli ifwe!

[Futunoti]

Finshi Twingasambilila . . .

• ku fyo Satana abeleleke Efa?

• ku fyo Yobo acitile ilyo aponenwe na macushi?

• ku fyo Yesu abikile sana amano ku kucita ukufwaya kwa kwa Yehova?

[Icikope pe bula 17]

Efa tatontonkenye pali bucibusa bwakwe na Yehova

[Icikope pe bula 18]

Yesu alikeene ukucita ifyo Satana amutunkile lelo abikile sana amano ku kucita ukufwaya kwa kwa Yehova

[Ifikope pe bula 20]

Aba bwananyina baleshimikila mu matenti pa numa ya cinkukuma ku Haiti

Ilyo twaponenwa na masanso, tufwile ukucetekela “Lesa wa cisansamushi conse”