Bushe Lesa Alakutika Lintu Ulepepa?

UMUKALAMBA wa ncito kuti apingulapo nampo nga akapeela incito nelyo ukubombapo umwine pa lwakwe. Mu kupalako, Kateka Mulopwe wa kubumbwa konse alikwata ukusoobolapo ukwa kupingulapo icipimo ca kubimbwamo pa lwakwe mu mulandu uuli onse. Amalembo yasambilisha ukuti Lesa alisala ukuibimbamo pa lwakwe mu mapepo yesu kabili muli ifyo atukambisha ukulungika aya kuli wene.—Ilumbo 66:19; 69:13.

Ukusalapo kwa kwa Lesa muli uyu mulandu kusokolola ubuseko bwa pa lwakwe mu mapepo ya babomfi bakwe aba buntunse. Ukucila ukufuupula abantu bakwe ku kumutununuka mu kuba ne tontonkanyo ilili lyonse no kusakamana, abakonkomesha ukuti: “Pepeni no kukanaleka,” “ku kupepa mube aba mukoosha,” “Poosa pali Yehova icisendo cobe icafina,” “amasakamika yenu yonse bikeni pali [Lesa].”—1 Abena Tesalonika 5:17; Abena Roma 12:12; Ilumbo 55:22; 1 Petro 5:7.

Nga ca kuti Lesa tafwaile ukupeela ukusakamana ku mapepo ya babomfi bakwe, nga tabalile apekanya impito ya musango yo kuli wene no kukoselesha ukubomfya yene mu kukakuka. Ici, lyene, ukusalapo kwa kwa Lesa ukuilenga uwingatununukwa ku bantu bakwe, mulandu umo uwa kucetekela ukuti alakutika mu cishinka. Ee, alapeela ukulanguluka ku mapepo ya babomfi bakwe umo umo.

Icishilingile kusuulwako cishinka ca kuti Baibolo ilondolola apabuuta ukuti Lesa alakutika kwi pepo. Umutumwa Yohane, ku ca kumwenako, alembo kuti: “Kabili uku e kupama tuli na ko kuli wene, ukwa kuti nga twalomba akantu akalingene no kufwaya kwakwe atuumfwa.” (1 Yohane 5:14) Imfumu Davidi aloseshe kuli Yehova Lesa pamo nga “Komfwa we pepo” kabili mu kushininkisha asumine ukuti: “Na o aleumfwe shiwi lyandi.”—Ilumbo 55:17; 65:2, NW.

E co ilintu incitilo ya kupepa ukwabulo kutwishika yalikwata ukumwenamo mu ine yeka, Amalembo yalanga ukuti ifingi fyalibimbwamo lintu umuntu uwalungama apepa. Umuntu umo alekutika. Uyo kakutika ni Lesa.—Yakobo 5:16-18.

Amapepo Ayaumfwilwe

Baibolo yalifulamo ubulondoloshi bwa bantu abo amapepo yabo, na kuba, yaumfwilwe no kwasukwa na Lesa. Ifya kukumanya fyabo mu kulengama fishinina ukuti ukumwenamo kwe pepo kuya bushilya bwa mibombele ya fya kufumamo fya kundapa ifya kulondolola mu kumfwika no kulumbulula amatontonkanyo ya umo. Fiya bushilya bwa kubombesha kwa muntu ukwa pa lwakwe mu kumfwana na mapepo yakwe.

Ku ca kumwenako, lintu alolenkene no kumana akapi kwa kwa Abishalomu ku kubomfya bubi bubi bumfumu bwa kwa Israele, Imfumu Davidi yapepele ukuti: “Shi pumfyanyeni ukupanda amano kwa kwa Ahitofele [uwa kupanda amano wa kwa Abishalomu], mwe Yehova.” Takwali kulomba kunono, nge fyo “ukupanda amano kwa kwa Ahitofele . . . kwali ngo waipusha ku cebo ca kwa Lesa: e fyo kwabo kupanda amano konse kwa kwa Ahitofele.” Abishalomu pa numa akeene imicenjelo yatubulwilwe iya kwa Ahitofele iya kupinuna Imfumu Davidi. Mulandu nshi? “Yehova apangile ukufulunganyo kupanda amano kusuma kwa kwa Ahitofele, ku kuleka Yehova alete ububi pali Abishalomu.” Ukwabulo kulamba, ipepo lya kwa Davidi lyalyumfwilwe.—2 Samwele 15:31; 16:23; 17:14.

