Ubumi bwa kwa Yesu no Butumikishi

Umulalilo wa Cibukisho

PA NUMA Yesu asamba amakasa ya batumwa, ayambula ilembo pe Ilumbo 41:9, ukusoso kuti: “Uulyako icilyo candi asumbwila pali ine icitende cakwe.” Lyene, pa kusakamikwa mu mupashi, alondolola ukuti: “Umo wa muli imwe alemfutuka.”

Abatumwa batendeka ukuba no bulanda no kutila kuli Yesu umo umo: “Bushe ni ne?” Nangu fye ni Yuda Iskariote ailunda mu kwipusha. Yohane, uulambalele mupepi na Yesu pe tebulo, ashintilila pa cifuba ca kwa Yesu no kwipusha ukuti: “Mwe Shikulu, ni ani?”

“Ni umo wa mu be kumi na babili, uuletobela na ine mu lunweno,” e fyo Yesu ayasuka. “Pantu Umwana wa muntu wena aleya, ifyo camulembelwa; lelo kalanda kuli ulya muntu uo Umwana wa muntu afutukwako! Camuwamina nga tafyelwe umuntu ulya.” Pa numa ya ico, Satana na kabili aingila muli Yuda, ukushukila incende mu mutima wakwe, uyo usangwike uwa bubifi. Pa numa ubo bushiku, Yesu mu kulinga aita Yuda “umwana wa boni.”

Yesu nomba aeba Yuda ukuti: “Ico ulecita, cita bwangu.” Takuli nangu umo uwa mu batumwa uwaumfwa cintu Yesu alepilibula. Bamo batunganya ukuti apo Yuda ali na kacipao ka ndalama, Yesu alemweba ukuti: “Ashite ifyo balekabila ku mutebeto,” nalimo ukuti ayepeele icintu cimo ku babusu.

Pa numa Yuda afuma aya, Yesu atendeka ukusefya konse ukupya, nelyo ukwibukisha, na batumwa bakwe aba busumino. Abuula umukate, atootela, aumokaula, no kuupeela kuli bene, ukusoso kuti: “Buuleni, mulye.” Alondolola ukuti: “Uyu mubili wandi uulepeelwa pa mulandu wa imwe; citeni ici ku kunjibukisha.”

Ilyo umo umo nalyako ku mukate, Yesu abuula ulukombo lwa mwangashi, mu kushininkisha ulukombo lwalenga bune ulwalebomfiwa mu mibombele ya Kucilila. Na kabili atootela pali lwene, alupisha kuli bene, ukubeba ukunwamo, no kusoso kuti: “Ulukombo ulu e cipingo cipya mu mulopa wandi uuleitililwa pa mulandu wa imwe.”

E co ici cili, na kuba, cibukisho ca mfwa ya kwa Yesu. Cila mwaka pa Nisani 14 cilingile ukubwekeshiwapo, nga fintu Yesu asosa, ku kumwibukisha. Cikacinkulako bakasefya cintu Yesu na Wishi wa mu mulu bacita ku kupayanya umwa kupusukila ku mutundu wa buntunse ukufuma ku kusenukwa kwa mfwa. Ku baYuda abasanguka abakonshi ba kwa Kristu, ukusefya kukapyana Ukucilila.

Icipingo cipya, ico icalengwa ukubomba ku mulopa wasumiwe uwa kwa Yesu, cipyana icipingo ca kale ica Malango. Ciwikishiwa na Yesu Kristu pa kati ka mbali shibili—pa lubali lumo, Yehova Lesa, kabili pa lubali lumbi, Abena Kristu basubwa no mupashi ba 144,000. Pa mbali ya kupayanishisha ukulekelelwa kwa membu, icipingo cisuminisha ukupangwa kwa luko lwa mu mulu ulwa bashimapepo-imfumu. Mateo 26:21-29; Marko 14:18-25; Luka 22:19-23; Yohane 13:18-30; 17:12; 1 Abena Korinti 5:7.

◆ Busesemo nshi ubwa mu Baibolo ubo Yesu ayambula ukukuma kuli cibusa, kabili kubomfya nshi uko apanga ku lwa bwene?

◆ Mulandu nshi abatumwa babeela aba bulanda apakalamba, kabili cinshi umo umo uwa bene aipusha?

◆ Cinshi Yesu aeba Yuda ukucita, lelo ni shani fintu abatumwa bambi baumfwa aya makambisho?

◆ Kusefya nshi Yesu atendeka pa numa Yuda afuma aya, kabili mifwaile nshi intu kubomba?

◆ Ni bani bali imbali ku cipingo cipya, kabili cinshi icipingo cipwishishisha?