Ilyashi ilyacindama ilyo Baibo ilandapo sana Bufumu bwa kwa Lesa. Yehova akabomfya Ubufumu bwakwe pa kufikilisha ubufwayo bwakwe ubwa kulenga isonde ukuba paradaise. Bushe Ubufumu bwa kwa Lesa cinshi? Twaishiba shani ukuti ubu Ubufumu bwalitendeka ukuteka? Finshi bwacitapo? Kabili finshi bukacita ku ntanshi? Twala-asuka aya mepusho muli lino isambililo e lyo na mu masambililo yabili ayakonkelepo.

1. Bushe Ubufumu bwa kwa Lesa cinshi, kabili nani Imfumu ya ubu Ubufumu?

Ubufumu bwa kwa Lesa buteko ubo Yehova Lesa abikako. Imfumu ya ubu Ubufumu ni Yesu Kristu kabili atekela ku muulu. (Mateo 4:17; Yohane 18:36) Baibo ilanda pali Yesu ati: “Akaba imfumu umuyayaya.” (Luka 1:32, 33) Apo Yesu e Mfumu ya Bufumu bwa kwa Lesa, akalateka bonse abakalaikala pe sonde.

2. Ni bani bateka na Yesu?

Yesu tateka eka. “Abantu ukufuma mu mitundu yonse, mu ndimi, mu bantu na mu nko . . . bakaba ishamfumu ishikalateka isonde.” (Ukusokolola 5:9, 10) Ni banga bakalateka na Kristu? Ukutula apo Yesu aishiile pano isonde, abantu abengi nga nshi balisalapo ukuba abasambi bakwe. Lelo bantu fye 144,000 e bakalateka na Yesu ku muulu. (Belengeni Ukusokolola 14:1-4.) Abena Kristu bambi abashala bakalaikala pano isonde kabili bakalatekwa no bu Ubufumu.—Amalumbo 37:29.

3. Bushe Ubufumu bwa kwa Lesa bwacila shani pa mabuteko ya bantuse?

Nangu ca kuti bakateka abantunse kuti baesha ukucita ifintu ifisuma, tabakwata amaka ya kucita fyonse ifyo balefwaya. Kabili nalimo bakateka abengabapyana kuti baba bakaitemwe kabili nalimo te kuti balefwaya ukwafwa abantu. Lelo takwakabe uukapyana Yesu Imfumu ya Bufumu bwa kwa Lesa. Lesa alibikako “ubufumu ubushakatale abonaulwa.” (Daniele 2:44) Yesu akalateka isonde lyonse, kabili takabe na kapaatulula ilyo akalateka. Aliba no kutemwa, wa cikuuku, kabili wa mulinganya. Na kabili akalasambilisha abantu ukuba ne yi imibele.—Belengeni Esaya 11:9.

4. Ubufumu ubwakwatisha amaka e bukalateka isonde lyonse

Yesu Kristu alikwata amaka ya kuteka ukucila kateka uuli onse. Belengeni Mateo 28:18, lyena lanshanyeni ici cipusho:

• Bushe amaka Yesu akwata yacila shani amaka bakateka abantunse bakwata?

Amabuteko ya bantunse yalaluka-aluka, kabili cila kateka ateka fye icalo cimo, tateka isonde lyonse. Inga Ubufumu bwa kwa Lesa bwena? Belengeni Daniele 7:14, lyena lanshanyeni aya mepusho:

• Cinshi twingalandila ukuti cikawama sana ifi Ubufumu bwa kwa Lesa ‘bushakonaulwe’?

• Bushe muletontonkanya ukuti tukanonkelamo shani ifi Ubufumu bwa kwa Lesa bukalateka isonde lyonse?

5.Ubufumu bwa kwa Lesa bukafumyapo amabuteko ya bantunse

Mulandu nshi Ubufumu bwa kwa Lesa bufwile ukufumishapo amabuteko ya bantunse? Tambeni VIDIO, lyena lanshanyeni icipusho cakonkapo.

VIDIO: Bushe Ubufumu bwa kwa Lesa ni Cinshi?—Iyo Baipifya (1:41)

• Finshi ficitika ifi abantunse bateka abantu banabo?

Belengeni Lukala Milandu 8:9, lyena lanshanyeni aya mepusho:

• Bushe mulemona ukutila kuti cawama Ubufumu bwa kwa Lesa nga bwafumyapo amabuteko ya bantunse? Cinshi mwa-asukila ifyo?

6. Yesu na bo akalateka nabo mu Bufumu bwa kwa Lesa balitwishiba bwino

Apo Yesu Imfumu yesu alipo umuntunse, kuti ‘atulangulukilako pali ifi tushapwililika.’ (AbaHebere 4:15) Na kabili abaume na banakashi aba cishinka 144,000 abakalateka na Yesu, Yehova abasala “ukufuma mu mitundu yonse, mu ndimi, mu bantu na mu nko.”—Ukusokolola 5:9.

• Bushe mwaumfwa shani ifi mwaishiba ukuti Yesu na bo akalateka nabo balishiba ifyo tumfwa na mafya tukwata? Cinshi mwa-asukila ifyo?

