Aliisha Abengi Nangu Ca Kuti Pali Fye Imikate Iinono Ne Sabi

Abatumwa ba kwa Yesu 12 balitemenwe ifyo babombele umulimo wa kushimikila mu Galili, kabili bashimikile Yesu “fyonse ifyo bacitile ne fyo basambilishe.” Ukwabula no kutwishika balinakile. Lelo tabakwete nangu ni nshita ya kuti balye pa mulandu wa kuti kwali abantu abengi abaleisa na balefumako. E ico Yesu aebele abatumwa ati: “Natuleya ukutalele ukwa kuti tube fweka tutuusheko panono.”—Marko 6:30, 31.

Baninine mu bwato, nalimo lwa mupepi na ku Kapernahumu, kabili baile ku ncende ukushali abantu. Balolele lwa ku kabanga ka Mumana wa Yordani, kabili balyendele bayacila Betsaida. Lelo abantu abengi balibamwene kabili balishibe uko baile. E ico mu kwangufyanya bakonkele ululamba lwa bemba no kubatangilila kwi shilya.

Ilyo bafumine mu bwato, Yesu amwene amabumba ya bantu kabili alibomfwilile uluse pantu bali nge mpaanga ishabula kacema. E ico atendeke “ukubasambilisha ifintu ifingi” pa Bufumu. (Marko 6:34) Kabili aposeshe na “balekabila ukuundapwa.” (Luka 9:11) Ilyo inshita yapitile, abasambi bamwebele abati: “Pano ni pa mpanga na kasuba nakawa; lekeni amabumba yaleya, pa kuti bayeshita ifya kulya mu mishi.”—Mateo 14:15.

Yesu abebele ati: “Tabafwile ukuya iyo: Imwe bene bapeeleni ifya kulya.” (Mateo 14:16) Nangu ca kuti Yesu alishibe ifyo ali no kucita, aeseshe Filipi ilyo amwipwishe ati: “Ni kwi twalashita imikate ya kuti aba bantu balye?” Calilingile ukwipusha Filipi pantu e waleikala mwi tauni lya Betsaida ilyali mupepi. Apo abaume abalipo bali nalimo 5,000, imikate bali no kushita nga tayakumene. Na kuba, nga kusanshako na banakashi na bana, abantu bonse pamo balifikile nalimo 10,000! E ico Filipi ayaswike ati: “Imikate ya madenari 200 [denari imo e ndalama balelipila umuntu nga abomba ubushiku bumo] te kuti ibakumane, nangu fye kusuninako cila muntu akanono.”—Yohane 6:5-7.

Nalimo pa kuti alange Yesu ukutila te kuti baliishe abantu bafula ifi, Andrea atile: “Pali akalumendo akakwete imikate ya barle isano no tusabi tubili. Lelo bushe ifi e fingakumana abafula ifi?”—Yohane 6:9.

Apo cali ni muli ba April kabili kwashele inshiku ishinono ukuti kube Ica Kucilila ca mu 32 C.E., lwa ku lupili uko bali kwali icani iciteku. Yesu aebele abasambi bakwe ukweba abantu ukuti bekale pa cani mu mabumba 50 na 100. Abuulile imikate 5 no tusabi tubili no kupepa kuli Lesa. Lyena alimokawile imikate no kwakanya utusabi, kabili ayakenye abasambi bakwe pa kuti bapeele abantu. Ku ca kupapusha, abantu bonse baliliile no kwikuta baikuta!

Pa numa, Yesu aebele abasambi bakwe ati: “Longanyeni ifisheleko, pa kuti twipoosapo nangu kamo.” (Yohane 6:12) Awe ilyo balongenye ifyasheleko, baiswishe imiseke 12!