Muleumfwa Ishiwi lya kwa Kacema Musuma

 1. Mulandu nshi Yesu nalimo alinganishishe abasambi bakwe ku mpaanga?

YESU alingenye bucibusa akwete na basambi bakwe kuli filya impaanga shumfwila kacema. (Yoh. 10:14) Ifi alandile fya cine. Impaanga shileshiba kacema wa shiko kabili shilomfwa kwi shiwi lyakwe. Umwaume umo alishininkishe ukuti ca cine impaanga shilomfwila kacema wa shiko, atile: “Ine na abo twali nabo twalefwaya ukuti impaanga shipalame pa kuti tushikope. Lelo impaanga tashapaleme pantu tashaishibe amashiwi yesu. Nomba ilyo akalumendo akaleshicema kaishile, kalishiitile kabili ilyo line fye shalikakonkele.”

2-3. (a) Bushe abasambi ba kwa Yesu bomfwa shani ishiwi lyakwe? (b) Finshi twalasambilila muli cino cipande e lyo ne cikonkelepo?

² Ifyacitikile ulya mwaume fitwibukishako amashiwi Yesu alandile pa mpaanga shakwe, e kutila abasambi bakwe. Atile: “Shikomfwa ishiwi lyandi.” (Yoh. 10:16) Nomba apo Yesu aba ku muulu kuti twaumfwa shani ishiwi lyakwe? Tulomfwa ishiwi lya kwa kacema wesu nga tulecita ifyo aletusambilisha.—Mat. 7:24, 25.

³ Muli cino cipande e lyo ne cikonkelepo twalasambilila fimo ifyo Yesu asambilishe. Nga fintu twalamona, Yesu atusambilishe pa fintu ifyo tufwile ukuleka ukucita e lyo ne fyo tufwile ukulacita. Intanshi twalasambilila pa fintu fibili ifyo kacema musuma atulesha ukucita.

 4. Ukulingana na mashiwi yaba pali Luka 12:29, cinshi cingalenga ‘twalasakamikwa’?

⁴ Belengeni Luka 12:29. Yesu aebele abasambi bakwe ukuti ‘tabalingile ukusakamikwa’ pa fyo bali no kusanga ifyo balekabila. Twalishiba ukuti ifyo Yesu atufunda fyalilungama kabili filabomba. Lelo inshita shimo cilatukosela ukukanasakamikwa. Mulandu nshi?

 5. Cinshi cingalenga abantu bamo ukusakamikwa?

⁵ Abantu bamo balasakamikwa pa fyo balasanga ifya kulya, ifya kufwala, e lyo no mwa kwikala. Nalimo bekala mu calo umo abantu abengi bapiina kabili umo cakosa sana ukusanga incito. Nelyo cilabafya ukusanga indalama isha kusakamaninamo indupwa shabo. Limbi uwalefwaya indalama isha kusakamaninamo ulupwa alifwa, e co ulupwa lwashala fye ukwabula uwa kulusakamana. Kabili icikuko ca COVID-19 calilenga abantu incito ukupwa. (Luk. Mil. 9:11) Nga ca kuti pali ifi twalandapo paliba ifyatucitikila nelyo ifintu fye fimbi ifyatucitikila, bushe kuti twakonka shani ifyo Yesu atwebele ukuti tatufwile ukulasakamikwa?

 6. Londololeni ifyacitikile umutumwa Petro bushiku bumo.

⁶ Bushiku bumo umutumwa Petro e lyo na batumwa bambi bali mu bwato pali Bemba wa Galili ninshi pali amabimbi. Lyena bamwene Yesu ninshi aleenda pali bemba. Petro atile: “Shikulu, nga ni mwe, njebeni njise kuli imwe pa menshi.” Ilyo Yesu amwebele ati “isa,” Petro alifumine mu bwato kabili “aendele pa menshi no kuya kuli Yesu.” Nomba finshi fyacitike? “Ilyo amwene amabimbi ayaleima pa mulandu wa cikuuku ca mwela, alyumfwile umwenso kabili ilyo atendeke ukwibila apundile ati: ‘Mwe Shikulu mpususheniko!’” Yesu atambalike ukuboko kwakwe no kumupususha. Ilyo Petro atwalilile ukulolesha Yesu, alitwalilile ukwenda pa menshi. Lelo ilyo aloleshe pa mabimbi alyumfwile umwenso kabili alitendeke ukwibila.—Mat. 14:24-31.

