Yesu Abuusha Umwana Wa Kwa Mukamfwilwa

Ilyo Yesu aundepe umubomfi wa mukalamba wa bashilika, afumine mu Kapernahumu no kuya ku musumba wa Naini, uwali lwa ku kapinda ka ku kulyo, apaali amakilomita ukucila pali 32. Aile na basambi bakwe e lyo na bantu bambi abengi abamukonkele. Afikile ku nse ya musumba wa Naini nalimo mu cungulo bushiku. Ilyo ashilaingila mu musumba, akumenye abaYuda abengi abalefuma mu musumba ninshi basendele icitumbi ca mulumendo uo baleya mu kushiika.

Nyina wa mulumendo e wali sana no bulanda. Aali ni mukamfwilwa kabili umulumendo uwafwile e mwana fye akwete. Ilyo umulume afwile, ashele fye no yu mwana. Afwile alimutemenwe sana pantu e walemusansamusha kabili eo alesuubila ukuti akamusunga ku ntanshi. Nomba na o alifwile. Ni nani wali no kulamusansamusha no kulamwafwa?

Ilyo Yesu amwene ifyo uyu mukamfwilwa aleloosha e lyo no bulanda ubo akwete, alimumfwilile sana uluse. Amwebele luse luse amashiwi ayalengele akwate isubilo lya kuti ifintu fyalaba bwino. Atile: “Leka ukulila.” Lyena alipaleme no kukumya ku musengele uo basendeelepo icitumbi. (Luka 7:13, 14) Ifyo alandile ne fyo acitile fyalengele abaleya mu kushiika uyu mulumendo beminine ilyo line fye. Abengi bafwile balipapile abati, ‘Cinshi alandile ifi, kabili finshi alacita?’

Cali shani kuli balya abalekonka Yesu abamweneko uko alecita ifipesha amano no kuposha abalwele abengi? Tabamwenepo Yesu abuusha umuntu uwafwa nangu line ku kale bamo abafwile balibuushiwe. E ico bafwile balefwaya ukumona nga ca kuti Yesu na o ali no kubuusha ulya umuntu uwafwa. (1 Ishamfumu 17:17-23; 2 Ishamfumu 4:32-37) Yesu atile: “We mulumendo, Ndekweba nati, Ima!” (Luka 7:14) Ifi fine e fyacitike. Umulumendo alimine, atendeka no kulanda! Lyena Yesu amutwele kuli nyina, na nyina alipapile kabili alitemenwe sana pantu ali no kulaikala no mwana wakwe na kabili.

Ilyo abantu bamwene ukuti ca cine umulumendo ali no mweo na kabili, balilumbenye Yehova, uupeela ubumi abati: “Kasesema mukalamba naima muli ifwe.” Bamo abailwike umwalolele ico Yesu acitile batile: “Lesa napempula abantu bakwe.” (Luka 7:16) Ululumbi lwa cintu ca kupapusha ico Yesu acitile lwalisalangene bwangu bwangu mu fifulo fya mupepi e lyo nalimo na mwi tauni lya Nasarete, umo Yesu akuliile, ilyali nalimo amakilomita 10 ukufuma mu Naini. Ifyo acitile fyalishibikwe na konse ku kapinda ka ku kulyo mpaka na ku Yudea.

Ifi fyacitike ninshi Yohane Kabatisha acili mu cifungo. E ico Yohane alefwaisha ukwishiba imilimo iyo Yesu alebomba. Abasambi bakwe balimushimikile pali ifi ifipesha amano ifyo Yesu acitile. Bushe Yohane acitile shani?