Mu kupalako, pa numa Hisekia apaapaatile Lesa ku kupusuka ukufuma ku kulwala kwakwe ukwa kutwala ku mfwa, alipolele. Bushe ici cali fye pa mulandu wa kumwenamo kwa mu nkuntu kuli Hisekia nge ca kufumamo ca kupepa? Mu cituntulu, iyo! Ubukombe bwa kwa Yehova kuli Hisekia, nge fyo bwapeelwe na kasesema Esaya, bwali bwa kuti: “Niŋumfwe pepo lyobe, nimone filamba fyobe: mona, ndekuundapa.”—2 Ishamfumu 20:1-6.

Daniele, untu ipepo lyakwe lyaaswikwe pa numa ukucila fintu pambi aenekele, alyebekeshiwe kuli malaika wa kwa Yehova ukuti: “Fyalyumfwikike ifyebo fyobe.” Amapepo ya bambi, ukupala ayo aya kwa Hana, abasambi ba kwa Yesu, na mushika wa mpuka Korneli, yalyaswikwe mu nshila iyo ishingapeela ukutasha ku maka ya buntunse yeka. Baibolo, lyene, mu kulengama isambilisha ukuti amapepo mu kumfwana no kufwaya kwa bulesa yalapokelelwa, ukumfwika, no kwasukwa na Lesa.—Daniele 10:2-14; 1 Samwele 1:1-20; Imilimo 4:24-31; 10:1-7.

Lelo ni shani fintu Lesa asuka amapepo ya babomfi bakwe aba busumino ilelo?

Ifyasuko ku Mapepo

Amapepo yalumbwilwe pa mulu yalyaswikwe mu nshila shamonekesha, isha cipesha amano. Twapaapaata sungeni mu muntontonkanya, nangu ni fyo, ukuti nelyo fye ni mu nshita sha Baibolo, ifyasuko fyacililepo ukube fya lyonse ku mapepo tafyaleilukwa. Ici ni pa mulandu wa kuti fyaampene ku kupeela amaka ya mibele isuma no kubuutushiwa, ukusuminisha ababomfi ba kwa Lesa ukwikatilila ku nshila yalungama. Ukucilisha ku Bena Kristu, amasuko ku mapepo yabimbilemo imilandu iyo yali apakalamba iya ku mupashi, te mibombele ya kutamba nelyo iyabamo amaka.—Abena Kolose 1:9.

E ico, wifuupulwa nga ca kuti amapepo yobe tayasukwa lyonse mu nshila iyo wenekelamo nelyo ukusoobolapo. Ku ca kumwenako, mu cifulo ca kufumyapo ubwesho, Lesa kuti pambi asalapo ukukupeela “amaka yacila pa ya lyonse” ku kushipikisha cene. (2 Abena Korinti 4:7, NW; 2 Timote 4:17) Tatulingile napacepa ukucefyako umutengo wa maka ya musango yo, nelyo tatulingile ukusondwelela ukuti Yehova tayaswike mu cituntulu ipepo lyesu nakalya.

Languluka umulandu wa umo te kucila pa Mwana wa kwa Lesa, Yesu Kristu. Mu kwangwako kwakwe ukwa kukanafwaya ukufwa ngo wa miponto walumbuka, Yesu apepele ukuti: “Tata, nga mwafwaya, fumyeni pali ine ulukombo ulu.” Bushe ili pepo lyalyumfwilwe kuli Lesa mu kusenaminwa? Ee, nge fyo cashininwa pa AbaHebere 5:7. Yehova tailulwile Umwana wakwe pa lwa kukabila kwa kufwa pa cimuti ca kucushiwilwapo. Mu cifulo ca ico, “kwamoneke malaika wa mu mulu, alemukosha.”—Luka 22:42, 43.

