Kangalila Wa Cishinka Alingile Ukuiteyanya

Yesu atile abakayaikala ku muulu, ni balya fye ababa mu “mukuni unono.” (Luka 12:32) Lelo abakekala ku muulu bafwile ukutasha sana pali ili ishuko. Na kuba Yesu asosele no kuti abakateka mu Bufumu balingile ukuba abaiteyanya.

E ico Yesu aebele abasambi bakwe ukulalolela ukubwela kwakwe. Atile: “Ipekanyeni, lekeni na malampi yenu yaleaka, kabili mube nga bantu abalelolela shikulwibo ilyo abwela ku bwinga, pa kuti ilyo afika no kukonkonsha, kuti bamwiswila apo pene. Balishuka balya abasha abo shikulwibo pa kwisa asanga balelola!”—Luka 12:35-37.

Abasambi balishibe ico Yesu alelandapo. Abasha abo alandilepo bali abaiteyanya kabili balelolela ukuti shikulu wabo akabwele. Yesu alondolwele ukuti: “[Shikulu wabo] nga aisa mu bulinde bwa bubili [ukufuma muli ba 21:00hrs ukufika muli ba 24:00hrs], nangu mu bwa butatu [ukufuma 24:00hrs ukufika muli ba 03:00hrs, ulucelo], no kubasanga balelola, balipaalwa balya basha!”—Luka 12:38.

Ico Yesu alebafunda, te kuba fye abasha nelyo ababomfi ba pa ng’anda abacincila. Ne co twasosela ifi, ni co Yesu, Umwana wa muntu ali-ibikilemo muli ici cilangililo. Aebele abasambi bakwe ukuti: “Na imwe mube abaiteyanya, pantu pa nshita mushile-enekela, e po Umwana wa muntu akeshila.” (Luka 12:40) Kanshi Yesu ali no kwisa na kabili. E ico alefwaya abasambi bakwe, maka maka ababa mu “mukuni unono” ukuba abaiteyanya.

Petro alefwaya ukwishiba umo Yesu aloseshe, e ico aipwishe ati: “Mwe Shikulu, bushe ni kuli ifwe mulelanda ici cilangililo nelyo ni kuli bonse?” Pa kwasuka Petro, Yesu alandile icilangililo icalingene ne co abebelepo ku numa. Atile: “Nga kanshi nani kangalila wa cishinka, uwashilimuka, uo shikulu wakwe akalaashika pa babomfi bakwe ukuti alebapeela ifya kulya pa nshita yalinga? Alipaalwa ulya musha, nga shikulu wakwe pa kwisa amusanga alecita ifyo! Ndemweba icine cine nati, akamulaashika pa fyuma fyakwe fyonse.”—Luka 12:41-44.

Mu cilangililo ca kubalilapo, “shikulu” uo Yesu alelandapo, afwile ukuba ni Yesu wine, Umwana wa muntu. Kanshi kuti twatila, abetwa ukuti “kangalila wa cishinka” bantu bamo ababa mu “mukuni unono” kabili abakapeelwa Ubufumu. (Luka 12:32) Ico Yesu alelandapo ca kuti, bamo ababa muli ili ibumba bakakwata umulimo wa kupeela “ababomfi bakwe” ifya kulya “pa nshita yalinga.” Kanshi Petro na basambi bambi abo Yesu aleliisha atemwa ukusambilisha ifya kwa Lesa balishibe ukuti ku ntanshi Umwana wa muntu akesa. Kabili pali ilya nshita kukaba ibumba ilikalaliisha abasambi ba kwa Yesu, atemwa “ababomfi bakwe.”

Yesu alandile amashiwi na yambi ayalangile ico abasambi bakwe balingiile ukuiteyanya no kuba abalola. Ico alandiile ayo mashiwi, ni co talefwaya abasambi bakwe ukubwelela inuma no kutendeka ukucusha bamunyinabo. E ico abasokele ati: “Lelo umusha ulya nga mu mutima wakwe atila, ‘Shikulu akokola ukwisa,’ kabili alapuma ababomfi abaume na babomfi abanakashi, alalya no kunwa no kukolwa, shikulu wa musha ulya akesa pa bushiku ubo ashilemwenekela ne nshita iyo ashishibe, kabili akamukanda icabipisha no kumubika pamo na bashaba na cishinka.”—Luka 12:45, 46.

Yesu atile “aishile ku kusonteka umulilo pano isonde.” Ifi fine e fyacitike pantu fimo ifyo alesambilisha abantu fyalengele batendeka ukukansana, ne ci calengele ukuti abengi baleke ukukonka ifisambilisho fya bufi ne ntambi. E ico abantu abalingile ukwikatana sana balepusana. ‘Wishi alipusene no mwana umwaume, kabili umwana umwaume alipusene na wishi, nyina alipusene no mwana umwanakashi, no mwana umwanakashi alipusene na nyina, nyinafyala alipusene na nafyala, na nafyala alipusene na nyinafyala.’—Luka 12:49, 53.

Ifyo alandile fyakumine sana abasambi bakwe. Lelo pa numa, Yesu atendeke ukulanda kwi bumba, umwafulile abantu abakeene ukusumina ukuti Yesu ni Mesia. Abebele ati: “llyo mwamona ikumbi lileima ku masamba, apo pene mutila, ‘Imfula yalaisa,’ kabili e fyo ciba. Kabili ilyo mwamona umwela wa ku kapinda ka ku kulyo ulepuupa, mutila, ‘kwalakaba,’ kabili e fyo ciba. Mwe ba bumbimunda mwe, mwalishiba ukubebeta imimonekele ye sonde no muulu ku kwishiba ifyo imiceele yalaba, lelo cinshi mushaishibila ifya kubebeta inshita ino?” (Luka 12:54-56) Ukwabula no kutwishika aba bantu tabaiteyenye.