Yesu Na Wishi Balitemwana

Ilyo abaYuda bamo batile Yesu alipulile mwi funde pa kundapa umuntu pe Sabata, Yesu abaswike ati: “Tata acili alebomba, na ine ncili ndebomba.”—Yohane 5:17.

Kanshi ifunde lya kwa Lesa ilyalelanda pe Sabata, talyakenye ico Yesu acitile. Yesu alepashanya Lesa ilyo aleshimikila no kundapa abantu. E calengele alebomba imilimo iisuma cila bushiku. Ifyo ayaswike abalemupeela imilandu pa co acitile, fyalengele bafulwe sana ica kuti balafwaya no kumwipaya. Cinshi bafuliilwe?

Ni co balemona kwati Yesu talekonka ifunde pa kundapa abantu pa bushiku bwe Sabata, e lyo tabatemenwe na filya alelanda ukuti Mwana wa kwa Lesa. Balemona kwati alepontela Lesa pa kulanda ukuti e Wishi. Baleti filya Yesu atile Yehova ni Wishi, ninshi alelanda ukuti alilingana na Lesa. Lelo Yesu talebatiina, e co abebele na pali bucibusa bwakwe na Lesa. Atile: “Wishi alitemwa Umwana, amulanga na fyonse ifyo acita.”—Yohane 5:20.

Wishi e Upeela ubumi, kabili ico calimoneke ku kale ilyo apeele abantu amaka ya kubuusha abafwa. Yesu alandile no kuti: “Ifyo Wishi abuusha abafwa no kubalenga ukuba no mweo, e fyo no Mwana alenga abo alefwaya ukuba no mweo.” (Yohane 5:21) Aya mashiwi yalicindama sana kabili yalalenga twakwata isubilo ilisuma! Na muno nshiku mwine, Yesu alabuusha abantu mu mampalanya. E co alandiile ukuti: “Uwaumfwa amashiwi yandi no kutetekela uwantumine aba no mweo wa muyayaya, kabili tapingulwa lelo nafuma mu mfwa no kwingila mu mweo.”—Yohane 5:24.

Pali ilya nshita, Yesu ninshi talabuushapo umuntu nangu umo uwafwile, lelo aebele abalemupeela umulandu ukuti kukaba ukubuuka. Atile: “Inshita ileisa ilyo bonse ababa mu nshiishi bakebukishiwa kabili bakomfwa ishiwi lyakwe no kufumamo.”—Yohane 5:28, 29.

Nangu ca kuti Yesu alipeelwa sana amaka, alangile ukuti Lesa mukalamba pali ena ilyo atile: “Te kuti ncite akantu neka. . . . Pantu te kufwaya kwandi mfwaya, lelo mfwaya ukufwaya kwa wantumine.” (Yohane 5:30) Na lyo line, Yesu alandile pa mulimo apeelwe uukalenga ukufwaya kwa kwa Lesa kukafikilishiwe. Uyu e muku wa kubalilapo alandile pa cintubwingi pa cikalamba ico aishiile pano calo. Lelo abalemupeela umulandu balishibe bwino bwino ico Yesu aishiile pano isonde. Yesu abacinkwileko ukuti: “Imwe mwatumine abantu kuli Yohane [Kabatisha], kabili ashimike icine ubunte.”—Yohane 5:33.

Abalesuusha Yesu bafwile balyumfwile ukuti imyaka ibili ku numa, Yohane alyebele intungulushi sha mapepo isha baYuda pa Wali no kwisa, uo baleita ukuti “Kasesema” na “Kristu.” (Yohane 1:20-25) Yesu aebele abalemusuusha pali Yohane uwali mu cifungo, kabili uo bacindike sana, ukuti: “Pa nshita iinono mwalefwaya ukusekelela nga nshi mu lubuuto lwakwe.” (Yohane 5:35) Na lyo line, alibebele ubunte ubwacila ubwa kwa Yohane Kabatisha.

Atile: “Imilimo iyo ine ndebomba [kumo na filya aundepe uwali pa cishiba] e ishininkisha ukuti Tata e wantumine.” Kabili abebele no kuti “Tata uwantumine e nte yandi.” (Yohane 5:36, 37) Ku ca kumwenako, ilyo Yesu abatishiwe, Lesa alipeele ubunte bwa kuti Mwana wakwe.—Mateo 3:17.

Kanshi abapeele Yesu umulandu tabakwete ifishinka fya kukaanina ukuti mwana wa kwa Lesa. Amalembo ayo baleti e yo balekonka, e yalanga ukuti ni Mwana Lesa. Pa kulekelesha Yesu atile: “Nga mwalitetekele Mose nga mwalintetekela na ine, pantu ulya alembele pali ine. Lelo nga tamutetekele ifyo alembele, kuti mwatetekela shani amashiwi yandi?”—Yohane 5:46, 47.