Icasuko ca kucebusha, ica cipesha amano? Ku uuli onse uwa ifwe, kuti caba! Lelo kuli Yehova Lesa, intulo ya maka ya musango yo, ici tacali kupwishishisha kwaibela. Kabili Yesu aali, ukufuma ku bumi bwakwe ubwa mu kubangilila mu mulu, uwabeleshanya ne fya kukumanya fya pa kale lintu bamalaika bamonekele ku bantunse. E co ukumoneka kwa kwa malaika te kuti kukwate ukukunta kwa kutamba pali wene nge fyo cingaba kuli ifwe. Nangu ni fyo, uyu malaika, uo Yesu ukwabulo kutwishika aishibe pa lwakwe ukufuma ku kubapo Kwakwe ukwa pa ntanshi ya buntunse, ayafwilishe mu kukosha Wene ku bwesho bwali fye pa ntanshi.

Mu kwasuka amapepo ya babomfi bakwe aba busumino ilelo, Yehova libili libili apeela ubukose bukabilwa ku kushipikisha. Uku kwafwilisha kuti pambi kwaba mu musango wa kukoselesha ukufuma kuli bakapepa banensu abo tubishanya nabo pa lwesu. Bushe uuli onse uwa ifwe kuti atemwa ukukaana uko kukoselesha, nakalimo ukusondwelela ukuti apantu ababomfi banensu tabakumanyapo amesho ayapala ayesu, tabakwata maka ya kutukoselesha? Yesu nga abuulile iyo ine mimwene ya musango yo ukulola kuli malaika uwamoneke kuli wene. Mu cifulo ca ico, apokelele ukukoselesha nge casuko ca kwa Yehova kwi pepo lyakwe kabili muli ifyo aali na maka ya kufikilisha ukufwaya kwa kwa Wishi mu busumino. Na ifwe bene kuti twafwaya ukupokelela mu cikuuku ubukose ubo Lesa apeela mu kwasuka amapepo yesu. Ibukisha, na kabili, ukuti ifiputulwa fya musango yo ifya kushipikisha mu kutekanya ilingi line fikonkwapo na mapaalo yashingalandwa.—Lukala Milandu 11:6: Yakobo 5:11.

Bo Wacetekela Ukuti Lesa Alakutika

Te kwesha ukulufya ukucetekela mu kubomba kwe pepo nga ca kuti tawaswikwe ilyo line. Ifyasuko ku mapepo yamo, pamo nga ayo aya kwilulukwa kwa pa lobe ukufuma ku kumanama nelyo ku cishingamo caingilishiwako mu mulimo wa umo uwa kwa Lesa, kuti yapembelela ku nshita iyo Lesa aishiba ukuti e yalinga kabili iyawamisha. (Luka 18:7, 8; 1 Petro 5:6) Nga ca kuti ulepepa ukulosha ku mulandu wa kwangwako kwa pa lobe ukwashika, langa Lesa ku mukoosha obe ukuti ukufwaisha kobe kuntu kwakosa, inkuntu yobe iyasanguluka kabili iya cine cine. Yakobo alangile uyu mupashi lintu, pa numa ya kushomboka na malaika mu kutantalilako mu kukosa, asosele ukuti: “Nshakuleke, kano umpaale.” (Ukutendeka 32:24-32) Tufwile ukukwata ukucetekela kwapalako ukuti nga twatwalilila ukulomba, tukapokelela ipaalo mu nshita yalinga.—Luka 11:9.

Itontonkanyo limo ilya kulekelesha. Pa kupokelela ukutwi ukuumfwa ukufuma kuli Mulopwe wa kubumbwa konse lishuko lyaumo mutengo. Muli iyi mimwene, bushe tulakutika mu kusakamanisha lintu Yehova Lesa, ukupitila mu Cebo cakwe, alanda kuli ifwe pa lwa fifwaikwa fyakwe? Ilintu amapepo yesu yatupalamika mu kubamo isenge kuli Kabumba wesu, kuti twafwaya ukupeela ukwangwako kwacindama ku cili conse ico engalanda kuli ifwe.

[Icikope pe bula 6]

Lesa alakutika ku mapepo. Bushe tulakutika kuli wene ukupitila mu Cebo cakwe?