Umulimo Wa Kwa Yesu Ulekulilako Ilyo Uwa Kwa Yohane Ulecepelako

Ilyo Yesu na basambi bakwe bapwile ukusefya Ica Kucilila mu April mu 30 C.E., balifumine mu Yerusalemu, lelo tababwelele ku mwabo ku Galili ilyo line fye. Baile mu calo ca Yudea, umo babatishe abantu abengi. Pali iyi nshita ninshi palipita umwaka umo ukutula apo Yohane Kabatisha atendekeele ukubatisha abantu kabili afwile ali na basambi bakwe bamo mu mukonko wa Mumana wa Yordani.

Yesu talebatisha abantu, lelo ale-eba abasambi bakwe ukubabatisha. Pali iyi nshita, Yesu na Yohane balesambilisha abaYuda abalelapila pa membu isho balecita pa kukanakonka amafunde ayali mu cipangano ico bapangene na Lesa.—Imilimo 19:4.

Lelo abasambi ba kwa Yohane tabatemenwe ifyo Yesu alecita. Bailishenye abati: “Umuntu [Yesu] uo mwali nankwe . . . alebatisha, na bonse baleya kuli ena.” (Yohane 3:26) Yohane ena taumfwile ububi. Alitemenwe ukumona ifyo Yesu alebomba bwino kabili alefwaya abasambi nabo balesekelela pamo nankwe. Yohane abebele ati: “Imwe muli bakambone pa mashiwi nalandile aya kuti, ‘Nshili Kristu, lelo, ine natuminwe ukumutangilila.’” Pa kulangilila ico alelandapo, Yohane atile: “Uuli na nabwinga e shibwinga. Lelo cibusa wa kwa shibwinga ilyo aiminina no kumumfwa alelanda, alasekelela nga nshi pa mulandu wa kumfwa ishiwi lya kwa shibwinga. E ico na ine ninsekelela icine cine.”—Yohane 3:28, 29.

Nga filya cibusa wa kwa nabwinga asekelela, Yohane na o alisekelele ilyo alangile abasambi bakwe ati uyu, e Yesu. Abasambi ba kwa Yohane bamo balikonkele Yesu kabili mu kuya kwa nshita balisubilwe no mupashi wa mushilo. Yohane alefwaya na basambi abo ashele nabo babe abasambi ba kwa Yesu. Na kuba, umulimo uo Yohane apeelwe wa kupekanishisha Kristu inshila. Yohane atile: “Ena ali no kulakula, lelo ine ndi no kulacepa.”—Yohane 3:30.

Yohane umbi, ulya uwali umusambi wa kwa Yesu, alandile ukwafumine Yesu ne fyo ali no kupususha abantu. Atile: “Uwafuma ku muulu alicila bonse. . . . Wishi alitemwa Umwana kabili napeela fyonse mu minwe yakwe. Uutetekela Umwana aba no mweo wa muyayaya; uushumfwila Mwana takabe no mweo, lelo ubukali bwa kwa Lesa bwaikala pali ena.” (Yohane 3:31, 35, 36) Aya mashiwi yalicindeme sana!

Ilyo Yohane Kabatisha alandile pa mulimo apeelwe ukubomba ukuti waile ulecepa, tapakokwele ne Mfumu Herode yamupoosa na mu cifungo. Herode aupile Herodia, uo apokele Filipi, munyina. Ilyo Yohane amwebeelepo pali ubu bulalelale ubo acitile, Herode alipoosele Yohane mu cifungo. Ilyo aumfwile ukuti Yohane nabamukaka, Yesu na basambi bakwe balifumine ku Yudea no ‘kuya ku Galili.’—Mateo 4:12; Marko1:14.