Ulupwa Lwa Kwa Yesu Lwaya Ku Yerusalemu

Muli ba April, Yosefe na Maria na bana babo, e lyo ne fibusa na balupwa lwabo balimine ubulendo bwa kuya ku Yerusalemu nga fintu balecita cila mwaka. Baleya mu kusefya umutebeto wa Ca Kucilila nge fyo babebele mu Mafunde ya kwa Lesa. (Amalango 16:16) Ukufuma ku Nasarete ukuya ku Yerusalemu pali amakilomita nalimo 120. Abantu baletemwa sana iyi nshita nga yafika kabili balebombesha. Pali iyi inshita, Yesu ali ne myaka 12, kabili na o wine alefwaisha ukuya ku Ca Kucilila no kuyaikala mupepi ne tempele na kabili.

Yesu no lupwa lwakwe tabaikeleko fye ubushiku bumo. Ubushiku bwa Ca Kucilila nga bwapita, palekonka “ubushiku bwa ntanshi ubwa Mutebeto wa Mukate Ushatutumuka” uwalebako pa nshiku 7. (Marko 14:12) Uyu mutebeto na o walebako mu nshiku sha Ca Kucilila. Kanshi palepita imilungu ibili ukutula apo balefumina ku mwabo ku Nasarete ukuya ku Yerusalemu, ukwikalako e lyo no kubwelelamo. Lelo muli ulya mwaka, kwali ifyacitike ilyo balebwelelamo ifyalengele bakokole.

Ilyo bali pa bulendo, Yosefe na Maria balemona kwati Yesu ali pali balupwa lwabo ne fibusa abaendeele pamo pa kubwelelamo ku Nasarete. Lelo mu nshita ya bushiku, ilyo baletuusha, basangile ukuti Yesu taali nabo. E ico baile ku kumufwaya mu bantu baendeele pamo nabo, lelo tabamusangile! Apo tabamusangile, Yosefe na Maria balibwelelemo ku Yerusalemu ku kumufwaya.

Balimufwaile ubushiku bonse, ukwabula ukumusanga. Na pa bushiku bwalenga shibili tabamusangile. Awe pa bushiku bwalenga shitatu, bailesanga umwana wabo mwi tempele, umwali imiputule iingi. Bamwene ekele na bakasambilisha abaYuda, alekutika no kubepusha amepusho. Aba bakasambilisha balipapile sana pa fyo aishibe.

Maria amwipwishe ati: “We mwana, cinshi ico watucushisha ifi? Mona, bawiso na ine natucula ukukufwaya.”—Luka 2:48.

Yesu alipapile ukuti tabaishibe uko engaba. E ico abepwishe ati: “Ico mulemfwaila cinshi? Bushe tamwaishiba ukuti mfwile ukuba mu ng’anda ya kwa Tata?”—Luka 2:49.

Ilyo Yosefe na Maria basangile Yesu, balibwelelemo nankwe ku Nasarete, kabili alitwalilile ukubanakila. Yesu alekula mu mano na mu mushinku. Nangu ca kutila Yesu ali umwaice, Yehova alimutemenwe, e lyo na bantu bene balimutemenwe. Ukufuma fye ku bwaice, Yesu alebika sana amano ku fya kwa Lesa kabili alenakila abafyashi bakwe.