Icumfwila Kuti Ca Kucingilila

BUSHE kuti watemwa nga walecita icili conse ulefwaya? Bushe kulaba inshita shimo ilyo utila nga takwali aba kukweba ifya kucita? Landa fye cishinka, no kunjeba ifyo uletontonkanya.—

Lelo ni cili kwi cingakuwamina? Bushe ca mano ukucita icili conse ulefwaya? Nelyo bushe ifintu filacilapo ukuwama lintu waumfwila bawiso nelyo banoko?— Lesa atila ufwile ukumfwila abafyashi bobe, kanshi kufwile kwaliba ubusuma bwa kucitile co. Natumone nga kuti twabusanga ubo busuma.

Bushe uli ne myaka inga?— Bushe walishiba imyaka bawiso bakwata?— Bushe banoko bali ne myaka inga nelyo banokokulu nelyo basokulu?— Bonse balikala imyaka iingi ukukucila. Kabili umuntu nga aikala imyaka iingi alasambilila ifingi. Alomfwa ifintu ifingi kabili alamona ifintu ifingi kabili alacita ifintu ifingi cila mwaka. E co abacaice kuti basambilila ku bakalamba.

Bushe walishibako umwaice pali iwe?— Bushe walishiba ifingi ukumucila?— Mulandu nshi waishibila ifingi ukumucila?— Ni pa mulandu wa kuti walimucila imyaka. Walikwata inshita yafulilako iya kusambilila ifintu ukucila umwaice pali iwe.

Nani uwaikala imyaka iingi ukukucila, ukucila na ine no kucila umuntu uuli onse umbi?— Ni Yehova Lesa. Alishiba ifingi ukukucila, kabili alishiba ifingi ukuncila. Lintu atweba ukucita icintu icili conse, kuti twacetekela ukuti cintu icisuma ukucita, nangu ca kuti kuti caba icakosa ukucita. Bushe walishiba ukuti na Kasambilisha Mukalamba inshita imo calimukosele ukumfwila?—

Inshita imo Lesa aebele Yesu ukucita icintu cimo icakosa. Yesu apepele pali ci, nga fintu tulemona pano. Apepele ukuti: “Nga mwafwaya, fumyeni pali ine ulukombo ulu.” Pa kupepe fi, Yesu alangile ukuti te lyonse caleba icayanguka ukucita ukufwaya kwa kwa Lesa. Lelo mashiwi nshi Yesu alandile pa kupwa ipepo lyakwe? Bushe waliyeshiba?—

Yesu apwishishe ipepo lyakwe pa kusosa ukuti: “Te kufwaya kwandi, kano kwenu, e ko kucitwe.” (Luka 22:41, 42) Alefwaya ukufwaya kwa kwa Lesa kucitwe, te kwakwe iyo. Kabili alikonkenyepo no kucita ifyo Lesa alefwaya ukucila ifyo aletontonkanya ukuti e fingawama.

Cinshi twingasambilila kuli ci?— Tusambilila ukuti lyonse cisuma ukucita ico Lesa alanda, nangu te kuti lyonse cibe icayanguka ukucita. Lelo tulasambililako na cimbi. Bushe walicishiba?— Tusambilila ukuti Lesa na Yesu te bamo bene, nga fintu abantu bamo basosa. Yehova Lesa mukalambapo kabili alishiba ifingi ukucila Umwana wakwe, Yesu.

Lintu tuleumfwila Lesa, ninshi tulelanga ukuti twalimutemwa. Baibolo itila: “Uku e kutemwa Lesa, ukuti tunakile amafunde yakwe.” (1 Yohane 5:3) E co wamona, ifwe bonse tufwile ukumfwila Lesa. Ufwaya ukumumfwila, bushe te ifyo?—

Natubuule Baibolo yesu no kumona ico Lesa eba abana ukucita. Twalabelenga ifyo Baibolo ilanda pa Abena Efese icipandwa 6, ifikomo 1, 2, na 3. Patila: “Mwe bana, nakileni abafyashi benu muli Shikulu; pantu ici e calungama. Cindika wiso na noko ili e funde lya ntanshi ilyaba ne cilayo, ukuti kuwame kuli iwe; kabili ube wa nshiku ishingi pano nse.”

