Yesu Alanda Pa Kupokelela Abeni Na Pe Pepo

Yesu aile ku Betani, ku ng’anda ya kwa Maria na Marita. Umushi wa Betani wabelele ku kabanga ka Lupili lwa Miolife kabili apo wali, pali amakilomita yatatu ukufuma ku Yerusalemu. (Yohane 11:18) Marita na Maria, na ndume yabo Lasaro bali fibusa fya kwa Yesu, kabili ilyo aile ku mwabo balimupokelele bwino.

Lyali lishuko ukupokelela Mesia. Marita alefwaisha ukutangata Yesu, e ico atendeke ukupekanya ifya kulya ifingi. Ilyo Marita alepekanya ifya kulya, nkashi nankwe Maria aikele mupepi na Yesu kabili alekutika ku fyo alelanda. Ilyo papitile inshita, Marita aebele Yesu ati: “Mwe Shikulu, bushe tamusakamene ukuti nkashi nandi andekela ndebomba neka? E ico, mwebeni anjafweko.”—Luka 10:40.

Yesu takalipiile Maria, lelo afundile Marita ukuti taalingile ukubika fye amano ku kumutangata. Amwebele ati: “Marita, Marita, nausakamikwa no kupamfiwa ku fintu ifingi. Lelo finono fye e filekabilwa, nelyo cimo fye. Maria ena nasala icintu icisuma, kabili tapali uukamupokolola.” (Luka 10:41, 42) Yesu atile taalingile ukupoosa inshita iikalamba ku kupekanya ifya kulya ifingi pantu fya kulya ifinono fye e fyalekabilwa.

Ifyo Marita alefwaya ukucita tafyabipile pantu alefwaya ukupokelela bwino Yesu. Lelo apo apoosele inshita iikalamba ku kupekanya ifya kulya, taumfwileko ifyacindama ifyo Umwana wa kwa Lesa alesambilisha! Yesu atile, Maria asalile icintu icisuma, icali no kumwafwa ku ciyayaya, ico ifwe bonse tulingile ukusambililako.

Pa nshita imbi Yesu asambilishe abasambi bakwe isambililo limbi ilyacindama. Umusambi amwipwishe ukuti: “Mwe Shikulu, tusambilisheni ifya kupepa, nge fyo na Yohane asambilishe abasambi bakwe.” (Luka 11:1) Apa ninshi napapita umwaka umo na hafu ukutula apo Yesu asambilishishe abasambi ifya kupepa mu Lyashi lya pa Lupili. (Mateo 6:9-13) Lelo uyu musambi nalimo taalipo ilyo Yesu asambilishe abantu ifya kupepa. E ico Yesu alilandilepo na kabili pali fimo fimo ifyacindama. Lyena alandile pa cilangililo pa kuti abasambilishe ukuti balingile ukutwalilila ukupepa.

Yesu atile: “Nani pali imwe uwakwata umunankwe kabili uo engayako ubushiku pa kati no kumweba ati, ‘Mune, njashimako imikate itatu, pantu umunandi uuli pa lwendo naisa kabili nshikwete ifya kulya ifya kumupeela.’ No uli mu ng’anda ayasuka ati, ‘Wilampamfya. Ninkoma ku ciibi, kabili ine na bana bandi natulaala; te kuti njime nkupeele.’ Ndemweba nati, nangu taciba no kwima no kumupeela pa mulandu wa kuti munankwe, kuti aima no kumupeela ifyo alefwaya pa mulandu fye wa mupampamina wakwe.”—Luka 11:5-8.

Yesu talelanda ukuti Yehova aba nga uyu cibusa wa mu cilangililo uushabikile amano ku kwafwa umunankwe. Lelo aletusambilisha fye ukuti nga ca kuti umuntu kuti asuka ayafwa umunankwe nga atwalilila ukumupamfya, ninshi na Shifwe wa mu muulu kuti apeela ababomfi bakwe ifyo bakabila nga batwalilila ukumulomba! Yesu asosele no kuti: “Ndemweba nati, mulelomba, kabili bakamupeela; mulefwaya, kabili mukasanga; mulekonkonsha, kabili bakamwiswila. Pantu onse uulomba alapokelela, na onse uufwaya alasanga, na onse uukonkonsha balamwiswila.”—Luka 11:9, 10.

Pa kusondwelela ici cilangililo, Yesu alandile pa mufyashi umuntunse. Atile: “Mufyashi nshi pali imwe, uo umwana wakwe nga alomba isabi, engamupeela insoka ukucila ukumupeela isabi? Nelyo nga alomba ilini, nani engamupeela kaling’ongo? E ico imwe nga mwalishiba ukupeela abana benu ifya bupe ifisuma nangu ca kutila muli babifi, ninshi Shinwe wa mu muulu ena akacishapo ukupeela umupashi wa mushilo ku bamulomba!” (Luka 11:11-13) Aya mashiwi yalatukoselesha, pantu yatulanga ukuti, Shifwe alatwafwa nga twamulomba fimo!