Yesu Aumfwila Uwa Fibashi Uluse Kabili Amundapa

Ilyo Yesu na basambi bakwe bane baleshimikila mu “masunagoge yabo mu Galili monse,” abantu abengi balyumfwile ululumbi lwa fintu ifisuma ifyo Yesu alecita. (Marko 1:39) Ululumbi pa fipesha amano ifyo Yesu acitile lwalifikile na mu musumba umo, umwali uwalwele ifibashi. Kondapa Luka alondolwele ukuti uyu muntu ‘alwele ifibashi umubili onse!’ (Luka 5:12) Ubu bulwele nga bwakula, bulaya buleonaula ifilundwa fya mubili.

Kanshi uyu muntu aliculile sana kabili alingile ukutaluka abantu no kulaikala eka. E lyo alingile no kulabiliksha ati: “Ninkowela, ninkowela!” nga ca kuti pali abantu mupepi pa kuti beisa apo ali no kwambula ubulwele. (Ubwina Lebi 13:45, 46) Cinshi uyu umwaume wa fibashi acitile? Aile kuli Yesu, amufukamina no kumupaapaata ati: “Mwe Shikulu, kuti mwamposha nga mulefwaya.”—Mateo 8:2.

Uyu mwaume alicetekele sana Yesu! Ubulwele alwele bwalengele alemoneka uwa bulanda icine cine! Bushe Yesu acitile shani? Nga ni mwe nga mwacitile shani? Yesu alimumfwilile uluse, e ico atambalike ukuboko kwakwe no kumukumya. Amwebele ati: “Ee ndefwaya. Pola.” (Mateo 8:3) Apo pene fye uwalwele ifibashi alipolele, nangu ca kuti nalimo calikoseele bamo ukusumina.

Bushe te kuti mutemwe ukutekwa ne mfumu iya luse kabili iya maka nga Yesu? Ifyo Yesu acitile pa kundapa uwa fibashi fitulanga ukuti ilyo akateka isonde lyonse, amashiwi yaba muli ubu ubusesemo yakafikilishiwa ayatila: “Akomfwila ubulanda umulanda no mupiina, kabili akapususha imyeo ya bapiina.” (Amalumbo 72:13) Ca cine, Yesu akaafwa abalanda bonse pantu alafwaisha ukucita ico.

Ibukisheni ukuti na lintu Yesu talaundapa uwa fibashi, umulimo wa kushimikila uo alebomba walelenga abantu basekelela. Abantu baali no kumfwa ukuti Yesu nacita ici icipesha amano. Lelo Yesu talefwaya abantu ukumutetekela pa mulandu fye wa fyo baleumfwa ku bantu bambi. Alishibe ukuti amashiwi ya kuti: “Takaleke ishiwi lyakwe ukumfwika mu musebo” yalingile ukufikilishiwa. (Esaya 42:1, 2) E ico Yesu aebele uwa fibashi uo aundepe ati: “Te kwesha ukwebako umuntu nangu umo, lelo kabiye, kailange kuli shimapepo, no kutuula ica bupe cintu Mose asosele.”—Mateo 8:4.

Lelo uyu umwaume alifililwe ukwikala tondolo pantu alitemenwe icine cine ilyo Yesu amundepe. Aile aleshimikila abantu icacitike konse fye uko aya. Alengele abantu ukufwaisha ukumona Yesu. Awe Yesu asukile aleka ukulaya ukwali abantu abengi mu musumba. Pa nshita imo aikele fye ku cifulo ukushali abantu. Na lyo line, abantu mu fifulo fyalekanalekana balile pa kuti abasambilishe no kubondapa.