Yesu Aundapa Umwaume Uwafyelwe Impofu

Pa bushiku bwe Sabata ilyo Yesu ali mu Yerusalemu na basambi bakwe, balimwene umwaume kalombalomba uwafyelwe impofu. Abasambi baipwishe Yesu abati: “Mwe Kasambilisha, nani abembwike pa kuti uyu muntu afyalwe impofu, bushe ni uyu wine muntu nelyo bafyashi bakwe?”—Yohane 9:2.

Abasambi balishibe ukuti uyu muntu takwete umweo uushimoneka uwaliko ilyo talafyalwa, lelo balefwaya ukwishiba nga ca kuti umuntu kuti abembuka ilyo acili mu nda muli nyina. Yesu abaswike ati: “Uyu muntu tabembwike na bafyashi bakwe bene tababembwike, lelo ni pa kuti imilimo ya kwa Lesa imonekele muli ena.” (Yohane 9:3) Kanshi uyu umwaume na bafyashi bakwe tabacitile ulubembu ulwalengele ukuti afyalwe impofu. Lelo ulubembu Adamu acitile e lwalenga ukuti abantu bonse balefyalwa ababembu kabili e lulenga bamo ukupofula. Na lyo line, filya ulya mwaume apofwile fyalengele Yesu alange imilimo ya kwa Lesa, nga fintu caleba ilyo aleundapa abalweele.

Yesu alilandilepo sana ukuti ena na basambi bakwe baalingile ukubomba iyi imilimo bwangu bwangu. Atile: “Tufwile ukubomba imilimo ya wantumine ilyo kucili akasuba; ubushiku buleisa ilyo umuntu nangu umo ashingabomba. Ilyo ncili mu calo, nine lubuuto lwa calo.” (Yohane 9:4, 5) Inshita yalipaleme iya kuti Yesu afwe, abe mu nshiishi umwafita fititi umo ashingacita icili conse. Lelo ilyo ashilafwa, aalingile ukusambilisha abantu icine.

Bushe Yesu alyundepe uyu mwaume, kabili acitile shani pa kumundapa? Yesu afwishiile amate pa nshi e lyo ayasankanya ne loba. Lyena amusubile pa menso no kumweba ati: “Kabiye, kasambe mu cishiba ca Siloamu.” (Yohane 9:7) Uyu mwaume alicitile ifyo bamwebele, kabili alitendeke ukumona! Elenganyeni ifyo uyu umwaume uushabalile amonapo mu bumi bwakwe atemenwe ilyo atampile ukumona!

Abena mupalamano na bantu bambi abamwishibe ukuti aali ni mpofu, balipapile. Baleipushanya abati: “Bushe uyu muntu te waleikala no kulalomba?” Bamo baletila: “E o wine.” Bambi na bo baletila: “Awe, bapalana fye.” Lelo umwine atile: “Nine wine.”—Yohane 9:8, 9.

E ico bamwipwishe abati: “Nga kanshi amenso yobe yashibwilwe shani?” Na o ayaswike ati: “Umuntu uwitwa Yesu e wacikasa iloba, anshinga pa menso, no kunjeba ati, ‘Kabiye ku Siloamu, usambe.’ E fyo na ine naciyasamba, e pa kutampa ukumona.” Lyena bamwipwishe abati: “Ali kwi uyo muntu?” Na o atile: “Nshiishibe.”—Yohane 9:10-12.

Abantu bamutwele ku baFarise pantu nabo balefwaya ukwishiba ifyo atendeke ukumona. Abebele ukuti: “Acimbika iloba pa menso, na ine nayasamba, no kumona nalamona.” AbaFarise baalingile ukusekelela pamo na uyu mwaume uwalelombalomba uo Yesu aundepe. Lelo bamo balesuusha Yesu abati: “Uyu muntu tafuma kuli Lesa, pantu tasunga Isabata.” Bambi na bo baleti: “Bushe umuntu umubembu kuti acita shani ifipesha amano fya musango yu?” (Yohane 9:15, 16) E ico paali amalekano pa kati kabo.

Ilyo abaFarise bamwene ukuti ifyo balelanda fyalipusene, baipwishe umwaume uwali impofu abati: “Ulelandapo shani pali ena, apo nakushibula amenso?” Apo uyu mwaume alicetekele Yesu, atile: “Ni kasesema.”—Yohane 9:17.

AbaYuda balikeene ukusumina ifyacitike. Balemona kwati Yesu na ulya umwaume balipangene pa kuti fye babepe abantu. E ico pa kuti beshibe nga ca kuti uyu mwaume aali ni impofu, baile ku kwipusha abafyashi bakwe.