Ilyo Yesu ali ne myaka nalimo ibili, Yosefe na Maria bafumine ku Egupti no kuya nankwe ku Nasarete. Pali iyi nshita Yesu e mwana fye uo bakwete. Pa numa Yosefe na Maria balikwete abana abaume na banakashi. Amashina ya bana abaume ni Yakobo, Yosefe, Simone, na Yuda. Kanshi abaice ba kwa Yesu, bonse pamo, abaume na banakashi balifikile 6, nalimo no kucilapo.

Yosefe alebombesha pa kuti alesakamana ulupwa lwakwe ulwalekulilako. Aali ni kabasa. Yosefe alekusha Yesu ngo mwana wakwe, ne ci calengele Yesu balemwita ukuti “umwana wa kwa kabasa.” (Mateo 13:55) Yosefe alisambilishe Yesu umulimo wa bukabasa, kabili Yesu alishibe bwino sana uyu mulimo ica kuti mu kuya kwa nshita abantu balemwita ati: “Kabasa.”—Marko 6:3.