Bushe Yehova Akamwibukisha Shani?

“MWE Lesa wandi, njibukisheni.” Miku iingi Nehemia apaapeete Lesa na yo mashiwi. (Nehemia 5:19; 13:14, 31) Ca cifyalilwa fye ku bantu ukwalukila kuli Lesa no kupaapaata muli iyi nshila nga baponenwa na mafya.

Lelo, bushe cinshi abantu bapilibula ilyo balomba Lesa ukubebukisha? Bafwile benekela Lesa ukucita ifyacila pa kubebukisha fye amashina. E co bakwate subilo ukupala ilyakwete umo pali shilya incitatubi shaipaiwe pamo na Yesu. Ukupusanako no mubiye, uyu, alombele Yesu ukuti: “Munjibukishe ilyo mukesa mu bufumu bwenu.” Alefwaya ukuti Yesu akamwibukishe cintu aali kabili akamucitilepo cimo, uko e kuti, akamubuushe.—Luka 23:42.

Mu fikomo ifingi, Baibolo ilangilila ukuti kuli Lesa, “ukwibukisha” kupilibula ukucitapo cimo icisuma. Ku ca kumwenako, pa numa lintu isonde libe nalifimbwa na menshi pa nshiku 150, “Lesa aibukishe Noa, . . . kabili Lesa akuukishe umwela pano isonde, yasuka amenshi yasenka.” (Ukutendeka 8:1) Imyaka iingi pa numa, Samsone, uo batonkwele amenso no kumukaka mu minyololo ku baPelishiti, apepele kuli Yehova ati: “Mwe Shikulu Yehova, shi njibukisheni, shi nkoselesheni, umuku uno fye.” Yehova aibukishe Samsone pa kumupeela ubukose bwacila pa bwa buntunse pa kuti alandule abalwani ba kwa Lesa. (Abapingushi 16:28-30) Kumfwa pa lwa kwa Yeremia, Yehova alipaalile imibombele yakwe, kabili ukupepa kwa cine kwalibweshiwe mu Yerusalemu.

Umutumwa Paulo alembele ukuti, “Fyonse ifyalembelwe kale fyalembeelwe ku kutusambilisha, ukuti mu kutwalilila kabili mu kutukoselesha kwa malembo e mo tube no kucetekela.” (Abena Roma 15:4) Nga twaibukisha Yehova pa kucita ukufwaya kwakwe, nga fintu ababomfi bakwe aba busumino bacitile ku numa, kuti twacetekela ukuti Yehova akatwibukisha pa kutwafwa ukusanga ifyo tukabila cila bushiku, pa kutwafwilisha mu fya kwesha fyesu, na pa kutupususha lintu akaleta ubupingushi pa bashipepa.—Mateo 6:33; 2 Petro 2:9.