Kateka Uwakwata Amaka Pa Fyabumbwa

Icipesha amano ico Yesu acitile, ica kuliisha amabumba ya bantu calibafikile sana pa mutima. Ici calengele balande ukuti “cine cine uyu e Kasesema uwali no kwisa mu calo,” kabili calengele bamone ukuti ni Mesia no kutila kuti aba kateka musuma. (Yohane 6:14; Amalango 18:18) E ico abantu bafwaile ukuti Yesu abe imfumu.

Lelo, Yesu alishibe ifyo abantu balepanga ukucita. Aebele abantu ukuya e lyo aeba abasambi bakwe ukuti banine mu bwato. Ni kwi bali no kuya? Ni ku Betsaida e lyo pa numa bali no kuya ku Karpenahumu. Lelo Yesu ena aile ku lupili ubushiku mu kupepa.

Ilyo cali ku macaca, ninshi no mweshi naubalika, Yesu amwene ubwato buleisa akatalamukila. Icimwela cikalamba caleimya amabimbi pali bemba, kabili abatumwa “balecula pa koba, pa mulandu wa kuti umwela walefuma uko baleya.” (Marko 6:48) Yesu atentemwike ulupili kabili atendeke ukwenda pali bemba no kuya uko bali. Pali iyi inshita abasambi “baobele ubwato nalimo amakilomita 5 nelyo 6.” (Yohane 6:19) Yesu acitile kwati alebapitilila, kabili ilyo bamumwene balipundile abati: “Icapala umuntu!”—Marko 6:49.

Yesu abebele ati: “Shipeni, ala nine; mwitiina.” Lelo Petro amwebele ati: “Shikulu, nga ni mwe, njebeni njise kuli imwe pa menshi.” Yesu atile: “Isa!” Awe Petro afumine mu bwato no kwenda pa menshi ukuya ukwali Yesu. Lelo ilyo amwene amabimbi ayaleima pa mulandu wa cikuuku ca mwela, Petro alyumfwile umwenso, kabili atendeke ukwibila. Apundile ati: “Mwe Shikulu mpususheniko!” Yesu atambike ukuboko kwakwe no kwikata Petro no kumweba ati: “We wa citetekelo cinono, nga cinshi wacitwishikila?”—Mateo 14:27-31.

Ilyo Petro na Yesu baingile mu bwato, icikuuku ca mwela calilekele. Abasambi balipapile, lelo bushe balingile ukupapa? Tapakokwele ukutula apo Yesu ‘apangile imikate mu cipesha amano’ no kuliisha amabumba ya bantu, kanshi abasambi bakwe tabalingile ukupapa ukumumona ale-enda pa menshi no kuti atalalika icikuuku ca mwela. Awe abasambi balimufukamine balalanda abati: “Cine cine, uli Mwana wa kwa Lesa.”—Marko 6:52; Mateo 14:33.

Tapakokwele bafikile mu mpanga iyabatama iya mu Genesarete, icifulo icisuma nga nshi icabelele ku kapinda ka ku kulyo aka Kapernahumu. Bashile ubwato no kuya ku lulamba. Ilyo abantu ba mu Genesarete bamwishibe, aba abantu capamo na ba mu mishi ya mu mbali batwele abalwele kuli Yesu. Abalwele nga bakumya fye ku nsenkebele sha ca kufwala ca kwa Yesu, balepolelela.

Lelo abantu abamweneko uko Yesu aliishishe amabumba ya bantu, baishileishiba ukuti Yesu nafumapo, naya. E ico ilyo utumato utwalefuma ku Tiberia twafikile, balya bantu balinininemo no kuya ku Kapernahumu mu kufwaya Yesu. Ilyo bamusangile, bamwipwishe abati: “Mwe kasambilisha, ni lilali mwaishile kuno?” (Yohane 6:25) Lelo Yesu alibakalipiile nga fintu twalasambilila.