Ubumi bwa kwa Yesu no Butumikishi

Pali Bemba wa Galili

ABATUMWA nomba babwelela ku Galili, nge fyo Yesu mu kubangililako abakambishe ukucita. Lelo tabali abashininkisha pa co bafwile ukucita kulya. Pa numa ya nshita inono, Petro aeba Toma, Natanaele, Yakobo na munyina Yohane, na batumwa bambi babili ukuti: “Ndeya ku kwipaye sabi.”

“Na ifwe tuleya pamo nobe,” e fyayasuka aba mutanda.

Mu kati ka bushiku bonse, tabaipeye nangu kamo. Nangu cibe fyo, ilyo fye bwaca, Yesu amonekela pa lulamba lwa bemba, lelo abasambi tabelwike ukuti ni Yesu. Abilikisha kuli bene ati: “Mwe bana, tamukwete icili conse ica kulya, bushe namukwata?”—NW.

“Iyo,” e fyo babilikisha ukucilinganya amenshi.

“Teyeni isumbu lubali ku kulyo kwa bwato, mwalasanga,” e fyo asosa. Kabili lintu bacite fyo, tabali na maka ya kukula isumbu lyabo pa mulandu we sabi ilingi. “Ni Shikulu!” e fyapunda Yohane. Petro akakila ilaya lyakwe mu musana, aipoosa muli bemba, no kowa mupepi na mamita 90 ukuya ku lulamba. Abatumwa bambi bakonka mu kabwato, no kukula isumbu ilyaisulamo isabi.

Lintu bafika ku cituntu, pali umulilo wa mafito, ne sabi nalibikwapo, kabili pali no mukate. “Letenipo isabi mwaipaya nomba,” e fyasosa Yesu. Petro anina mu bwato no kukulila isumbu ku cituntu. Muli isabi 153 ilikalamba!

“Iseni, mwikule,” e fyo Yesu abalaalika.

Tapali nangu umo uwa bene uupamine ukwipusha ukuti, “Ni mwe bani?” pantu nabeshiba ukuti ni Yesu. Uyu e muku walenga cinelubali uwa kumoneka kwa pa numa ya kubuushiwa kwakwe, kabili uwalenga itatu ku batumwa nge bumba. Nomba abapeela umwikulo, ukupeela umo umo uwa bene umukate ne sabi.

Lintu bapwa ukulya, Yesu nakalimo asontela ku mutwe isabi ilingi iliketwe no kwipusha Petro ukuti: “Simone, mwana Yona, bushe walintemwa ukucisha aba?” Nakalimo apilibula ukuti, Bushe walicilapo kulambatila ku bukwebo bwe sabi ukucila ku mulimo uo nakupekanishisha ukucita?

“Imwe mwaliishiba ukuti nalimutemwa,” e fyo Petro ayankulako.

“Cemo twana twa mpaanga twandi,” e fyayasuka Yesu.

Na kabili, umuku walenga ibili, aipusho kuti: “Simone, mwana Yona, bushe walintemwa?”

“Ee Shikulu, imwe mwaliishibo kuti nalimutemwa,” e fyayasuka Petro.

“Ceme mpaanga shandi,” e fyakambisha Yesu na kabili.

Lyene, umuku na umbi uwalenga itatu, aipusho kuti: “Simone, mwana Yona, bushe walintemwa?”

Ukufika pali nomba Petro aumfwo bulanda. Kuti pambi alepapa nga ca kuti Yesu aletwishika bucishinka bwakwe. Na kuba, lintu Yesu aali pa kulubulula pa mulandu wa bumi bwakwe mu nshita ya nomba line, Petro amukeene imiku itatu. E co Petro asoso kuti: “Mwe Shikulu, imwe mwaishiba fyonse; imwe mwaliishibo kuti nalimutemwa.”

“Lishe mpaanga shandi,” Yesu amukambisha umuku walenga itatu.

Yesu muli ifyo abomfya Petro nge ca kupiminako ku kwebekesha na pali bambi umulimo uo alefwaya ukuti bacite. Ali no kushe sonde bwangu bwangu, kabili alefwayo kuti babuule ubutungulushi mu kutumikila kuli abo abakakulilwa mwi cinka lya mpaanga ilya kwa Lesa.

Pamo fye nge fyo Yesu akakilwe no kuputunkanishiwa pa mulandu wa kuti acitile umulimo uo Lesa amutumine ukucita, e co, nomba asokolola ukuti, Petro akacula icakukumanya capalako. “Ilyo wali umulumendo,” e fyo Yesu amweba, “walefwala we mwine ica kufwala mu musana, no kuya uko walefwaya; lelo ilyo ukakota, ukemya amaboko yobe, na umbi akakukaka, akakutwala no ko ushifwaile.” Ukwabulo kusakamana imfwa ya kufwile cisumino iyalelolela Petro, Yesu acincisha ukuti: “Nkonka.”

Lintu apilibuka, Petro amona Yohane no kwipusha ukuti: “Mwe Shikulu, ngo yo ni shani?”

“Nga natemwa ukuti ekale nkasuke nkese,” e fyayasuka Yesu, “bushe mulandu kuli iwe? Iwe unkonke.”

Aya mashiwi ya kwa Yesu yaishile ku kumfwika ku bengi aba basambi ngo kupilibula ukuti umutumwa Yohane takabale afwa. Nangu cibe fyo, nge fyo umutumwa Yohane pa numa alondolwele, Yesu tapilibwile ukuti takafwe, lelo Yesu asosele fye ukuti: “Nga natemwa ukuti ekale nkasuke nkese, bushe mulandu kuli iwe?” Yohane 21:1-25; Mateo 26:32; 28:7, 10.

◆ Cinshi calanga ukuti abatumwa tabali abashininkisha pa co balingile ukucita mu Galili?

◆ Ni shani fintu abatumwa baishiba Yesu pali Bemba wa Galili?

◆ Miku inga Yesu nomba amoneka ukutula pa kubuushiwa kwakwe?

◆ Ni shani fintu Yesu akomaila pa co alefwaya ukuti abatumwa bacite?

◆ Ni shani fintu Yesu alanga umusango Petro akafwilamo?

◆ Kulandapo nshi ukwa kwa Yesu pa lwa kwa Yohane kwaumfwike bubi bubi ku bengi aba mu basambi?