 7. Finshi tulesambilila ku fyacitikile Petro?

⁷ Kuti twasambililako ku fyacitikile Petro. Ilyo Petro afumine mu bwato taletiina amabimbi ukuti nalimo kuti aibila. Alefwaya ukutwalilila ukwenda pa menshi mpaka ayafika kuli Shikulu wakwe. Lelo mu cifulo ca kutwalilila ukulolesha Yesu, alyumfwile umwenso ilyo amwene amabimbi. Kwena te kuti twende pa menshi nga Petro. Na lyo line tulakwata amafya ayakabila ukuti twaba ne citetekelo pa kuti tushipikishe. Nga twaleka ukucetekela Yehova ne fyo atulaya, icitetekelo cesu kuti cacepa kabili kuti calenga twatendeka ukulasakamikwa kwati muntu uuleibila mu mabimbi. Te mulandu na mafya ubukulu ayo twingakwata tulingile ukulacetekela Yehova ukutila, kuti atwafwa. Kuti twacita shani pa kuti tulecetekela Yehova?

 8. Finshi ifingatwafwa ukukanalasakamikwa sana pa fyo tukabila?

⁸ Mu nshita ya kulasakamana sana pa mafya tulekwata tufwile ukucetekela Yehova. Tuleibukisha ukuti Shifwe uwatutemwa Yehova alitulaya ukuti akalatupeela ifyo tukabila nga twabika ifya Bufumu intanshi. (Mat. 6:32, 33) Kale alifikilishepo ifyo alaile. (Amala. 8:4, 15, 16; Amalu. 37:25) Nga ca kuti Yehova alasakamana ifyuni e lyo na maluba, ninshi tatulingile ukusakamana sana pa fyo twalalya e lyo ne fyo twalafwala. (Mat. 6:26-30; Fil. 4:6, 7) Nga filya fine umufyashi uwatemwa abana bakwe abapeela ifyo bakabila, Shifwe wa ku muulu na o alapeela abantu bakwe ifyo bakabila. Kanshi kuti twacetekela ukuti Yehova akalatusakamana.

 9. Finshi mwingasambilila ku fyacitikile abaupana bamo?

⁹ Natulande pa ca kumwenako icilelangilila ifyo Yehova engatupeela ifyo tulekabila. Abaupana bamo ababa mu mulimo wa nshita yonse, baile mu kusenda bankashi abaleikala ku ncende uko basungila imbutushi muli motoka yabo iya kale, pa kuti baye nabo mu kulongana kabili baendelepo ukucila pe awala limo. Munyinefwe atile: “Pa numa ya kulongana twaebele aba bankashi ukuti tuleya nabo ku ng’anda pa kuti tuyelila pamo ica kulya, lelo twaibukishe ukuti tatwakwete ifya kulya.” Nomba cinshi cacitike? Munyinefwe alondolwele ukuti: “Ilyo twafikile ku ng’anda twasangile nababika ifya kulya ifingi pa mwinshi lelo tatwaishibe abaletele. Yehova alitupeele ifyo twalekabila.” Inshita imbi motoka ya aba baupana yalyonaike. E yo balebomfya pa kuya mu kubila imbila nsuma, lelo tabakwete indalama sha kuilungishisha. Ilyo batwele motoka ku bakuilungisha pa kuti beshibe indalama bali no kupoosapo, kwaishile umwaume umo uwaipwishe ukuti: “Ni motoka ya ba nani iyi?” Munyinefwe ayaswike ukuti yali ni motoka yakwe lelo yalyonaike. Ulya mwaume atile: “Ubo te bwafya. Umwina mwandi alefwaya motoka ya ifi fine ne langi ili line. Kuti mwanshitisha shinga?” Munyinefwe alishitishe motoka yakwe kabili indalama ashitishe shali ishingi ica kuti ali no kushitamo motoka imbi. Atile: “Ala twalitemenwe icine cine bulya bushiku. Twalishibe ukuti ni Yehova e watwafwile.”

