Yesu Imfumu Aingila Mu Yerusalemu Ninshi Nanina Pa Mwana Wa Mpunda

Ubushiku bwakonkelepo, pa Mulungu pa Nisani 9, Yesu na basambi bakwe bafumine mu Betani kabili baile ku Yerusalemu. Ilyo bapaleme pa Betifage, pa Lupili lwa Miolife, Yesu aebele abasambi bakwe babili ati:

“Kabiyeni mu mushi ulya pa ntanshi, kabili ilyo mwaingila fye, mwalasanga impunda nabaikaka, pamo no mwana wa iko; mushikakule no kushileta kuli ine. No muntu nga amwipusha, mutile, ‘Shikulu aleshifwaya.’ Na o alemupeela ilyo line.”—Mateo 21:2, 3.

Abasambi tabaishibe ukuti filya Yesu abebele ukucita fyalifikilishe ifyo Baibolo yasobele. Lelo pa numa balishibe ukuti ifyo Sekaria asobele fyalifikilishiwe. Asobele ukuti Imfumu iyo Lesa atile ikesa yali no kwingila mu Yerusalemu ‘iyaicefya, kabili ikesa pa mpunda, pa mpunda iikalamba, pa mwana wa mpunda iikota.’—Sekaria 9:9.

Ilyo abasambi bafikile pa Betifage no kubula umwana wa mpunda na nyina, abantu abalipo babepwishe abati: “Cinshi ico mulekakwila umwana wa mpunda?” (Marko 11:5) Lelo ilyo baumfwile ukuti uwaleshifwaya ni Shikulu, basuminishe abasambi ukushisenda. Abasambi babikile ifya kufwala fyabo pa mwana wa mpunda na nyina, lelo Yesu aninine pa mwana wa mpunda.

Ilyo Yesu alepalamina ku Yerusalemu, abantu abengi baishile kuli ena. Abengi bayanshike ifya kufwala fyabo mu musebo. Bambi batemene imisambo ya fimuti nelyo “utumisambo twa mabuula mu mpanga” no kwanshika mu musebo. Kabili balebilikisha abati: “Tulepepa kuli imwe atuti, mupususheni! Alipaalwa uuleishila mwi shina lya kwa Yehova! Bwalipaalwa Ubufumu ubuleisa ubwa kwa shifwe Davidi!” (Marko 11:8-10) Ilyo abaFarise abaali mwi bumba baumfwile ifyo balemulumbanya balifulilwe. E ico baebele Yesu abati: “Mwe Kasambilisha, kalipileni abasambi benu.” Lelo Yesu abaswike ati: “Ndemweba nati, aba nga batalala, amabwe kuti yabilikisha.”—Luka 19:39, 40.

Ilyo Yesu amwene umusumba wa Yerusalemu, atendeke ukulila kabili atile: “Iye, iwe awishiba muli buno bushiku ifileta umutende—lelo fyalifiswa ku menso yobe.” Umusumba wa Yerusalemu wali no konaulwa pantu abantu tabaleumfwila Lesa. Yesu asobele ati: “Abalwani bobe bakakuula ilinga ilya fimuti ifyasongoka ukukushingulusha, kabili bakakushinguluka no kukusansa konse konse, kabili bakakuwisha pa nshi na bana bobe abali muli iwe, kabili tabakashe muli iwe ilibwe limo pa libiye.” (Luka 19:42-44) Na cine, ifyo Yesu alandile fyalicitike mu 70 C.E., ilyo Yerusalemu yaonawilwe.

Ilyo Yesu aingile mu Yerusalemu “mu musumba onse mwakabile na se ku congo, ilyo abantu baletila: ‘Ngo yu muntu nani?’” Kabili amabumba ya bantu yalesosa ayati: “Uyu e kasesema Yesu, uwa ku Nasarete wa mu Galili!” (Mateo 21:10, 11) Abaali mwi bumba, abamweneko uko Yesu abuushishe Lasaro, balishimikileko bambi pali cilya cipesha amano. AbaFarise bali-ilishenye pantu balimwene ukuti abantu balibasuulile. Batendeke ukulanshanya abati: “Moneni! aba pano calo bonse balemukonka.”—Yohane 12:18, 19.

Nga fintu aalecita lyonse nga aya ku Yerusalemu, Yesu aile mwi tempele ku kusambilisha. Ilyo ali pe tempele, alishibwile amenso ya mpofu no kundapa uwalemana. Intungulushi sha bashimapepo na bakalemba balifulilwe ilyo bamwene ifyo Yesu acitile na lintu baumfwile uko abaice abali mwi tempele balebilikisha abati, “Pususheni, Mwana Davidi!” E ico baipwishe Yesu abati: “Bushe uleumfwa ifyo aba balesosa?” Yesu abaswike ati: “Bushe tamwabelenga ifyo calembwa ati, ‘Mwalenga utunwa twa bana abanono na bonka ukumulumbanya’?”—Mateo 21:15, 16.

Yesu atendeke ukulolesha ifyo ifintu fyali mwi tempele, lelo apo bwalilile alifuminepo na batumwa bakwe. Ilyo Nisani 10 ishilafika, Yesu alibwelelemo ku Betani uko aikele pa bushiku bwa pa Mulungu.