Yesu Asangwa Ku Mutebeto Wa Nsakwe Mu Yerusalemu

Yesu alishibikwe sana mu myaka yakonkelepo pa numa ya kubatishiwa. AbaYuda abengi balimwene ifipesha amano ifyo Yesu acitile, kabili ifi fipesha amano fyalile ululumbi mu calo conse. E ico, ilyo kwali Umutebeto wa Nsakwe mu Yerusalemu, abantu abengi balefwaya ukumumona.

Abantu balelanda ifyapusanapusana pali Yesu. Baletotoshanya abati: “Muntu umusuma.” Bambi na bo baleti: “Awe te musuma, alalufya abantu.” (Yohane 7:12) Mu nshiku sha kubalilapo isha uyu mutebeto e lyo balelanda sana ifi pali Yesu. Lelo tapaali uwalandiileko Yesu pa cintubwingi pantu bonse baletiina intungulushi sha baYuda.

Yesu afikile pe tempele ninshi umutebeto nautendeka. Abantu abengi balipapile pa kumona ifyo Yesu alesambilisha bwino. Apo tasambililepo ifya mapepo mu masukulu ya baYuda, abaYuda balepapa abati: “Bushe uyu muntu aishiba shani Amalembo, uushapita na ku sukulu?”—Yohane 7:15.

“Yesu alondolwele ukuti: “Ifyo nsambilisha te fyandi iyo, lelo fya wantumine. Umuntu nga afwaya ukucita ukufwaya kwa kwa Lesa, akeshiba nga ifyo nsambilisha fyafuma kuli Lesa atemwa nanda fye ifyandi ne mwine.” (Yohane 7:16, 17) Ifyo Yesu alesambilisha tafyalepusana ne fyali mu Mafunde ya kwa Lesa, kanshi taleifwaila ubukata lelo alefwaya ukucindika Lesa.

Lyena Yesu atile: “Bushe Mose tamupeele Amafunde? Lelo pali imwe tapaba nangu umo uukonka Amafunde. Nga cinshi mulefwaila ukunjipaya?” Bamo mwi bumba, nalimo abafumine mu misumba imbi, tabaishibe ukuti kwali abalefwaya ukumwipaya. Balifililwe ukusumina ukuti abantu balefwaya ukwipaya kasambilisha wa musango uyu. E ico abantu bamwene kwati Yesu taletontonkanya bwino pa kulanda yalya mashiwi. Bamwebele abati: “Uli ne cibanda. Nani alefwaya ukukwipaya?”—Yohane 7:19, 20.

Na kuba papitile fye umwaka umo na hafu ukutula apo abantu bafwaile ukwipaya Yesu ilyo aundepe umwaume umo pe Sabata. Yesu alandile amashiwi ayalangile ukuti balilubile. Alandile pali filya Amafunde yatile umwana mwaume nga afyalwa, alingile ukusembululwa pa bushiku bwalenga 8, nampo nga ni pa bushiku bwe Sabata atemwa iyo. Lyena Yesu abepwishe ati: “Mulasembulula umuntu pe sabata pa kuti mwitoba Amafunde ya kwa Mose. Bushe mwamfulilwa pantu naposeshe umuntu pe sabata? Mwilapingula ukulingana ne mimonekele ya muntu, lelo mulepingula ubupingushi ubwalungama.”—Yohane 7:23, 24.

Abekashi ba mu Yerusalemu abaishibe ili lyashi batile: “Bushe te uyu muntu balefwaya ukwipaya? Nomba moneni! alelanda pa cintubwingi, kabili tabalemweba nangu cimo. Bushe nalimo intungulushi na sho nomba nashishiba ukuti cine cine uyu e Kristu?” Nomba cinshi calengele abantu betetekela ukuti Yesu e Kristu? Batile: “Natwishiba uko uyu muntu afuma; nomba ilyo Kristu akesa, takwakabe uukeshiba uko akafuma.”—Yohane 7:25-27.

Yesu alibaswike palya pene pe tempele ati: “Mwalinjishiba, kabili mwalishiba no ko nafuma. Kabili nshaishila ne mwine neka, lelo uwantumine wa cine, kabili imwe tamwamwishiba. Ine nalimwishiba, pantu nafuma kuli ena ico nine uwa kumulandilako, kabili E wantumine.” (Yohane 7:28, 29) IIyo Yesu abebele aya amashiwi, bafwaile ukumwikata pa kuti bamupoose mu cifungo nelyo bamwipaye. Nomba balifililwe pantu inshita ya kuti afwe ninshi tailafika.

Lelo abantu abengi balimutetekele pantu balishibe ukuti alyendele pa menshi, alitalalike icimwela, mu cisungusho afushishe imikate iinono no tusabi, kabili aliishishe abantu abengi, alyundepe abalwele, alyundepe abalemana, ashibwile amenso ya mpofu, alyundepe aba fibashi no kubuusha abafwa. E mulandu wine baipushiishe abati: “Ilyo Kristu akesa, bushe akacita ifipesha amano ifyacila pa fyo uyu muntu acita?”—Yohane 7:31.

Ilyo abaFarise na bashimapepo baumfwile abantu balelanda ifi pali Yesu, batumine abashilika ku kuyamwikata.