Ico Abayuda Bali No Konawilwa Ku Ntanshi

Yesu alyeseshe imiku iingi sana ukwafwa abantu ukuba ifibusa fya kwa Lesa. Na pa numa ya kulanshanya na bali pa nse ya ng’anda ya muFarise, alyafwile abantu ukuba ifibusa fya kwa Lesa.

Bamo pali aba bamwebele pa busanso bwacitike. Balandile “pa bena Galili abo [kateka, umwina Roma, Ponti] Pilato asakeenye umulopa wabo na malambo yabo.” (Luka 13:1) Cinshi balandiile pali ubu busanso?

Nalimo abena Galili abo baalandilepo, ni balya abaipawe ilyo abaYuda bafulilwe no kwimya ifyongo pali filya Pilato abomfeshe indalama sha mwi tempele pa kupanga umufoolo, uwa kutwala amenshi mu Yerusalemu. Abayafwile Pilato ukupoka ishi indalama bafwile bali balashi ba pe tempele. Abalandile pali ubu busanso nalimo balemona kwati icalengele abena Galili babasanse, ni co bali babembu. Lelo Yesu alikeene.

Abepwishe ati: “Bushe muletila balya abena Galili bali ababembu nga nshi ukucila abena Galili bambi bonse, e mulandu ici cabacitikile?” Alishibe ukuti te calengele. Lelo alandile pali ubu ubusanso pa kusoka abaYuda. Abebele ati: “Nga tamulapiile, mukonaulwa bonse filya fine.” (Luka 13:2, 3) Yesu alandile pa busanso na bumbi ubwacitike muli shilya nshiku, nalimo pa mulandu wa mufoolo wakuulilwe. Abepwishe ati:

“Balya abantu 18 abo ulupungu lwawililepo mu Siloamu, no kubepaya, bushe muletila bali ababi nga nshi ukucila abantu bonse bambi abaikala mu Yerusalemu?” (Luka 13:4) Abantu nalimo balemona kwati icalengele balya bantu ukufwa, ni co bali babifi. Yesu na kabili alikeene. Alishibe ukuti nalimo icalengele kube ubu ubusanso ni “nshita ya macushi ne nshita ya fintu fyabula ukwenekela.” (Lukala Milandu 9:11) Na lyo line, abantu baalingile ukusambililako ku cacitike. Yesu atile: “Nga tamulapile, mukonaulwa bonse filya fine.” (Luka 13:5) Mulandu nshi alandiile sana pa kulapila pali iyi nshita?

Ni co aali mupepi no kupwisha umulimo wakwe uwa pe sonde, kabili pa kuti abantu beshibe ico alelandapo abebele icilangililo ati: “Umuntu umo ali ne cimuti ica mukunyu icalimbilwe mwi bala lyakwe ilya myangashi, kabili aile mu kufwayako ifisabo, lelo tasangileko nangu cimo. Awe aebele uwalebomba mwi bala lyakwe ilya myangashi ati, ‘Mona, imyaka yaba nomba itatu iyo njisa ku kufwaya amakunyu kuli ici cimuti, lelo nshisangako nangu cimo. Citeme! Nga cinshi cileonawila fye umushili?’ Na o pa kumwasuka atile, ‘Mwe Shikulu, mucileke na uno mwaka, pa kuti ndimemo no kubikamo umufundo; kabili nga catwala ifisabo ku ntanshi, awe cikawama; lelo nga tacitwele, mukaciteme.’”—Luka 13:6-9.

Pa myaka ukucila pali itatu, Yesu alyeseshe ukwafwa abaYuda ukuba ne citetekelo. Lelo nangu ca kuti alibombeshe sana, banono fye bali abasambi bakwe. Lelo mu mwaka walenga bune, alibombeshe sana. Kanshi filya aleshimikila abaYuda mu Yudea na mu Perea e lyo no kubasambilisha, cali kwati aleliminina apali icimuti ca mukunyu no kubikapo umufundo. Cinshi cafuminemo? AbaYuda abanono fye e bamucetekeele. Uluko lonse lwalikeene ukulapila kabili lwalingile fye ukonaulwa.

Pa bushiku bwe Sabata, ninshi papita fye inshiku sha kupenda, na kabili cali-ilangile fye apabuuta tuutu ukuti abengi tabamucetekeele. Ilyo Yesu alesambilisha abantu mwi sunagoge, amwene umwanakashi uwali uwakongama pa myaka 18 pa mulandu wa cibanda icalemucusha. Yesu alimumfwilile uluse, e ico amwebele ati: “We mwanakashi, wapola ku bulwele bobe.” (Luka 13:12) Yesu abikile iminwe pali ena, kabili ilyo line fye alyololweke, atendeka no kulumbanya Lesa.

Ilyo umukalamba we sunagoge amwene ifyacitike, alifulilwe kabili atile: “Kwaba inshiku 6 isha kubombamo imilimo; e ico muleisa mu kundapwa muli ishi inshiku, te pa bushiku bwe Sabata iyo.” (Luka 13:14) Uyu muntu taaletila, Yesu taakwete amaka ya kundapa, lelo alekalipila abantu abaleisa ku kundapwa pe Sabata! Yesu ayaswike ati: “Mwe ba bumbimunda mwe, bushe nani pali imwe uushikakula ing’ombe yakwe nelyo impunda yakwe mwi tanga pa bushiku bwe Sabata no kuitwala ku kunwa amenshi? Bushe kanshi tacilingile ukuti mposhe uyu mwanakashi, umwana wa kwa Abrahamu, pa bushiku bwe Sabata, uo Satana akakile kuli ubu bulwele, pa myaka 18?”—Luka 13:15, 16.

Abalemulwisha balyumfwile insoni, lelo abantu abalongene balitemenwe ilyo bamwene ifya maka ifyo Yesu alecita. Lyena na mu Yudea mwine, Yesu abwekeshepo ukubeba ifilangililo fibili umwaba ubusesemo ubulanda pa Bufumu ifyo alandilepo na kabili ilyo ali mu bwato pali Bemba wa Galili.—Mateo 13:31-33; Luka 13:18-21.