“Takwatala Akuba Nangu Umo Uulanda Ngo Yu Muntu”

Ilyo Yesu ali ku Yerusalemu uko aile mu kusefya Umutebeto wa Nsakwe, “abengi mwi bumba balimutetekeele,” kabili alitemenwe. Lelo bashimapepo bena tabatemenwe. Batumine abashilika abali nga bakapokola babo ku kumwikata. (Yohane 7:31, 32) Na lyo line, Yesu tabeleme.

Yesu atwalilile fye ukusambilisha abantu mu Yerusalemu no kubeba ati: “Ncili na imwe inshita iinono ilyo nshilaya ku wantumine. Mukamfwaya, lelo tamwakansange, kabili uko ine nkaba, imwe te kuti mwiseko.” (Yohane 7:33, 34) AbaYuda tabaishibe umo aloseshe, e ico batendeke ukulanshanya, abati: “Bushe ni kwi uyu muntu alepanga ukuya, uko ifwe te kuti tumusange? Bushe alepanga ukuya ku baYuda abasalanganina mu baGriki no kubasambilisha pamo na baGriki? Bushe yalola mwi amashiwi ayo asosa ati, ‘Mukamfwaya, lelo tamwakansange, no ko ine nkaba imwe te kuti mwiseko’?” (Yohane 7:35, 36) Yesu alelanda pa mfwa yakwe na pa fyo ali no kubuuka no kuya ku muulu, uko abalwani bakwe tabaali na kumukonka.

Mu nshiku 7 isha mutebeto, cila lucelo, shimapepo aletapa amenshi mu Cishiba ca Siloamu ayo aleitulwila pa nshi ya ciipailo cali mwi tempele pa kuti yalekonkoloka. Pa bushiku bwalenga 7, Yesu nalimo alefwaya abantu batontonkanye pa fyo shimapepo alecita, e ico atile: “Umuntu nga ali ne cilaka, ese kuli ine, anwe. Uuntetekela, ‘Mu nda yakwe mukalafuma imilonga ya menshi ya mweo,’ nga filya Amalembo yasosa.”—Yohane 7:37, 38.

Yesu alelanda pa fyali no kucitika, abasambi bakwe nga basubwa no mupashi wa mushilo no kukwata isubilo lya kuyaikala ku muulu. Abasambi bali no kusubwa Yesu nga afwa. Ukutula pa bushiku bwa Pentekoste mu mwaka wakonkelepo, amenshi ayapeela umweo yatendeke ukukonkoloka ilyo abasambi ba kwa Yesu abasubwa batampile ukusambilisha abantu icine.

Bamo pa baumfwile ifyo Yesu alesambilisha batendeke ukusosa abati: “Cine cine, uyu e Kasesema.” Balelanda pali kasesema umukalamba pali Mose uo Amalembo yatile akesa. Bambi baleti: “Uyu e Kristu.” Lelo bamo balekaana abati: “Bushe Kristu kuti afuma mu Galili? Bushe Amalembo tayasosa ukuti Kristu akafuma mu bana ba kwa Davidi, na mu Betelehemu, umushi umwaikele Davidi?”—Yohane 7:40-42.

Bamo balefwaya ukuti bamwikate, lelo bambi tabalefwaya. Na lyo line, tapali nangu umo uwamwikete. Ilyo abashilika babweleele kuli bashimapepo, bashimapepo na baFarise babepwishe abati: “Nga cinshi tamumuletele?” Abashilika bayaswike, abati: “Takwatala akuba nangu umo uulanda ngo yu muntu.” Bashimapepo balifulilwe kabili batendeke ukubatumfya no kubebaula abati: “Bushe na imwe nabamulufya? Bushe kuli bamo pa ntungulushi nelyo abaFarise abamutetekele? Lelo ili ibumba ilishaishiba Amafunde lyalitiipwa.”—Yohane 7:45-49.

Pali iyi nshita, Nikodemo umuFarise, uwa mu Cilye ca Sanhedrini, alilandiileko Yesu. Imyaka ibili na hafu ku numa, Nikodemo aile kuli Yesu ubushiku kabili alilangile ukuti alimutetekeele. Nikodemo atile: “Bushe ukulingana na mafunde yesu tulapingula umuntu ilyo tatulamumfwa no kwishiba ifyo alecita?” Bushe bamwaswike shani pa kuipokolola? Batile: “Bushe na iwe wafuma ku Galili? Fwaya mu Malembo kabili walasanga ukuti ku Galili takufuma kasesema.”—Yohane 7:51, 52.

Amalembo tayalandile mu kulungatika ukuti kasesema akafuma mu Galili. Lelo Icebo ca kwa Lesa catile Kristu akafuma mu Galili. Casobeele ukuti: “Ulubuuto ulukalamba” lukabalika “mu Galili wa bena fyalo.” (Esaya 9:1, 2; Mateo 4:13-17) E lyo nga filya fine casobeelwe, Yesu afyalilwe mu Betelehemu, kabili ali mwana wa kwa Davidi. Nangu ca kutila abaFarise balishibe ici, bale-eba abantu ifya bufi pali Yesu.