Baacitile Ukufwaya kwa kwa Yehova

Yesu Apooseleko Inshita na Bana

IMYAKA itatu na citika iya butumikishi bwa kwa Yesu yaleya ilepwa. Mu kwangufyanya ali no kuya ku Yerusalemu no kufwa imfwa yatapata. Alishibe bwino bwino icali ku ntanshi, pantu aali naeba abasambi bakwe ukuti: “Umwana wa muntu akapeelwa mu minwe ya bantu, e lyo bakamwipaya.”—Marko 9:31.

Mu cine cine, Yesu kuti atemwa ukubomfya bwino bwino inshita yonse isheleko. Abasambi bakwe bacili balekabila ukusakamanwa. Yesu alimwene ukuti bacili balekabila ukukonkomesha apakalamba pa lwa kuicefya na ku busanso bwabako lyonse ubwa kuipununa. (Marko 9:35-37, 42-48) Na kabili balekabila ukufundwa pa lwa cupo, ukulekana, no bushimbe. (Mateo 19:3-12) Apo Yesu alishibe ukuti ali mupepi no kufwa, ukwabula ukutwishika alandile ku basambi bakwe mu kumfwika kabili mu kupamfiwa. Inshita yali iyacindama kabili ici calengele cintu Yesu acitile mu kukonkapo cibe icapulishamo.

Yesu Apokelela Abana

Icalembwa ca Baibolo citila: “Baletele kuli wene abaice, ukuti abakumye.” Ilyo abasambi bamwene fi, balibakenye apo pene fye. Nalimo baleti Yesu ali uwacindamisha atemwa uwapamfiwa ica kuti teti asakamane abana. Lyene, langulukeni ifyo abasambi bapapushiwe, lintu Yesu abakalipile! Abebele ukuti, “Lekeni abaice bese kuli ine, mwibakanya; pantu ubufumu bwa kwa Lesa bwa babe fi.” Yesu alundilepo no kuti: “Ndemwebe ca cine, nati, uushipokelela ubufumu bwa kwa Lesa ngo mwaice, takengilemo nakalya.”—Marko 10:13-15.

Yesu alimwene imibele yawamisha mu bana. Ilingi line baliba abakwipukisha kabili abacetekelwa. Balakonka fintu abafyashi babo balebeba no kubacingilila ku bana banabo. Icifyalilwa cabo ica kupokelela ukufunda cilingile ukupashanishiwa na bonse abafwaya ukwingila mu Bufumu bwa kwa Lesa. Nga fintu Yesu asosele, “ubufumu bwa kwa Lesa bwa babe fi.”—Linganyeniko Mateo 18:1-5.

Lelo Yesu talebomfya aba bana nge cilangililo fye. Icalembwa cilalondolola bwino bwino ukuti Yesu mu bufumacumi atemenwe ukuba pamo na bene. Marko atila Yesu “pa kubafukatila, abikapo indupi shakwe, no kubapaala.” (Marko 10:16) Icalembwa ca kwa Marko fye e casanshamo amashiwi yalangilila icitemwishi aya kuti Yesu ‘alibafukatile.’a E ico Yesu alicishishe pa fintu abakalamba baleenekela. Bena baletele aba bana kuli Yesu pa kuti “abakumye” fye.

Bushe ‘ukubikapo indupi shakwe’ pa bana calolele mwi? Pano tapaba ukutubulula kwa kuti mwasanshishe ifya mapepo, kwati lubatisho. Kwena inshita shimo, ukubikapo indupi kwapilibwile ukulaasa, lelo inshita shimbi kwaleimininako ukupaala. (Ukutendeka 48:14; Imilimo 6:6) E ico, nalimo Yesu alepaala fye aba bana.

Nangu cibe fyo, Marko abomfya ishiwi lyakosako ilya ‘ukupaala’ (ka·teu·lo·geʹo), ililangilila amaka. Ico citubulula ukuti Yesu apaalile abana ukufuma pa mutima, mu mutembo, kabili mu kutemwa. Ukwabulo kutwishika, tamwene abana nge cisendo calemuliila inshita.

Ifyo Twingasambililako

Yesu taletiinya abakalamba nelyo abana nga ali nabo atemwa ukubasaalula. Icitabo cimo citila, “Afwile alemwentula bwangu no kuseka mu nsansa.” Te ca kupapa ukuti abantu ba mishinku yonse bali abakakuka ukuba na wene. Ukutontonkanya pa ca kumwenako ca kwa Yesu, kuti twaipusha fwe bene ukuti, ‘Bushe ndamonwa ngo utununukwa?’ Ukulundulula ukutemwa abantu icine cine kukatulenga ukuipalamika kuli bene nge fyacitile Yesu. Bambi bakamona ukutemwa kwesu ukwa cine cine kabili bakatupalama.—Amapinda 11:25.

Nga fintu icalembwa ca kwa Marko cilanga, Yesu aleipakisha ukuba na bana. Cilemoneke fyo, alepoosa inshita ukumona ifyo baleangala, pantu muli cimo ica filangililo fyakwe aloseshe ku fyangalo fya bana. (Mateo 11:16-19) Nalimo abana bamo abo Yesu apaalile baali abacepesha ica kuti teti batesekeshe untu Yesu aali na cintu alesambilisha. Lelo ico tacamulengele ukuyumfwa ukuti aleonaula fye inshita. Alepoosa inshita na bana pantu alibatemenwe. Napamo, abengi mu bana abo Yesu akumenye pa nshita ya butumikishi bwakwe kuli pelepele baliseshiwe no kwankula ku kutemwa kwakwe ukupitila mu kusanguka abasambi bakwe.

Nga ca kuti Yesu mu milungu ya kulekeleshako iyakakala iya bumi bwakwe apooseleko inshita na bana, cine cine kuti twafwaya inshita ya kuba nabo nelyo fye twalipamfiwa. Na kucilisha tulingile ukulaibukisha ababulisha icine cine, ifili abana ba nshiwa. Na kuba, abana bonse balakula bwino lintu basakamanwa, kabili Yehova afwaya ukuti tubalange ukutemwa konse no kubafwilisha ukufika pantu twingapesha.—Ilumbo 10:14.

[Futunoti]