Ifipusho Ukufuma ku Babelenga

Bushe Maria uwaishileba nyina wa kwa Yesu kale kale aali pa bukulu lintu aile ku kutandalila umuntu wakwe Elisabete?

Ee, cimoneka kwati kale kale aali pa bukulu.

Muli Luka icipandwa 1, intanshi tubelengamo ulwa kwimita kwa kwa Elisabete, umukashi wa kwa shimapepo Sekaria, uwafyele Yohane (Kabatisha). Lintu Elisabete aali “mu mweshi uwalenga mutanda malaika Gabriele” atandalile Maria ku kumwishibisha ukuti aali no kwimita no kufyala “Umwana wa Wapulamo.” (Luka 1:26, 30-33) Lelo ni lilali lintu Maria aimite?

Ubulondoloshi bwa kwa Luka butwalilila ukushimika ukuti Maria apo pene fye aimine pa bulendo bwa kuya ku Yudea ku kutandalila umuntu wakwe uwali naimita Elisabete. Lintu aba banakashi babili bakumene, akana mwi fumo lya kwa Elisabete (kaYohane) kalitiinine. Elisabete alandile ulwa ‘bufyashi bwa mwi fumo lya kwa Maria,’ kabili aitile Maria “nyina wa kwa Shikulu.” (Luka 1:39-44) Insondwelelo yalungama kanshi ya kuti Maria kale kale alimite, ukuti aali pa bukulu lintu aile ku kumona Elisabete.

Luka 1:56 abelengwo kuti: “Awe Maria aikele nankwe nalimo imyeshi itatu, e lyo abweleele ku mwabo.” Ici cikomo tacilelungatika inshita ukukonka fye ubushiku bwa pali kalenda. Casosa ukuti “nalimo imyeshi itatu,” icingalenga Elisabete ukuba mu mweshi walenga 9 uwa kwimita kwakwe.

Pa numa ya kwaafwa Elisabete mu ciputulwa ca kupelako ica kwimita kwakwe, Maria alifumine ukulungama ku mwakwe ku Nasarete. Napamo Maria acimwene ukuti ilyo Elisabete aali no kupaapa (Yohane), pambi kwali no kubako abatandashi abengi, bamo pali bene kuti pambi baba fye ni balupwa. Ico kuti caba ca nsoni sana kabili ica museebanya ku mukashana uushaupwa uwali naimita. Bushe ifumo lya kwa Maria lyakwete imyeshi iinga lintu abwelelemo ku Nasarete? Apantu aikele na Elisabete “nalimo imyeshi itatu,” napamo Maria aali mu mweshi walenga butatu nelyo mu kubangilila kwa mweshi walenga bune uwa kwimita kwakwe lintu abwelele ku Nasarete.