Yesu Alanda Amashiwi Ayapapusha Abengi

Yesu aingile mwi sunagoge lya mu Kapernahumu, kabili atendeke ukusambilisha abantu ukuti e mukate uwafuma ku muulu. Abebele amashiwi yalya yene aebeleko abafumine ku kabanga ka Bemba wa Galili, abalileko isabi ne mikate ifyo apangile mu cipesha amano.

Yesu akonkenyepo ukusosa ati: “Bashinwe baliile mana mu matololo lelo balifwile.” Pa numa ya kusosa ifi, atile: “Ine ndi mukate wa mweo uwafumine ku muulu; umuntu nga alyako uyu mukate, akekala umuyayaya. Na kuba, umukate uo nkapeela, mubili wandi uo nkapeela pa mulandu wa bumi bwa ba pano calo.”—Yohane 6:48-51.

Muli ba April, mu 30 C.E., Yesu aebele Nikodemo ukuti Lesa alitemenwe sana aba pano calo ica kuti atumine Umwana wakwe ukwisabalubula. Lyena Yesu abebele ukuti pa kukwata umweo wa muyayaya, balingile ukulya umubili wakwe, e kutila, ukucetekela ilambo akapeela.

Lelo abantu balikeene ukucita ifyo Yesu alandile. Baipwishe abati: “Uyu muntu kuti atupeela shani umubili wakwe ukuti tulye?” (Yohane 6:52) Yesu alefwaya beshibe ukuti alelanda pa kulya umubili wakwe mu mampalanya. Ifyo akonkeshepo ukulanda e filanga umo aloseshe.

Atile: “Nga tamuliile umubili wa Mwana wa muntu no kunwa umulopa wakwe, ninshi muli imwe tamuli ubumi. Uulya umubili wandi no kunwa umulopa wandi ali no mweo wa muyayaya, . . . pantu umubili wandi ca kulya ica cine cine, no mulopa wandi ca kunwa ica cine cine. Uulya umubili wandi no kunwa umulopa wandi aba muli ine, na ine naba muli ena.”—Yohane 6:53-56.

Elenganyeni ifyo abaYuda bafulilwe! Bena balemona kwati Yesu alebeba ukulya umubili wa muntu nelyo ukutoba ifunde lya kwa Lesa ilyakeenye ukunwa umulopa. (Ukutendeka 9:4; Ubwina Lebi 17:10, 11) Lelo Yesu talebeba ukuti balingile ukulya umubili e lyo no kunwa umulopa. Ico alelandapo ca kuti, bonse abafwaya ukuba no mweo wa muyayaya balingile ukucetekela ilambo ilyo ali no kutuula nga apeela umubili wakwe uwapwililika e lyo no kusumya umulopa. Bamo batile: “Aya mashiwi yena yayafya; nani uwingayomfwa?”—Yohane 6:60.

Ilyo aishibe ukuti abasambi bakwe bamo baleilishanya pa fyo alandile, abepwishe ati: “Bushe aya mashiwi yamukalifya na imwe? Nga kanshi cileba shani nga mwamona Umwana wa muntu alenina ukuya uko ali kale? . . . Amashiwi ayo nsosele kuli imwe e mupashi no bumi. Lelo bamo pali imwe tabatetekela.” Ilyo alandile aya mashiwi, abasambi abengi balibwelelemo, kabili balilekele ukumukonka.—Yohane 6:61-64.

E ico Yesu aipwishe abatumwa 12 ati: “Bushe na imwe mulefwaya ukuya?” Simone Petro amwaswike ati: “Mwe Shikulu, ni kuli nani twingaya? Ni mwe muli na mashiwi ya mweo wa muyayaya; kabili twalitetekela no kwishiba ukuti ni mwe Uwa Mushilo wa kwa Lesa.” (Yohane 6:67-69) Ifyo balandile fyalangile ukuti bali aba cishinka icine cine, nangu ca kuti tabaumfwikishe ifyo Yesu alebasambilisha pali ilya nshita.

Nangu ca kuti alitemenwe ifyo Petro ayaswike, Yesu atile: “Bushe nshasalile imwe 12? Lelo umo pali imwe ni kaseebanya.” (Yohane 6:70) Yesu alelanda pali Yuda Iskariote. Pali iyi inshita afwile alimwene ukuti Yuda alitendeke ukucita ifyabipa.

Na lyo line, Yesu alitemenwe ilyo aishibe ukuti Petro na batumwa bambi tabalekele ukumukonka e lyo no kubomba umulimo wa kupususha abantu uo alebombako.