7. Ubufumu bwa kwa Lesa bwalikwata amafunde ayasuma, ukucila amafunde ya mabuteko ya bantunse

Aba mu mabuteko bapanga amafunde ayo balemona ukutila kuti yawamina abantu no kubacingilila. Ubufumu bwa kwa Lesa nabo bwalikwata amafunde ayo abo buteka bafwile ukulakonka. Belengeni 1 Abena Korinti 6:9-11, lyena lanshanyeni aya mepusho:

• Bushe muletontonkanya ukuti mu calo mukaba shani ilyo abantunse bonse bakalakonka amafunde ya kwa Lesa?a

• Bushe muletontonkanya ukuti caliba fye bwino ifi Yehova enekela abakalatekwa no Bufumu bwakwe ukulakonka aya mafunde? Cinshi mwa-asukila ifyo?

• Finshi filanga ukuti no muntu uushikonka amafunde ya kwa Lesa kuti ayaluka?—Moneni icikomo 11.

IFYO MUSAMBILILE

Ubufumu bwa kwa Lesa buteko bwa cine cine ubwaba ku muulu, kabili bukalateka isonde lyonse.

Ukupitulukamo

• Ni bani bakalateka mu Bufumu bwa kwa Lesa?

• Bushe Ubufumu bwa kwa Lesa bwacila shani pa mabuteko yonse aya bantuse?

• Finshi Yehova enekela abakalatekwa no Bufumu bwakwe ukulacita?

ISHIBILENIPO NA FIMBI

Belengeni ifyo Yesu asambilishe pa ko Ubufumu bwa kwa Lesa bwabela.

“Bushe Ubufumu bwa kwa Lesa Bwaba mu Mutima Wenu?” (Icipande ca pa jw.org)

Mulandu nshi Inte sha kwa Yehova basalilapo ukuba aba cishinka ku Bufumu bwa kwa Lesa ukucila ukuba aba cishinka ku mabuteko ya bantunse?

Baletungilila fye Ubufumu bwa kwa Lesa (1:43)

Moneni ifyo Baibo yalanda pa bantu 144,000 abo Yehova asala ukuteka pamo na Yesu.

“Ni Bani Baya ku Muulu?” (Icipande ca pa jw.org)

Cinshi calengele umwanakashi uwali mu cifungo ashininkishe ukuti Lesa akafumyapo ulufyengo?

“Ifyo Cali pa Kuti Njishibe Icalenga mu Calo Mube Ulufyengo” (Loleni!, November 2011)

Yesu asambilishe abasambi bakwe ukuti tabalingile ukuba aba “muli ici calo.” (Yohane 15:19) Mu kukanaba aba muli ici calo mwaba no kukanaitumpa mu fikansa fya calo no kulwako inkondo. Ukulanda fye icishinka te lyonse canguka ukukanaitumpa mu fya calo. Inshita shimo kuti batupumya pa mulandu wa kukanaitumpa mu fya calo. Nomba finshi tufwile ukucita pa kuti twilaitumpa mu fya calo no kutwalilila ukuba aba cishinka kuli Yehova Lesa?

1. Bushe Abena Kristu ba cine bamona shani amabuteko ya bantunse?

Fwe Bena Kristu twalicindika ubuteko. Tulakonka ifyo Yesu alandile ukuti “ifya kwa Kaisare mulepeela Kaisare.” Kanshi tulomfwila amafunde ya buteko pamo ngo kulipila imisonko. (Marko 12:17) Baibo isambilisha ukuti ico amabuteko ya bantunse yatekela ni co Yehova e wayasuminisha. (Abena Roma 13:1) Nomba twalishiba ukuti amabuteko ya bantunse tayakwata amaka ya kucita ifintu fyonse. E ico twacetekela ukuti Lesa akabomfya Ubufumu bwakwe ubwa ku muulu pa kufumyapo amafya fwe bantunse tukwata.

2. Kuti twalanga shani ukuti tatuitumpa mu fya calo?

Nga filya fine Yesu ashaleitumpa mu fikansa fya calo, na ifwe tatuitumpa mu fikansa fya calo. Ilyo abantu bamwene icipesha amano cimo ico Yesu acitile, balefwaya ukuti abe imfumu yabo pano isonde, lelo alikeene. (Yohane 6:15) Cinshi akaanine? Yesu alandile ukuti, “Ubufumu bwandi te bwa pano calo.” (Yohane 18:36) Apo tuli basambi ba kwa Yesu, tulalanga ukuti tatuitumpa mu fya calo mu fintu ifingi. Ku ca kumwenako, tatulwako inkondo. (Belengeni Mika 4:3.) Kwena tatwasuula ifishibilo fya calo pamo nga flagi, lelo tatufipeela umucinshi uo tulingile ukupeela Lesa. (1 Yohane 5:21) Na kabili tatutungilila akabungwe ka fikansa fya calo nangu kamo nelyo intungulushi ya fikansa fya calo. Nga tulecita ifi twalandapo e lyo na fimbi ifilanga ukuti tatuitumpa mu fya calo, tulanga ukuti tuli ba cishinka ku Bufumu bwa kwa Lesa.

