Abafarise Baipukisha Umwaume Uwali Impofu

AbaFarise balikeene ukusumina ukuti Yesu e walengele ulya umwaume uwafyelwe impofu atendeke ukumona, e ico baitile abafyashi bakwe. Abafyashi bakwe balitiinine sana pantu balishibe ukutila kuti ‘babatamfya mwi sunagoge.’ (Yohane 9:22) Ukubatamfya mwi sunagoge kwali no kulenga baleka ukumfwana na baYuda banabo kabili nga kwalengele no lupwa lwabo lwatendeka ukucula mu mikalile.

AbaFarise baipwishe amepusho yabili. Batile: “Bushe uyu e mwana wenu uo mutila afyelwe impofu? Nga kanshi nomba alemona shani?” Abafyashi bakwe bayaswike abati: “Natwishiba ukuti uyu mwana wesu no kuti afyelwe impofu. Lelo tatwishibe ifyo caciba pa kuti nomba alemona, no umushibwile amenso tatumwishibe.” Nangu ca kutila umwana wabo alibebele ifyacitike, balicenjele pa kwasuka, e ico batile: “Mukulu. Mwipusheni. Afwile ukuilandila umwine.”—Yohane 9:19-21.

AbaFarise baitile na kabili uyu umwaume uwafyelwe impofu no kumweba abati, Yesu muntu umubi. Batile: “Cindika Lesa; ifwe natwishiba ukuti uyu muntu mubembu.” Na o alibacilime ilyo abaswike ati: “Nampo nga mubembu nelyo iyo, ine nshiishibe. Ico ine njishibe fye ca kuti kale nali impofu, nomba ndemona.”—Yohane 9:24, 25.

AbaFarise tabalefwaya ukuleka ukulanda ifyabipa pali Yesu, e ico bakonkenyepo fye ukumwipusha abati: “Acitile cinshi kuli iwe? Ashibwile shani amenso yobe?” Na o alishipile kabili abaswike ati: “Nimweba kale, lelo tamumfwile. Nga cinshi mulefwaila ukumfwa na kabili? Bushe na imwe mulefwaya ukuba abasambi bakwe?” Awe balikalipe sana kabili batile: “Uli musambi wakwe, lelo ifwe tuli basambi ba kwa Mose. Ifwe twaishiba ukuti Lesa alandile kuli Mose; lelo uyu muntu, tatwaishiba uko afuma.”—Yohane 9:26-29.

Uyu umwaume kalombalomba alipapile sana kabili atile: “Awe ici cena capesha amano, ica kuti tamwishibe uko afuma, lelo e unshibwile amenso.” Lyena alandile amashiwi ya kubashinina aya kuti: “Twalishiba ukuti Lesa tomfwa ku babembu, lelo umuntu nga alatiina Lesa no kucita ukufwaya kwakwe, alamumfwa. Ukufuma ku kale tacabalile acumfwika ukuti umuntu ashibwile amenso ya wafyelwe impofu. Uyu muntu nga ca kuti tafumine kuli Lesa, te kuti acite nangu cimo.”—Yohane 9:30-33.

AbaFarise balifililwe ukukaana ifyo uyu umwaume alandile. Na lyo line batile: “Iwe wafyalilwe mu membu, bushe ni we uletusambilisha?” Awe bamutamfiishe ku nse.—Yohane 9:34.

Ilyo Yesu aumfwile ifyacitike, aile ukwali ulya mwaume uwali impofu no kumwipusha ati: “Bushe uletetekela Umwana wa muntu?” Na o ayaswike ati: “Mukwai, nani uyo wine ukuti imutetekele?” Yesu tapitile na mu mbali, amwebele ati: “Naumumona, kabili e ulelanda na iwe.”—Yohane 9:35-37.

Umwaume uo Yesu ashibwile amenso atile: “Namutetekela, mwe Shikulu.” Kabili afukamiine Yesu pa kuti alange icitetekelo no mucinshi kuli ena. Lyena Yesu alandile amashiwi ayacindama sana aya kuti: “Ni kuli ubu bupingushi naishiile pano calo: pa kuti abashimona bamone, na bamona babe impofu.”—Yohane 9:38, 39.

AbaFarise abalipo ilyo Yesu alandile aya mashiwi baishibe ukuti balamona. Apo baleimona kwati e baletungulula abantu mu fya kwa Lesa, baipwishe Yesu abati: “Bushe na ifwe tuli mpofu?” Yesu abaswike ati: “Nga mwali impofu, nga tamwaba no lubembu. Lelo mutila, ‘Tulamona.’ Kanshi mucili no lubembu.” (Yohane 9:40, 41) Abakanaba bakasambilisha mu Israele, filya bakeene Yesu nga tacabipile sana. Lelo apo balishibe ifyali mu Mafunde, ukukaana Yesu lwali lubembu ulukalamba sana.