Bushe Abayuda Balamutetekela Nga Baumfwa Ishiwi Lya Kwa Lesa?

Pali Cimo pa Nisani 10, Yesu aali kwi tempele alelanda pa mfwa yakwe ukuti, mu nshiku fye ishinono bali no kumwipaya. Apo alefwaya ukuti ishina lya kwa Lesa licindikwe, Yesu atile: “Tata, cindikeni ishina lyenu.” Awe ishiwi lyafumine ku muulu aliti: “Nindicindika e lyo nkalicindika na kabili.”—Yohane 12:27, 28.

Abantu abaalipo balisungwike. Bamo batile ni mfula yabulukuta, bambi nabo batile: “Ni malaika alandile nankwe.” (Yohane 12:29) Lelo uwalandile nankwe ni Yehova. Uyu tawali e muku wa kubalilapo uo abantunse baumfwile Lesa alanda pali Yesu.

Ilyo Yesu alebatishiwa, ninshi napapita ne myaka itatu na hafu, Yohane Kabatisha alyumfwile Lesa alanda pali Yesu ati: “Uyu e Mwana wandi, uwatemwikwa, uo nsekelamo.” Pa numa ya Ca Kucilila mu 32 C.E., Yesu alyalwike ninshi Yakobo, Yohane na Petro balemonako. Aba batatu balyumfwile uko Lesa alandile ati: “Uyu e Mwana wandi, uo natemwa, uo nsekelamo; muumfweni.” (Mateo 3:17; 17:5) Lelo pali uyu muku uwalenga butatu, Yehova alandile mu nshila ya kuti abengi baumfwa.

Yesu atile: “Ishiwi ili talyumfwikike pa mulandu wandi, lelo ni pa mulandu wenu.” (Yohane 12:30) Ubu bwali bushininkisho bwa kuti Yesu Mwana wa kwa Lesa, uo amalembo yalandilepo ukuti e Mesia.

Kanshi filya Yesu atwalilile ukuba ne cishinka, fitulanga ifyo tulingile ukulaikala kabili fyaba bushininkisho bwa kuti Satana Kasebaanya, kateka wa cino calo, alilinga ukonaulwa. Yesu atile: “Nomba cino calo cilepingulwa; nomba kateka wa pano calo bakamupoosa ku nse.” Apo Yesu ali no kwipaiwa mu nshiku fye ishinono, cali no kumoneka kwati bamucimfya, lelo imfwa yakwe yalangile ukuti alicimfishe. Mu nshila nshi? Alondolwele ukuti: “Ilyo bakanjimya ukufuma pano isonde, nkakula abantu ba misango yonse ukwisa kuli ine.” (Yohane 12:31, 32) Imfwa yakwe yalipalamika abantu kuli ena kabili ikalenga bakabe no mweo wa muyayaya.

Ilyo Yesu alandile ukuti “bakanjimya,” ibumba lyamwaswike aliti: “Twaumfwile mu Mafunde ukuti Kristu ekalilila pe na pe; nga iwe ulesosa shani ukuti Umwana wa muntu bakamwimya? Bushe uyu wine Umwana wa muntu e nani?” (Yohane 12:34) Nangu ca kutila balimwene ifishibilo ifingi no kumfwa ishiwi lya kwa Lesa, abengi balikeene ukusumina ukuti Yesu e Mwana wa muntu uwa cine cine, Mesia walaiwe.

Nga fintu alandilepo ku numa, Yesu na kabili alandile ukuti “ndi lubuuto.” (Yohane 8:12; 9:5) Aebele abantu ati: “Ulubuuto luli no kuba na imwe inshita iinono. Endeni ilyo mucili no lubuuto, pa kuti imfifi imunasha . . . Ilyo mucili no lubuuto, tetekeleni ulubuuto, ukuti mube abana ba lubuuto.” (Yohane 12:35, 36) Lyena Yesu alifuminepo, pantu pa Nisani 10 te po alingile ukufwa. Lelo pa Ca Kucilila pa Nisani 14 epo bali no ‘kumwimya,’ e kutila ukumupoopela pa cimuti.—Abena Galatia 3:13.

Nga twamona ifyo Yesu abombele ilyo ali pano isonde, te kuti tutwishike ukuti abaYuda balifikilishe ifyo amalembo yalandile ilyo bakeene ukumutetekela. Esaya asobele ukuti amenso ya bantu yakapofula ne mitima yabo ikakosa, pa kuti bealuka no kupola. (Esaya 6:10; Yohane 12:40) Na cine, abaYuda abengi bakaanine fye ku mufulo ukuti Yesu e Kalubula wabo, kabili e wali no kubapeela umweo.

Nikodemo, Yosefe uwa ku Arimatea, ne ntungulushi shimo ‘balitetekele’ Yesu. Lelo tabalangile ukuti balimutetekele, nalimo baletiina ukubatamfya mwi sunagoge pantu ‘batemenwe ukucindikwa ku bantu.’—Yohane 12:42, 43.

Yesu alilondolwele ifyo cipilibula ukumutetekela, atile: “Uwatetekela ine, ninshi tatetekele ine neka, lelo atetekela no wantumine; no wamona ine, ninshi amona no wantumine.” Icine ico Lesa aebele Yesu ukusambilisha abantu, kabili ico Yesu aatwalilila ukubilisha calicindama sana ica kuti Yesu atile: “Uwansuula no kukanapokelela amashiwi yandi ali no wa kumupingula. Amashiwi ayo nasosa e yakamupingula mu bushiku bwa kulekelesha.”—Yohane 12:44, 45, 48.

Pa kulekelesha, Yesu atile: “Ine nshilanda ifyandi ne mwine, lelo Tata umwine uwantumine alimpeela ifunde lya fyo mfwile ukulanda no kusosa. Kabili nalishiba ukuti ifunde lyakwe e mweo wa muyayaya. E ico ifyo nsosa, nsosa ukulingana ne fyo Tata anjebele.” (Yohane 12:49, 50) Yesu alishibe ukuti mu nshiku fye ishinono ali no kufwila abantu bonse abamutetekele na bakamutetekela.—Abena Roma 5:8, 9.