Yesu Alanda Pa Filenga Umuntu Aaba Ne Nsansa

Yesu e lyo afumine fye mu kufunda abasambi bakwe na kabili pa fya kupepa, lelo te pepo fye ilyo abwekeshepo ukulandapo. Ilyo alecita ifipesha amano mu Galili, abantu baleti alebomfya amaka ya kwa kateka wa fibanda. Ilyo Yesu ali mu Yudea na kabili balimubepeshe ubufi bumo bwine.

Ilyo Yesu afumishe icibanda mu mwaume icalelenga alefilwa ukulanda, abantu balipapile lelo abalwani bakwe balifulilwe. Apo tabatemenwe, balibwekeshepo ukumubepesha ubufi bumo bwine, abati: “Afumisha ifibanda ku maka ya kwa Beelsebuli kateka wa fibanda.” (Luka 11:15) Bamo abalefwaya ukwishiba bwino Yesu, bamwebele ukuti abalange icishibilo ukufuma ku muulu.

Apo Yesu alishibe ukuti balemwesha fye, abaswike nga filya fine ayaswike bambi mu Galili. Abebele ukuti, ubufumu bonse ubuleilwisha ubwine bulonaika. Alandile no kuti: “Na Satana nga ailwisha umwine, ubufumu bwakwe bukeminina shani?” Lyene Yesu abebele uko alefumya amaka. Atile: “Nga ni ku munwe wa kwa Lesa e ko mfumisha ifibanda, Ubufumu bwa kwa Lesa ninshi nabwisa pali imwe.”—Luka 11:18-20.

Filya Yesu alandile pa “munwe wa kwa Lesa” nalimo fyalengele abantu ukwibukisha ifyacitike kale mu Israele. Ilyo Mose acitile icipesha amano mwi sano lya kwa Farao, abantu basanswile amashiwi abati: “Munwe wa kwa Lesa!” Kabili uyu wine “umunwe wa kwa Lesa” e walembele Amafunde Ikumi pa mabwe yabili ayapaapaatala. (Ukufuma 8:19; 31:18) Kanshi “umunwe wa kwa Lesa” e kutila umupashi wa mushilo, nelyo amaka ya kwa Lesa, e yalengele Yesu alefumya ifibanda no kundapa abalwele. E ico Ubufumu bwa kwa Lesa bwalishile pali aba balwani ba kwa Yesu, pantu Yesu, Imfumu yasontwa alecita ifipesha amano pa menso yabo.

Filya Yesu alefumya ifibanda cailangile fye apabuuta tuutu ukuti alikwata amaka ukucila Satana, nga filya fine ciba nga ca kuti umwaume uwakwatisha amaka acimfya umuntu uuli ne fyanso uulelonda isano. Yesu alibwekeshepo ukulanda icilangililo pa mupashi wakowela uwafumine mu muntu. Nga ca kuti uyu umwaume taleisushamo ifintu fisuma umo icibanda cafumine, ulya mupashi wakowela ulabwela ne mipashi yalekanalekana 7 kabili ilalenga imibele ya kulekelesha iya ulya muntu ukubipa ukucila iya pa kubalilapo. (Mateo 12:22, 25-29, 43-45) Ifi e fyo cali na ku luko lwa bena Israele.

Umwanakashi umo uwaleumfwa uko Yesu alelanda aya mashiwi alipapile, kabili atile: “Lyalipaalwa ifumo ilyakusendele na mabele ayo waonkeleko!” Abanakashi abaYuda balefwaisha ukukwata umwana uwali no kwisaba kasesema, maka maka Mesia. Kanshi uyu umwanakashi nalimo atontonkenye ukuti Maria ali uwapaalwa pa kukwata umwana uwalesambilisha bwino. Lelo Yesu alimulungike kabili amwebele icilenga umuntu aba ne nsansa. Atile: “Abapaalwa ni abo abomfwa no kukonka icebo ca kwa Lesa!” (Luka 11:27, 28) Yesu tabalile alandapo ukuti abantu balingile ukucindikisha Maria. Lelo alefwaya beshibe ukuti ukuba uwa cishinka kuli Lesa e kulenga umuntu aba ne nsansa sha cine, te lupwa ulo afumako nelyo ifyo akwata.

Nga fintu acitile mu Galili, Yesu na kabili alikalipiile abalefwaya ukuti abalange icishibilo ukufuma ku muulu. Abebele ukuti taali no kubalanga icishibilo nangu cimo kano fye “icishibilo ca kwa Yona.” Yona ali e cishibilo pantu aikele munda ya cisabi pa nshiku shitatu e lyo alishimikiile na bena Ninebe ukwabula umwenso, ne cafuminemo, balilapiile. Yesu atile: “Lelo moneni! uwacila Yona ali pano.” (Luka 11:29-32) Yesu alicilile na pali Solomone uo namfumu wa ku Sheba aileko mu kumfwa amano yakwe.

Yesu atile: “Ilyo umuntu asanika inyali, taibika umwafisama nangu kuikupikila mu museke, lelo aiteka pa ca kutekapo inyali.” (Luka 11:33) Yesu nalimo alelanda ukuti, ukusambilisha no kucita ifipesha amano kuli aba bantu cali kwati alefisa ulubuuto lwa nyali. Apo amenso yabo aya mampalanya tayali bwino, tabalemona imilimo Yesu alebomba.

Tapapitile na nshita ukutula apo Yesu afumiishe icibanda mu mwaume icalengele elalanda. Kanshi balya bantu baalingile ukulumbanya Lesa no kushimikilako bambi imilimo ya kwa Yehova. E ico Yesu alibasokele ati: ‘Cenjeleni ukuti ulubuuto ulwaba muli imwe lwiba imfifi. E ico, umubili wenu onse nga waba umwabuuta, uwabula imfifi nangu pamo, onse ukaba umwabuuta nga filya ciba ilyo inyali yasanika ulubuuto.’—Luka 11:35, 36.