Ubumi bwa kwa Yesu no Butumikishi

Ukuicefya pa ca Kucilila ca Kulekelesha

PETRO na Yohane, balebomba pe samba lya makambisho ukufuma kuli Yesu, nabafika kale mu Yerusalemu ku kucita amapekanyo ya ca Kucilila. Yesu, mu kumonekesha capamo na bambi abatumwa ikumi, afika pa numa mu cungulo kasuba. Akasuba kaleingila pa cifutu ca calo ilintu Yesu ne bumba lyakwe batentemuka Ulupili lwa Miolife no kwabuka Umukonko wa Kidrone. Iyi e nshita ya kulekelesha iya kwa Yesu iya kumona umusumba ukufikila pa numa ya kubuushiwa kwakwe.

Mu kwangufyanya Yesu ne bumba lyakwe bafika mu musumba no kulola ku ŋanda uko bali no kusefesha ica Kucilila. Banina amatabo ukuya ku muputule ukalamba uwa pa mulu, uko basanga amapekanyo yonse nayacitwa ku kusefya kwabo ukwa pa mbali ukwa ca Kucilila. Yesu aali nalolesha ku ntanshi kuli aka kashita, nga fintu asosa ukuti: “Ukufuluka nafuluke cibi ukulya na imwe ica kucilila ici, apo nshilacula.”

Mu ca cishilano, inkombo shine isha mwangashi shilanwewa ku baleakanamo mu ca Kucilila. Pa numa ya kupokelela ico mu kushininkisha icili lukombo lwalenga butatu, Yesu atootela no kusosa ukuti: “Buuleni ulu, mwakane mwe bene; pantu ndetila kuli imwe, nshakanweko icibwesha ca mwangashi ukufuma kuli nomba, kano bukasuke abwiso bufumu bwa kwa Lesa.”

Inshita imo mu kati ka ca kulya, Yesu aima, abika pa mbali umwingila wakwe uwa ku nse, abuula icitambala, no kwisusha umusambilo na menshi. Nga lyonse, shibweni aali no kumona kuli cene ukuti amakasa ya beni bakwe yasambwa. Lelo apantu pali aka kashita tapali shibweni uulipo, Yesu asakamana uyu mulimo wa pa lwakwe. Uuli onse uwa batumwa nga ashukile shuko ku kucite ici; nalyo line, mu kumonekesha pa mulandu wa kuti ukukansana kumo kucili e po kuli pa kati kabo, takuli nangu umo uwacita. Nomba balengwe nsoni lintu Yesu atendeka ukusamba amakasa yabo.

Lintu Yesu aisa kuli wene, Petro akaana ukuti: “Tamwakalensamba amakasa pe!”

“Nga nshikusambile, tauli ne nsenge na ine,” e fyo Yesu asosa.

“Mwe Shikulu,” e fyo Petro ayankulako, “mwinsamba amakasa yeka, lelo ne minwe no mutwe.”

“Uwaowa,” e fyo Yesu ayasuka, “takabila kusamba kano fye amakasa; lelo nasanguluka umubili onse. Na imwe mwalisanguluka, lelo te bonse.” Asosa ici pantu naishiba ukuti Yuda Iskariote alepekanya ukumufutuka.

Lintu Yesu asamba amakasa ya bonse 12, ukusanshako na makasa ya ulemufutuka, Yuda, afwala umwingila wakwe uwa ku nse no kukuwama kwi tebulo na kabili. Lyene aipusha ukuti: “Bushe, mwaishiba ico nacita kuli imwe? Imwe munjita Kasambilisha kabili Shikulu: cena mulalunjika; pantu e fyo ndi. E ico ine, ne Shikulwinwe kabili Kasambilisha wenu, nga musambile amakasa, na imwe mufwile ukusambana amakasa. Pantu imupeele ica kumulanga, ukuti na imwe mucite ifyo fine namucitila. Ndemwebe cine cine, nati, umusha tacilapo pali shikulu wakwe, nangu ni nkombe tayacilapo pa waitumine. Nga mwaishibe fintu ifi, ninshi mwalishuka nga muleficita.”

We sambililo lyawamisha mu mulimo wa kuicefya! Abatumwa tabalingile ukufwaya icifulo ca ntanshi, ukutontonkanya ukuti balicilapo ukucindama ica kuti bambi lyonse balingile ukubabombela. Bakabila ukukonka icipasho caimikwe na Yesu. Ici te cimo ica mwata wa kusamba amakasa. Iyo, lelo ni cimo ica kuitemenwa ukubomba ukwabula akapaatulula, te mulandu na fintu umulimo wingamoneka uwa pa nshi nelyo uushatemwikwa. Mateo 26:20, 21; Marko 14:17, 18; Luka 22:14-18; 7:44; Yohane 13:1-17.

◆ Cinshi cili icaibela pa lwa mimwene ya kwa Yesu iya Yerusalemu lintu aingila ku kusefya ica Kucilila?

◆ Mu nshita ya ca Kucilila, mu kushininkisha lukombo nshi Yesu apisha ku batumwa 12 pa numa ya kutootela?

◆ Mulimo nshi uwa pa lwabo ngo mwata wapayanishiwe ku beni lintu Yesu aali pe sonde, kabili mulandu nshi tawapayanishiwe mu kati ka kusefya ica Kucilila kuli Yesu na batumwa?

◆ Mifwaile nshi yaali iya kwa Yesu mu kubomba umulimo wa pa nshi uwa kusamba amakasa ya batumwa bakwe?