SAMBILILENI NA FIMBI

3. Abena Kristu ba cine tabaitumpa mu fya calo

Yesu na basambi bakwe tabaleitumpa mu fya calo. Belengeni Abena Roma 13:1, 5-7 na 1 Petro 2:13, 14. Lyena tambeni VIDIO no kulanshanya amepusho yakonkapo.

VIDIO: Abena Kristu ba Cine Tabaitumpa mu fya Calo—Ulubali 1 (4:28)

• Mulandu nshi tulingile ukulacindikila ubuteko?

• Ni nshila nshi shimo isho tulangilamo ukuti tulanakila ubuteko?

Ilyo kuli inkondo, ifyalo fimo ifitila tafilelwako, filatungilila ifyalo ifilelwa. Bushe ukukanaitumpa mu fya calo kwalola mwi? Belengeni Yohane 17:16. Lyena tambeni VIDIO no kulanshanya icipusho cakonkapo.

VIDIO: Abena Kristu ba Cine Tabaitumpa mu fya Calo—Ulubali 2 (3:11)

• Bushe ukukanaitumpa mu fya calo kwalola mwi?

Kuti mwacita shani nga ca kuti ubuteko bwamweba ukucita ifintu ifyapusana ne fyo amafunde ya kwa Lesa yalanda? Belengeni Imilimo 5:28, 29. Lyena tambeni VIDIO no kulanshanya amepusho yakonkapo.

VIDIO: Abena Kristu ba Cine Tabaitumpa mu fya Calo—Ulubali 3 (1:18)

• Nga ca kuti amafunde ya mabuteko ya bantunse yapusana na mafunde ya kwa Lesa, mafunde nshi mulingile ukukonka?

• Bushe kuli na fimbi ifyo muletontonkanya ifingalenga mwakaana ukumfwila amafunde ya buteko?

4. Mwilaitumpa mu fya calo mu fyo mutontonkanya na mu fyo mucita

Belengeni 1 Yohane 5:21. Lyena tambeni VIDIO no kulanshanya amepusho yakonkapo.

VIDIO: Umulandu Abena Kristu ba Cine Balingile Ukubela Abashipa—Pa Kukanaitumpa mu fya Calo (2:49)

• Muli vidio twatamba, cinshi calengele ba Ayenge basalepo ukukanaingila mu kabungwe ka fikansa fya calo, nelyo ukucitako ifintu ifyali no kulenga bapeela umucinshi balingile ukupeela Yehova ku fintu fimbi, pamo ngo kupika salyuti kuli flagi?

• Bushe mulemona ukuti ifyacitile ba Ayenge fyali fye bwino?

Fintu nshi fimbi ifingacitika ifingalenga catukosela ukukanaitumpa mu fya calo? Tambeni VIDIO, lyena lanshanyeni amepusho yakonkapo.

VIDIO: Ifyo Twasambilile mu Ulupungu lwa kwa Kalinda—Twalilileni Ukukanaitumpa mu Fikansa fya Calo (5:16)

• Kuti twacita shani pa kuti twilaitumpa mu fya calo ilyo tuletamba ifyangalo umo ifyalo ficimfyanya?

• Finshi tufwile ukucita pa kuti twilaitumpa mu fikansa fya calo nangu ca kuti ifyo intungulushi sha fikansa fya calo shipingwile nafitukuma?

• Bushe amalyashi tukutika pa filimba na pa TV, ayo tubelenga mu nyunshipepala, e lyo na yo tumfwa ku banensu kuti yalenga shani catukosela ukukanaitumpa mu fya calo?

IFYO MUSAMBILILE

Abena Kristu balesha na maka ukukanaitumpa mu fya calo mu fyo batontonkanya, mu fyo balanda, na mu fyo bacita.

Ukupitulukamo

• Bushe tufwile ukulamona shani amabuteko ya bantunse?

• Mulandu nshi tushi-itumpila mu fya calo?

• Finshi fimo ifingacitika ifingalenga catukosela ukukanaitumpa mu fya calo?

ISHIBILENIPO NA FIMBI

Finshi nalimo twingacita pa kuti tatuitumpile mu fya calo?

Yehova Lyonse Alatwafwa (3:14)

Finshi aba mu lupwa bengacita pa kuipekanishisha ku fintu ifingacitika ifingalenga cabakosela ukukanaitumpa mu fya calo?

Ukukanaitumpa mu fya Calo Ilyo Tuli pa Cintubwingi (4:25)

Mulandu nshi twingalandila ukuti ukucingilila icalo cesu te cintu icacindamisha ico tulingile ukucita?

“Lesa Kuti Acita Ifintu Fyonse” (5:19)

Belengeni ifyo mwingacita pa kuti mwiba “aba muli ici calo” ilyo mulesala incito mwingabomba.

“Umo na Umo ali no Kusenda Icipe Cakwe Umwine” (Ulupungu lwa kwa Kalinda, March 15, 2006)