“Nine Kubuuka Kabili Umweo”

Ilyo Yesu afumine ku Perea, aile ku Betani. Ukufuma muli uyu mushi ukufika ku Yerusalemu pali amakilomita yatatu kabili uyu mushi wabelele ku kabanga ka Yerusalemu. Maria na Marita baleloosha ndume yabo Lasaro uwafwile. Abantu abengi baleya mu kubasansamusha.

Ilyo ali ku nse ya mushi, umuntu umo aebele Marita ukuti Yesu aleisa. Marita abutukiile kuli Yesu kabili amwebele ifyo ena na Maria baletontonkanya pa nshiku 4 ishapitilepo. Atile: “Mwe Shikulu, nga mwali kuno ndume yandi nga tafwile.” Lelo aya amashiwi ayo Marita alandile tayalanga ukuti takwete isubilo pantu alilandile no kuti: “Ninjishiba ukuti na nomba line fyonse ifyo mwingalomba kuli Lesa, kuti amupeela.” (Yohane 11:21, 22) Alitontonkenyepo ukuti Yesu alikwete amaka ya kwafwa ndume yakwe na pali ilya ine nshita.

Yesu amwaswike ati: “Ndume yobe alabuuka.” Marita amwene kwati Yesu alelanda pe subilo lya kubuuka ukukabako pano calo ku ntanshi, ilyo Abrahamu na bantu bambi bakwete. E ico Marita atile: “Ninjishiba ukuti akema ilyo kukaba ukubuuka pa bushiku bwa kulekelesha.”—Yohane 11:23, 24.

Lelo bushe Yesu ali no kubuusha Lasaro lilya line? Aebele Marita ukuti Lesa alimupeele amaka ya kubuusha abafwa, ilyo atile: “Uuntetekela, nangu afwa, akaba no mweo na kabili; na onse uuli no mweo kabili antetekela, takafwe nakalya.”—Yohane 11:25, 26.

Yesu talelanda ukuti abasambi bakwe abali abomi tabaali no kufwa. Na Yesu wine ali no kufwa, nga fintu aebele abatumwa bakwe. (Mateo 16:21; 17:22, 23) Ico Yesu alelandapo ca kuti abantu nga bamutetekela e lyo bengaba no mweo wa muyayaya. Abengi bakakwata umweo wa muyayaya nga babuushiwa, nangu ca kuti bamo aba cishinka bakatwalilila ukuba abomi na lintu cino calo cikapwa. Kanshi umuntu onse uwatetekela muli Yesu nangu afwa, akabuuka.

Lelo bushe Yesu ali no kubuusha Lasaro uwafwile pa nshiku shine, apo atile “nine kubuuka kabili umweo?” Yesu aipwishe Marita ati: “Bushe wasumina ifi?” Marita alisumiine ati: “Ee, mwe Shikulu; asumina ukuti ni mwe Kristu, Umwana wa kwa Lesa, uo batile ali no kwisa mu calo.” Apo Marita alicetekele ukuti Yesu ali no kucitapo cimo pali bulya bwine bushiku, alyangufyenye ukuya ku ng’anda kabili aileeba Maria ku mbali, ati: “Kasambilisha naisa, alekwita.” (Yohane 11:25-28) Maria alifumine mu ng’anda, kabili tapapitile na nshita abantu bambi abamwene kwati aya ku nshiishi ya kwa Lasaro, balimukonkele.

Lelo Maria aile kuli Yesu no kuyawa pa makasa yakwe ninshi alelila, kabili abwekeshepo ukulanda ifyo nkashi nankwe aebele Yesu ati: “Mwe Shikulu, nga mwali kuno, ndume yandi nga tafwile.” Ilyo Yesu amwene Maria na mabumba ya bantu balelila, na o alililile pantu alyumfwile ubulanda nga nshi kabili alyumfwile ububi. Ici calipapwishe abantu. Lelo bamo batile: ‘Nga ca kuti Yesu alishibwile amenso ya mpofu bushe taali na maka ya kucilikila imfwa ya kwa uyu?’—Yohane 11:32, 37.