10. Bushe amashiwi yaba pa Amalumbo 37:5 yatukoselesha shani ukukanalasakamikwa pa fyo tulekabila?

¹⁰ Nga tuleumfwa kwi shiwi lya kwa kacema wesu umusuma no kuleka ukusakamikwa pa fyo tulekabila, tukacetekela ukuti Yehova akulatupeela ifyo tulekabila. (Belengeni Amalumbo 37:5; 1 Pet. 5:7) Baleni tontonkanyeni pa mafya twacilandapo mu paragrafu 5. Ukufika pali ino inshita nalimo Yehova abomfya umutwe wa lupwa nelyo abatwingisha incito ukutupeela ifyo tukabila cila bushiku. Nga ca kuti umutwe wa lupwa takwete amaka ya kucita ifyo, nelyo incito yapwa, Yehova kuti abomfya inshila imbi ukutupeelelamo ifyo tulekabila. Te mulandu ne nshila engabomfya icishinka ca kuti ukutupeela kwena akatupeela ifyo tukabila. Nomba natulandeko pali cimbi ico kacema umusuma atulesha ukucita.

11. Finshi Yesu atwebele ukuleka ukucita ifyaba pali Mateo 7:1, 2 kabili mulandu nshi limo cafisha ukuleka ukucita ifyo Yesu alandile?

¹¹ Belengeni Mateo 7:1, 2. Yesu alishibe ukuti abantu abashapwililika balabika sana amano ku filubo fya banabo. E calengele alande ukuti “mwilapingula.” Nalimo kuti twaesha apo twingapesha ukukanapingula Abena Kristu banensu. Lelo inshita shimo tulafilwa ukukanabapingula. Finshi twingacita nga twaishiba ukuti inshita shimo tulapingula bambi? Mulekonka ifyo Yesu alandile kabili mulebombesha ukuleka ukupingula bambi.

12-13. Bushe ukutontonkanya pa fyo Yehova alemona Imfumu Davidi kuti kwatwafwa shani ukukanalapingula abantu?

¹² Kuti twasambililako nga tuletontonkanya pa fyo Yehova aba. Amonamo fye ifisuma mu bantu. Tontonkanyeni pa fyo acitile ilyo Davidi abembwike. Davidi acitile ubucende na Bati-sheba kabili aipaishe no mulume wakwe. (2 Sam. 11:2-4, 14, 15, 24) Pa mulandu ne fyo Davidi acitile, ena no lupwa lwakwe e lyo na bakashi bakwe bonse balikwete amafya. (2 Sam. 12:10, 11) Inshita imbi Davidi alangile ukuti tacetekele Yehova ilyo aile mu kupenda abashilika abena Israele icintu ico Yehova ashamwebele ukucita. Nalimo icalengele Davidi acite ifi cilumba, pantu alikwete ibumba lya bashilika abena Israele ilikalamba kabili alicetekele ukutila kuti lyamucingilila. Finshi fyafuminemo mu fyo Davidi acitile? Abena Israele nalimo 70,000 balifwile ku cikuko!—2 Sam. 24:1-4, 10-15.

¹³ Nga ca kuti mwaleikala mu Israele pali ilya nshita, nga finshi mwaletontonkanya pali Davidi? Bushe nga mwaletontonkanya ukuti Yehova talingile ukumweleela? Ifi te fyo Yehova aletontonkanya. Alemona pa fyo Davidi ali uwa cishinka ubumi bwakwe bonse e lyo ne fyo alapiile icine icine. Ici calengele ukuti Yehova eleele Davidi pa membu ishikalamba isho acitile. Yehova alishibe ukuti Davidi alimutemenwe sana kabili lyonse alefwaya ukucita icalungama. Ala tulatasha sana ifi Yehova abika fye amano ku fisuma ifyo tucita!—1 Isha. 9:4; 1 Imila. 29:10, 17.

14. Finshi fingalenga Abena Kristu ukukanapingula abantu?

¹⁴ Apo Yehova alishiba ukuti tatwapwililika, tenekela ukuti te kuti tulufyanye. Kanshi na ifwe tatufwile ukulaenekela bambi ukuti te kuti balufyanye lelo tufwile ukubika amano ku fisuma ifyo bacita. Calyanguka sana ukumona ifilubo ifyo abantu bacita e lyo no kubapingula. Lelo umuntu uupashanya Yehova ena alabomba bwino na bantu bambi nangu ca kutila alamona ne fyo balufyanya. Ilibwe lya daimondi nga tabalaliputaula kabili tabalaliwamya talimoneka bwino, lelo uwaishiba ili libwe aleshiba ukuti libwe lyakosa umutengo kabili aleshiba no kuti nga baliwamya no kuliputaula lilamoneka bwino. Nga filya fine Yehova na Yesu baba, tatufwile ukulabika sana amano ku fyo abantu balufyanya lelo tufwile no kulamona imibele yabo iisuma.

