Umwana Wa Kwa Lesa “Lubuuto Lwa Calo”

Pa bushiku bwalenga 7, ubushiku bwa kulekeleshako ubwa Mutebeto wa Nsakwe, Yesu alesambilisha mwi tempele. Afwile aali mu Lubansa lwa Banakashi umwali “icipao ca ndalama” ico abantu balebikamo imisangulo.—Yohane 8: 20; Luka 21:1.

Mu Lubansa lwa Banakashi mwalebuuta sana nga kuli Umutebeto wa Nsakwe. Mwali inyali shine ishikalamba nga nshi, kabili inyali imo na imo yalekwata ifya kubikamo amafuta fine ifikulu ifyaleisula paa. Ulubuuto ulwalefuma kuli ishi inyali lwalekuula sana ica kuti lwalefika ukutali. Ifyo Yesu alandile, nalimo fyalengele abantu ukwibukisha ishi inyali. Atile: “Ndi lubuuto lwa calo. Uunkonka takende mu mfifi nakalya, lelo akaba no lubuuto lwa mweo.”—Yohane 8:12.

AbaFarise balikeene ifyo Yesu asosele. Bamwebele abati: “Iwe uleikalila ubunte we mwine; te bwa cine ubunte bobe iyo.” Yesu abaswike ati: “Nangu ndeikalila inte ne mwine, ubunte bwandi bwa cine, pantu nalishiba uko nafuma no ko nkaya. Lelo imwe tamwaishiba uko nafuma no ko nkaya.” Abebele no kuti: “Mu Mafunde yenu mwalembwa ukuti, ‘Ubunte bwa bantu babili bwa cine.’ Ine njishimika ubunte ne mwine, na Tata uwantumine anshimika ubunte.”—Yohane 8:13-18.

Apo abaFarise tabasumiine ifyo abebele, bamwipwishe abati: “Wiso ali kwi?” Yesu taabapitile na mu mbali, abaswike ati: “Tamwaishiba ine nangu ni Tata. Amwishiba ine, nga mwaishiba na Tata.” (Yohane 8:19) Nangu ca kuti abaFarise pali iyi nshita ninshi bacili balefwaya ukumwikata, tapali nangu umo uwaeseshe ukumwikata.

Yesu abwekeshepo ukulanda amashiwi ayo alandilepo kale aya kuti: “Ndeya, kabili mukalamfwaya, lelo mukafwila mu lubembu lwenu. Uko ine ndeya, imwe te kuti mwiseko.” AbaYuda tabaumfwile umo Yesu aloseshe, e ico batendeke ukusosa abati: “Bushe uyu muntu akaipaya? Pantu aleti, ‘Uko ine ndeya, imwe te kuti mwiseko.’” Tabaishibe ico Yesu alelandapo pantu tabaishibe uko afumine. Yesu abebele ati: “Imwe muli ba pano calo; ine ndi wa ku muulu. Imwe muli ba pano calo; ine nshili wa pano calo.”—Yohane 8:21-23.

Yesu alelanda pali filya aleikala ku muulu ilyo talaisa pano isonde na pali filya ali Mesia nelyo Kristu uo aba bashimapepo balelolela. Na lyo line, bamwipwishe misuula misuula abati: “Ni webo nani?”—Yohane 8:25.

Ilyo bakeene ifyo Yesu alebeba, Yesu atile: “Na kuba cinshi ndelandila na imwe?” Na lyo line alandile pali Wishi wa ku muulu kabili alondolwele ico abaYuda balingiile ukumfwila Umwana wa kwa Lesa. Abebele ati: “Uwantumine wa cine, kabili filya fine naumfwile kuli ena e fyo ndesosa ku calo.”—Yohane 8:25, 26.

Lyena Yesu alandile amashiwi ayalangile ukuti alicetekela Wishi, tali nga balya abaYuda. Atile: “Ilyo mukemya Umwana wa muntu, e lyo mukeshiba ukuti nine wine, no kuti nshicita kantu nangu kamo neka; lelo filya fine Tata ansambilishe, e fyo na ine nanda. Kabili uwantumine aba na ine; tandeka neka iyo, pantu lyonse ncita ifya kumusekesha.”—Yohane 8:28, 29.

Lelo abaYuda bamo balimutetekeele, kabili abebele ukuti: “Nga mwaikalilila mu fyo nsosa, ninshi ca cine muli basambi bandi, kabili mukeshiba icine, ne cine cikamulenga ukuba abantungwa.”—Yohane 8:31, 32.

Bamo balipapile ilyo Yesu atile bakaba abantungwa. Batile: “Tuli bana ba kwa Abrahamu kabili tatwatala atuba abasha ba muntu nangu umo. Nga iwe uleti shani, ‘Mukaba abantungwa’?” AbaYuda balishibe ukuti limo baletekwa ne nko shimbi, nomba tabalefwaya ukubeta ukuti abasha. Na lyo line Yesu alibalangile ukuti bali basha ilyo atile: “Ndemweba icine cine, nati, Umuntu onse uucita ulubembu, musha wa lubembu.”—Yohane 8:33, 34.

Ukukaana ukuti bali basha kwali no kubaletelela. Yesu atile: “Umusha tekalilila mu ng’anda pe; lelo umwana alekalilila pe.” (Yohane 8:35) Umusha takwata insambu sha kupyana ifyuma fya kwa shikulu wakwe, kabili kuti bamutamfya inshita iili yonse. Lelo umwana uwa mu ng’anda “alekalilila pe” atemwa alekala mu ng’anda inshiku shonse isha mweo wakwe.

Kanshi ukwishiba icine pa Mwana kulalubula abantu ku ciyayaya ukufuma ku lubembu ulutwala ku mfwa. Yesu atile: “Umwana nga amulubula, mukalubuka icine cine.”—Yohane 8:36.