E co wamona, ni Yehova Lesa umwine uulekweba ukumfwila bawiso na banoko. ‘Ukubacindika’ e kutila shani? E kuti ufwile ukubapeela umucinshi. Kabili Lesa alaya ati nga uleumfwila abafyashi bobe, “kukawama kuli iwe.”

Leka nkushimikileko ilyashi pa lwa bantu abapuswike pa mulandu wa kuti bali ne cumfwila. Aba bantu baliko kale sana mu musumba ukalamba uwa Yerusalemu. Abantu abengi muli ulya musumba tabaleumfwila Lesa, e co Yesu abasokele ati Lesa ali no konaula ulya musumba wabo. Yesu abebele ne fyo bengapusuka nga balitemenwe icalungama. Alandile ati: ‘Ilyo mukamona abashilika nabashinguluka Yerusalemu, ishibeni ukuti ubonaushi bwa uko nabupalama. Lyene abali mu Yerusalemu babutukile ku mpili.’—Luka 21:20-22.

Kwena, nga filya fine Yesu alandile, abashilika baishile mu kusansa Yerusalemu. Abashilika ba ku Roma bashingulwike Yerusalemu. Lyene, nampo nga cinshi calengele, aba bashilika balibwelelemo. Abantu abengi batontonkenye ukuti ubusanso bwapita. E co baikele mu musumba. Lelo Yesu abebele ukucita cinshi?— Cinshi wali no kucita nga waleikala mu Yerusalemu?— Abasumine muli Yesu ica cine bashile amayanda yabo no kubutukila ku mpili ukutali na Yerusalemu.

Umwaka uutuntulu walipitile ukwabula icili conse ukucitikila Yerusalemu. Mu mwaka wa cibili, tapali icacitike. Na mu mwaka wa citatu, tapali icacitike. Abantu bamo pambi baletontonkanya ukuti abafumine mu musumba bali fipuba. Lelo mu mwaka walenga 4, abashilika abena Roma balibwelele. Na kabili bashingulwike Yerusalemu. Nomba abantu te kuti babutuke. Uno muku balya bashilika baonawile umusumba. Abantu abengi muli ulya musumba balifwile, kabili bambi baliketwe.

Lelo cinshi cacitike kuli balya abaumfwilile Yesu?— Bali abacingililwa. Bali ukutali na Yerusalemu. E co tabaonawilwe. Icumfwila calibacingilile.

Nga uli ne cumfwila, bushe ico cikakucingilila na iwe?— Abafyashi bobe kuti bakweba ukuti wilaangalila mu musebo. Mulandu nshi basosele fyo?— Ni pa mulandu wa kuti kuti wapunkwa kuli motoka. Lelo bushiku bumo kuti watontonkanya ati: ‘Takuli bamotoka nomba. Tabampunke. Abana bambi balangalila mu musebo, kabili nshabamonapo bapunkwa.’

Ifi e fyo abantu abengi mu Yerusalemu baletontonkanya. Ilyo abashilika ba bena Roma babwelelemo, calemoneka kwati nabacingililwa. Bambi baikele mu musumba. E co na bo bene balikele. Balisokelwe, lelo tabaumfwile. E ico, balifwile.

Natumone ica kumwenako na cimbi. Bushe walyangashapo macisa?— Kuti camoneka nge cintu icisuma ukutamba umulilo lintu wafwalula macisa. Lelo ukwangala na macisa kuti kwakuletelela. Ing’anda yonse kuti yapya kabili na iwe kuti wafwa!

Ibukisha, te kumfwila fye inshita shimo shimo. Lelo nga uleumfwila lyonse, ico cikakucingilila. Kabili nani alanda ati, “mwe bana, nakileni abafyashi benu”?— Ni Lesa. Kabili, ibukisha, alande ci pantu alikutemwa.