ISAMBILILO 17

Bushe Yesu Aba Shani?

Ifimoneka Ulwapulintwa

Ilyo tulesambilila pa fyo Yesu alelanda ne fyo alecita ilyo ali pano isonde, tuleshibe mibele Yesu akwata iilenga twalafwaya ukupalama kuli ena na kuli Wishi Yehova. Mibele nshi imo iyo Yesu akwata? Kabili finshi tulingile ukucita pa kuti tulemupashanya?

1. Ni muli finshi Yesu apalana na Wishi?

Ilyo Yesu ashilaisa pano isonde, alikele na Wishi ku muulu pa myaka iingi nga nshi. Kanshi alemona ifyo Wishi alecita kabili alisambilileko ifingi. Ici calenga aletontonkanya, aleumfwa no kucita ifintu nga Wishi. (Belengeni Yohane 5:19.) Na kuba, imibele Yesu akwata e yo na Wishi akwata, e mulandu wine alandiile ukuti: “Onse uwamona ine, ninshi amona na Tata.” (Yohane 14:9) Ilyo mulesambilila pa mibele ya kwa Yesu, mukalaishibilako Yehova. Ku ca kumwenako, filya Yesu alebika sana amano ku bantu, filanga ifyo Yehova abika amano na kuli imwe.

2. Bushe Yesu alangile shani ukuti alitemwa Yehova?

Yesu atile: “Pa kuti aba muli ici calo beshibe ukuti nalitemwa Tata, ndecita filya fine Tata anjebele ukucita.” (Yohane 14:31) Ilyo Yesu ali pano isonde alilangile ukuti alitemenwe sana Wishi pantu alemumfwila na lintu ifintu fya-afishe. Na kabili Yesu alitemenwe sana ukulanda pali Wishi, kabili aleafwa abantu ukuba ifibusa na Yehova.—Yohane 14:23.

3. Bushe Yesu alanga shani ukuti alitemwa abantu?

Baibo itila Yesu ‘alitemwa sana’ abantu. (Amapinda 8:31) Alilangile ifyo atemwa abantu ilyo alebakoselesha no kubafwa. Ifipesha amano ifyo acitile filanga ukuti tali fye na maka, lelo alelangulukilako na bantu. (Marko 1:40-42) Ali ne cikuuku ku bantu kabili tali na kapaatulula. Ifyo alelanda fyalesansamusha abalekutika kuli ena abalefwaya ukusambilila icine kabili fyalelenga baba ne subilo. Pa mulandu wa kuti Yesu alitemwa abantu bonse, ali-itemenwe ukucula no kufwa. Nomba abo atemwa sana, bantu bakonka ifyo asambilisha.—Belengeni Yohane 15:13, 14.

SAMBILILENI NA FIMBI

Sambilileni na fimbi pa mibele ya kwa Yesu. Kabili sambilileni ne fyo mwingalanga ukuti mwaliba no kutemwa kabili ni mwe bakapekape nga filya Yesu ali.

4. Yesu alitemwa Wishi

Ifyo Yesu alecita filatusambilisha ifyo twingacita pa kulanga ukuti twalitemwa Lesa. Belengeni Luka 6:12 na Yohane 15:10; 17:26. Nga mwabelenga ilembo limo na limo, mufwile ukulanshanya ici cipusho:

Finshi twingacita pa kulanga ukuti twalitemwa Yehova nga filya Yesu alecita?

Yesu alepepa. — Yesu alitemenwe Wishi wa ku muulu kabili ilingi alepepa kuli ena

5. Yesu alebika amano ku bantu

Yesu alebika amano ku fyo abantu balekabila ukucila ku fyo alefwaya. Na lintu anakile alibomfeshe amaka ne nshita yakwe ku kwafwa abantu. Belengeni Marko 6:30-44, lyena lanshanyeni aya mepusho:

Finshi fimo ifyo Yesu acitile ifilanga ukuti alibikile amano ku bantu?—Moneni ifikomo 31, 34, 41, na 42.
Cinshi calengele Yesu aleafwa abantu?—Moneni icikomo 34.
Bushe filya Yesu alepashanya imibele ya kwa Yehova, fyamusambilisha finshi pali Yehova?
Finshi fimo ifyo twingacita pa kulanga ukuti twalibika amano ku bantu nga filya Yesu alecita?

Yesu afusha imikate 5 ne sabi libili no kuliisha abantu abengi nga nshi. Abasambi balepeela abaume, abanakashi, na bana ifya kulya.

6. Yesu ni kapekape

Yesu ali ni kapekape nangu ca kuti takwete ifintu ifingi, kabili atukoseleshe ukuti na ifwe tufwile ukuba bakapekape. Belengeni Imilimo 20:35, lyena lanshanyeni ici cipusho:

Finshi Yesu alandile ukuti e fingalenga twaba ne nsansa?

Tambeni VIDIO, lyena lanshanyeni icipusho cakonkapo.

VIDIO: “Mwaba Insansa Ishingi mu Kupeela”—Iyo Baipifya (4:00)

Finshi fimo ifyo twingacita pa kulanga ukuti ni fwe bakapekape, nangu ca kuti tatwakwata ifintu ifingi?

Bushe mwalishiba ici cishinka?

Baibo isambilisha ukuti tufwile ukupepa kuli Yehova ukupitila mwi shina lya kwa Yesu. (Belengeni Yohane 16:23, 24.) Nga tulepepa muli iyi nshila, ninshi tulelanga ukuti tulatasha pa fyo Yesu atucitila pa kuti tube ifibusa fya kwa Yehova.

ABANTU BAMO BATILA: “Lesa tasakamana fwe bantu nga tulecula.”