15. Bushe ukutontonkanya pa fyo abantu balepitamo kuti kwatwafwa shani ukukanalabapingula?

¹⁵ Natusambilila ukuti tulingile ukulamona ifisuma mu bantu. Nomba finshi fimbi ifingatwafwa ukukanalabapingula? Mule-esha ukutontonkanya pa fyo balepitamo. Natulandeko pa ca kumwenako. Bushiku bumo ilyo Yesu ali pe tempele alimwene mukamfwilwa umupiina aleposa mu cipao utundalama tubili. Yesu talandile ukuti: “Isho abikilemo nashicepa sana.” Mu nshita ya kubika amano ku ndalama isho mukamfwilwa apooselemo, Yesu atontonkenye pa calengele abikemo e lyo na pa mafya akwete kabili alimutashishe sana pali bukapekape bwakwe.—Luka 21:1-4.

16. Finshi mwingasambilila ku fyacitikile ba Veronica?

¹⁶ Natulandeko pa fyacitikile ba nkashi Veronica ifyalatwafwa ukwishiba umulandu cacindamina ukutontonkanya pa fyo abantu bambi balepitamo. Mu cilonganino bali mwali bankashi abashimbe abakwete umwana umulumendo. Ba Veronica batile: “Nalemona kwati aba nkashi no mwana wabo tabaleisa sana mu kulongana e lyo no kubila imbila nsuma. Namwene kwati tabalebika amano ku fya kwa Lesa. Lelo bushiku bumo nalibombelepo na ba bankashi mu mulimo wa mwi bala. Balondolwele ukuti balikwete ubwafya pantu umwana wabo umulumendo alefulungana limo. Uyu nkashi alebombesha pa kusanga umwa kwikalila e lyo na pa kukosha bucibusa bwabo na Yehova. Inshita shimo umwana wabo nga alwalisha baleya mu kulongana ku cilonganino cimbi.” Ba Veronica batile: “Nshaishibe ukuti e mafya bakwete. Pali ino nshita nalitemenwako uyu nkashi kabili nalitemwa ne fyo abombesha pa kuti atwalilile ukubombela Yehova.”

17. Ukulingana na mashiwi yaba pali Yakobo 2:8, finshi tulingile ukucita?

¹⁷ Finshi tufwile ukucita nga twaishiba ukuti tulapingula Abena Kristu banensu? Tuleibukisha ukuti tufwile ukutemwa bamunyinefwe. (Belengeni Yakobo 2:8.) Kabili tufwile ukupepa kuli Yehova no kumupaapaata ukuti atwafwe ukuleka ukupingula abantu. Nga twapepa tulingile ukucitapo cimo. Kuti twasangako inshita ya kuba pamo na uyo muntu twalelandapo ifyabipa. Ici kuti calenga twamwishiba bwino. Kuti twabombako nankwe mu mulimo wa kubila imbila nsuma nelyo kuti twamwita pa kuti tuliile pamo ica kulya. Ilyo twile tulemwishiba, kuti twapashanya Yehova na Yesu nga tulebika amano ku fisuma ifyo acita. Nga tulecita ifi ninshi tuleumfwa kwi shiwi lya kwa kacema musuma uwatwebele ukuti mwilapingula.

18. Bushe finshi tufwile ukulacita pa kulanga ukuti tuleumfwa kwi shiwi lya kwa kacema musuma?

¹⁸ Nga filya fine impaanga shumfwa ishiwi lya kwa kacema, abasambi ba kwa Yesu nabo balomfwa ishiwi lyakwe. Nga tule-esha na maka ukukanalasakamikwa pa fyo tulekabila e lyo no kuleka ukupingula bambi, Yehova na Yesu bakatupaala. Nampo nga twaba pa “mukuni unono” nelyo pa “mpaanga shimbi,” natutwalilile ukulaumfwa kwi shiwi lya kwa kacema musuma. (Luka 12:32; Yoh. 10:11, 14, 16) Mu cipande cikonkelepo, tukasambilila pa fintu fibili ifyo Yesu aebele abasambi bakwe ukuti e fyo bafwile ukulacita.